Ani Ootsu Nii Kɛ Yiŋtoo Ko?
1 Yehowa ji Nyɔŋmɔ ni yɔɔ yiŋtoo. (Yes. 55:10, 11) Awoɔ wɔ hewalɛ koni wɔkase lɛ. (Efe. 5:1) Eka shi faŋŋ akɛ, esa akɛ enɛ afee faŋŋ yɛ bɔ ni wɔtsuɔ wɔsɔɔmɔ nitsumɔ lɛ wɔhaa lɛ mli. No hewɔ lɛ, sanebimɔ ni ja ji akɛ: “Ani ootsu nii kɛ yiŋtoo ko?”
2 Shinaai anaa shiɛmɔ, trukaa odaseyeli, kɛ woji kɛhamɔ ni okɛ ohe woɔ mli lɛ fɛɛ ji sɔɔmɔ nitsumɔ ni yiŋtoo yɔɔ sɛɛ lɛ fã. Shi kaimɔ akɛ, jeee shiɛmɔ lɛ pɛ ji nɔ ni yɔɔ fãmɔ ni akɛha wɔ lɛ mli, shi kaselɔi afeemɔ lɛ hu fata he. (Mat. 28:19, 20) Kɛ wɔdu Maŋtsɛyeli lɛ he anɔkwale dumɔwui wɔgbe naa lɛ, ehe baahia ni wɔku wɔ sɛɛ koni wɔyashwie amɛ nɔ nu ní wɔkwɛ amɛnɔ daa yɛ be mli ni wɔkpaa gbɛ akɛ Yehowa baaha eshwere lɛ. (1 Kor. 3:6) Ehe miihia koni wɔkwɛ jogbaŋŋ yɛ sɛɛsaramɔi afeemɔ he kɛ Biblia mli nikasemɔi ashishijee he.
3 Lɛɛmɔ Osɔɔmɔ Nitsumɔ lɛ Mli: Onuɔ he be fɛɛ be akɛ oyɛ miishɛɛ kɛ́ ooonyɛ okwɛ nɔ ni otsu momo yɛ sɔɔmɔ nitsumɔ lɛ mli lɛ koni okɛɛ ohe akɛ: “Migbe nɔ ni mije shishi akɛ mafee lɛ naa.” Taakɛ aŋma yɛ 2 Timoteo 4:5 lɛ, Paulo wo hewalɛ akɛ: “Gbee osɔɔmɔ lɛ naa kwraa!” Nɔ ni fata he ji mɔdɛŋ ni ooobɔ waa koni odi mɛi fɛɛ ni ná he miishɛɛ lɛ asɛɛ. Too be he gbɛjianɔ jogbaŋŋ kɛha sɛɛsaramɔi afeemɔ yɛ odaa otsi gbɛjianɔtoo kɛha shiɛmɔyaa lɛ mli. Tsu oti ni ma ohiɛ akɛ ooobɔ mɔdɛŋ koni okɛ mɛi ni sumɔɔ jalɛ nifeemɔ lɛ aje Biblia mli nikasemɔi ashishi lɛ he nii. Esa akɛ enɛ afee oyiŋtoo beni okɛ ohe woɔ shiɛmɔ nitsumɔ lɛ mli lɛ.
4 Bi shiɛlɔi koni amɛtsɔɔ bɔ ni amɛnu he amɛha beni amɛna akɛ aabaptisi amɛ Biblia mli nikaselɔi yɛ kpee ko shishi lɛ. Ekolɛ amɛmii shɛ amɛhe waa tamɔ mɛi ni abaptisiɔ amɛ lɛ. Amɛtsu yiŋtoo wulu ko he nii! Kaselɔ feelɔ ko tsɔɔ mli yɛ nɛkɛ gbɛ nɔ akɛ: “Kaselɔi afeemɔ lɛ tsɔɔ akɛ, ní aaafee mɛi babaoo Yehowa yijielɔi. No bafeɔ wala kɛhaa mɛi ni kpɛlɛɔ anɔkwale lɛ nɔ lɛ. Misumɔɔ waa akɛ matsɔɔ mɛi krokomɛi anɔkwale lɛ—eji nɔ ko ni sa kadimɔ waa diɛŋtsɛ! . . . Mɛi ni sumɔɔ Yehowa bianɛ lɛ ateŋ mɛi babaoo ebatsɔmɔ minanemɛi ni misumɔɔ amɛ waa diɛŋtsɛ.”
5 Feemɔ he mfoniri akɛ onyɛ oye obua mɔ ko ni ébatsɔ Yehowa sɔɔlɔ ni ejɔɔ ehe nɔ! Mɛɛ miishɛɛ sane po nɛ! Yibiiwoo ni tamɔ nɛkɛ lɛ jɛɔ nitsumɔ ni akɛ yiŋtoo tsuɔ yɛ shiɛmɔ nitsumɔ lɛ mli lɛ mli kɛbaa.—Kol. 4:17.