Sanebimɔ He

◼ Mɛni hewɔ esa akɛ wɔkwɛ wɔ atadewoo kɛ hesaamɔ jogbaŋŋ yɛ be mli ni wɔyaa ni wɔyasara Asafo lɛ nitsumɔhei ni yɔɔ Brooklyn, Patterson, kɛ Wallkill, New York, kɛ nitsumɔhe niji ni yɔɔ jeŋ fɛɛ lɛ eko lɛ?

Aakpa Kristofoi agbɛ akɛ amɛsu kɛ baŋ baafee nɔ ni yɔɔ fɛo. Esa akɛ wɔ atadewoo kɛ hesaamɔ yɛ be fɛɛ mli lɛ afee nɔ ni sa ni woo yɔɔ mli ni sa kɛha Yehowa Nyɔŋmɔ tsuji. Enɛ ji anɔkwale, titri lɛ yɛ be mli ni wɔyasaraa Asafo lɛ nitsumɔhei ni yɔɔ New York kɛ nitsumɔhe niji ni yɔɔ jeŋ fɛɛ lɛ.

Yɛ afi 1998 mli lɛ, abaafee kpokpaa wulu kɛ majimaji ateŋ kpeei. Wɔnyɛmimɛi akpei abɔ ni jɛ shikpɔji babaoo nɔ lɛ baaya ni amɛyasara Asafo lɛ yitso ni yɔɔ New York lɛ kɛ nitsumɔhe niji ni yɔɔ maji krokomɛi anɔ lɛ. Jeee beni wɔmiiya nɛkɛ nitsumɔhei nɛɛ pɛ kɛkɛ, shi moŋ yɛ bei krokomɛi fɛɛ mli lɛ, ehe miihia ni ‘wɔkɛ wɔhe atsɔɔ yɛ nɔ fɛɛ nɔ mli akɛ Nyɔŋmɔ sɔɔlɔi,’ ni nɔ ni fata he ji atadewoo kɛ hesaamɔ ni sa.​—⁠2 Kor. 6:​3, 4.

Yɛ be mli ni ewieɔ atadewoo kɛ hesaamɔ ni sa he lɛ, Organized to Accomplish Our Ministry wolo lɛ wie hiamɔ ni yɔɔ gbɔmɔtsoŋ hetsemɔ, atadewoo kɛ hiɛshikamɔ, kɛ hesaamɔ kpakpa he yɛ be mli ni akɛ he ewo sɔɔmɔ nitsumɔ lɛ mli kɛ Kristofoi akpeei ni ayaa lɛ. Kɛkɛ ni ewie yɛ baafa 131 kuku 2 lɛ akɛ: “Nakai nɔŋŋ eji kɛ ooya ni oyasara Betel shia ni yɔɔ Brooklyn loo Asafo lɛ nitsumɔhe niji lɛ eko. Kaimɔ akɛ, gbɛi Betel lɛ shishi ji ‘Nyɔŋmɔ Shia,’ no hewɔ lɛ esa akɛ wɔ atadewoo kɛ hesaamɔ kɛ jeŋba atamɔ nɔ ni ataoɔ yɛ wɔdɛŋ lɛ nɔŋŋ yɛ be mli ni wɔyaa kpeei kɛha jamɔ yɛ Maŋtsɛyeli Asa lɛ nɔ lɛ.” Esa akɛ Maŋtsɛyeli shiɛlɔi ni yɔɔ maŋ lɛ mli, kɛ mɛi ni jɛɔ shɔŋŋ amɛbaa ní amɛbakwɛ jɛmɛ ní amɛkɛ Betel weku lɛ mli bii abɔ, ní amɛyasara nitsumɔhe niji lɛ fɛɛ ahiɛ tɛi ni nɔ kwɔlɔ nɛɛ nɔŋŋ mli.

Esa akɛ wɔ atadewoo kɛ hesaamɔ aná hewalɛ kpakpa yɛ mɛi krokomɛi anɔ yɛ bɔ ni amɛsusuɔ Yehowa anɔkwa jamɔ he amɛhaa lɛ he. Shi ayɔse akɛ kɛ nyɛmimɛi hii kɛ yei lɛ ateŋ mɛi komɛi miiba ni amɛbasara Asafo lɛ nitsumɔhei lɛ, anaa akɛ amɛhesaamɔ loo atadewoo bɛ hiŋmɛi nɔ. Atadewoo ni tamɔ nɛkɛ esaaa kɛ́ aaya ayasara Betel shiai lɛ. Wɔmiisumɔ ni wɔhiɛ taomɔ nii ni nɔ kwɔlɔ lɛ nɔŋŋ, ni haa esoroɔ Nyɔŋmɔ webii kɛjɛɔ je lɛ he yɛ nɛkɛ sane nɛɛ kɛ wɔ Kristofoi ashihilɛi krokomɛi fɛɛ hu mli, kɛtsɔ nibii fɛɛ ni wɔɔfee ni wɔkɛwo Nyɔŋmɔ hiɛ nyam lɛ nɔ. (Rom. 12:2; 1 Kor. 10:31) Ehi hu akɛ wɔɔwie wɔtsɔɔ mɛi ni wɔkɛ amɛkaseɔ Biblia lɛ kɛ mɛi krokomɛi ni ekolɛ amɛbaaya ni amɛyasara Betel klɛŋklɛŋ be mli kwraa lɛ ni wɔkai amɛ bɔ ni ehe hiaa akɛ amɛaaha amɛhiɛ ahi atadewoo kɛ hesaamɔ ni sa nɔ lɛ nɔ.

No hewɔ lɛ, kɛ́ ooya ni oyasara Asafo lɛ nitsumɔhei lɛ, bi ohe akɛ: ‘Ani mitadewoo kɛ mihesaamɔ lɛ sa lo?’ (Okɛto Mika 6:⁠8 he.) ‘Ani ewieɔ Nyɔŋmɔ ni mijaa lɛ lɛ he ekpakpa? Ani bɔ ni mipueɔ mihaa lɛ baagbala mɛi krokomɛi ajwɛŋmɔ aloo eeewo amɛ mlila? Ani miito okadi kpakpa miiha mɛi krokomɛi ni baaya ayasara jɛmɛ klɛŋklɛŋ kwraa lɛ?’ Eba akɛ wɔkɛ wɔ atadewoo kɛ hesaamɔ aaawula “Nyɔŋmɔ ni ji wɔ yiwalaherelɔ lɛ tsɔɔmɔ lɛ yɛ nibii fɛɛ mli.”​—⁠Tito 2:​10.