Sanebimɔ He
◼ Mɛɛ kɔkɔbɔi esa akɛ fɔlɔi atsu he nii beni amɛkɛ amɛbii bibii lɛ náa gbɛfaŋnɔ yɛ shiɛmɔ nitsumɔ lɛ mli lɛ?
Fɔlɔi Kristofoi feɔ jogbaŋŋ yɛ amɛbii lɛ ni amɛkɛ amɛ náa gbɛfaŋnɔ yɛ shiɛmɔ nitsumɔ lɛ mli, ní amɛtsɔseɔ amɛ koni amɛkɛ mɛi krokomɛi agba Maŋtsɛyeli sanekpakpa lɛ he sane lɛ hewɔ lɛ. Yɛ nakai feemɔ mli lɛ, ehe miihia ni amɛhiɛ ahi amɛbii bibii lɛ anɔ yɛ osharai ni yɔɔ shikpɔŋkuku lɛ mli ni baanyɛ aba lɛ hewɔ, yɛ akutseiaŋ ni yɔɔ “shweshweeshwe” po mli. Bei babaoo lɛ, gbekɛbii ji mɛi titri ni akɛ yiwalɛ nifeemɔ kɛ niseniianifeemɔ tutuaa yɛ hiɛjoomɔ kɛ bɔlɛnamɔ mli jeŋba shara ni yɔɔ “jaramɔ bei” ni wɔyɔɔ mli nɛɛ mli lɛ hewɔ. (2 Tim. 3:1-5) Ehe miihia ni fɔlɔi akwɛ amɛhe nɔ jogbaŋŋ koni amɛbu amɛbii bibii lɛ ahe kɛjɛ mɛi krokomɛi ni baaye amɛ awui lɛ ahe. Mɛni abaanyɛ afee?
Biblia lɛ kɛ ŋaawoo ni nilee yɔɔ mli haa akɛ, wɔhiɛ atɛ̃ ni wɔkɛ wɔhiɛ afɔ̃ shi koni wɔna oshara ni baa lɛ. (Abɛi 22:3; Mat. 10:16) Yiŋtoo ni yɔɔ biɛ lɛ jeee ni afee mlai, shi moŋ eji nilee gbɛ kɛha fɔlɔ ko aloo onukpa ko akɛ eeefata gbekɛ ko he beni ekɛ ehe woɔ shiɛmɔ nitsumɔ lɛ mli lɛ. Kɛ gbekɛbii ni ji shiɛlɔi enyɔ fee ekome kɛtsu nii lɛ, esa akɛ fɔlɔ ko aloo onukpa kroko hiɛ ahi amɛnɔ yɛ be fɛɛ mli. Eji anɔkwale akɛ, yɛ be mli ni gbekɛ lɛ daa etsɔɔ onukpa ni anaa hekɛnɔfɔɔ yɛ emli lɛ, fɔlɔi lɛ baanyɛ akpɛ amɛyiŋ kɛji gbekɛ nuu loo yoo lɛ biɔ fɔlɔi anɔkwɛmɔ fioo.—Kwɛmɔ November 1992 Wɔ Maŋtsɛyeli Sɔɔmɔ lɛ Sanebimɔ He lɛ.
Nilee yɛ mli hu akɛ wɔhiɛ aaahi wɔhe nɔ yɛ shweshweeshwe shihilɛ he beni wɔkɛ tsɔne fãa gbɛ kɛ beni wɔnyiɛ lɛ. Bei pii lɛ, wɔhenɔ ní wɔɔkwɛ jogbaŋŋ lɛ tsiɔ osharai kɛ piŋmɔ, tsofafeemɔ he shika fitemɔ, kɛ mla naa mlidaamɔ nibii ni faa yɛ jeŋ ni sumɔɔ saneyeli ni ebɔle wɔhe nɛɛ mli lɛ naa.
Ehi kɛha gbekɛbii akɛ “amɛjie Yehowa gbɛi lɛ yi.” (Lala 148:12, 13) Amɛ wiemɔ ni saa mɛi ahiɛ kɛ jeŋba kpakpa ni amɛjieɔ lɛ kpo beni amɛhiɛ shiɛmɔ nitsumɔ lɛ mli lɛ náa mɛi krokomɛi anɔ hewalɛ ni ekɛ woo haa Yehowa. Fɔlɔi, bɔ fɛɛ bɔ ni fee lɛ, nyɛyea nyɛbuaa nyɛbii lɛ ni amɛná gbɛfaŋnɔ daa yɛ sanekpakpa lɛ jajemɔ lɛ mli beni nyɛ hu nyɛfee klalo be fɛɛ be kɛha amɛhe buu kɛmiijɛ oshara fɛɛ oshara ni yɔɔ shihilɛ mli lɛ he lɛ!