Fɔlɔi—Nyɛfea Nɔkwɛmɔnɔ Kpakpa Nyɛhaa Nyɛbii
1 Nyɔŋmɔ Wiemɔ lɛ kɛɔ wɔ akɛ, “jalɔ tsɛ [kɛ enyɛ] aaanyã babaoo.” (Abɛi 23:24, 25) Kwɛ bɔ ni eji jɔɔmɔ kɛha fɔlɔi ni efee nɔkwɛmɔnɔ kpakpa amɛha amɛbii lɛ! Nitsumɔhe Nine Ajinafoi Akuu ko mlinyo ko wie yɛ efɔlɔi ahe akɛ: “Amɛtswa amɛshihilɛ fɛɛ amɛma anɔkwale lɛ nɔ, ni mi hu miisumɔ ni matswa mishihilɛ fɛɛ mama nɔ.” Mɛni esa akɛ bii lɛ ana yɛ amɛfɔlɔi ahe?
2 Jeŋba Kpakpai kɛ Bulɛ ni Mli Kwɔ: Eji gbɛnaa nii ni kã fɔlɔi anɔ akɛ amɛdũ subaŋ kpakpai amɛwo amɛbii amli. Akaseɔ jeŋba kpakpai, jeee gbɛtsɔɔmɔ ni akɛ naabu kɛɔ kɛkɛ, shi moŋ kɛtsɔ ekwɛmɔ kɛ ekasemɔ nɔ. No hewɔ lɛ, mɛɛ jeŋba nyɛjieɔ lɛ kpo nyɛtsɔɔ? Ani nyɛbii lɛ nuɔ ni nyɛmiikɛɛ “miikpá he fai,” “ofainɛ,” kɛ “oyiwaladɔŋŋ”? Ani nyɛjieɔ bulɛ ni mli kwɔ kpo nyɛtsɔɔ nyɛhe yɛ weku lɛ mli? Ani nyɛboɔ toi kɛ́ mɛi krokomɛi miiwie? Ani nyɛboɔ toi kɛ́ nyɛbii lɛ kɛ nyɛ miiwie? Ani ajieɔ subaŋ kpakpai nɛɛ akpo yɛ Maŋtsɛyeli Asa lɛ nɔ kɛ beni ayɔɔ shia lɛ mli hu?
3 Mumɔŋ Shidaamɔ Kpakpa kɛ Nitsumɔ ni akɛ Ekãa Tsuɔ: Nyɛmi nuu ko ni eye nɔ ni fá fe afii 50 yɛ be-fɛɛ sɔɔmɔ nitsumɔ lɛ mli lɛ kaiɔ akɛ: “Minyɛ kɛ mitsɛ feɔ nɔkwɛmɔnɔ kpakpa yɛ hiɛsɔɔ ni amɛyɔɔ kɛha amɛkpeei lɛ kɛ ekãa ni amɛyɔɔ yɛ sɔɔmɔ nitsumɔ lɛ mli lɛ mli.” Te nyɛfeɔ tɛŋŋ nyɛtsɔɔ nyɛbii lɛ akɛ nyɛsusuɔ nyɛshiabii lɛ amumɔŋ shidaamɔ ni amɛaahiɛ mli lɛ he waa? Ani nyɛfeɔ ekome kɛsusuɔ daa gbi ŋmalɛ lɛ he? Ani nyɛfeɔ weku nikasemɔ daa? Ani obii lɛ naa akɛ nyɛmiikane Biblia lɛ kɛ Asafo lɛ woji lɛ? Mɛɛ wiemɔ amɛnuɔ kɛ́ odamɔ weku lɛ najiaŋ oosɔle lɛ? Ani nyɛ kɛ nyɛbii lɛ kɛ nyɛhe woɔ mumɔŋ sanegbaa ni tswaa mɔ emaa shi mli, ni nyɛgbaa nibii kpakpai ni kɔɔ anɔkwale lɛ kɛ asafo lɛ he? Ani nyɛmiisumɔ waa akɛ nyɛaaya kpeei lɛ fɛɛ ní nyɛkɛ nyɛhe awo shiɛmɔ nitsumɔ lɛ mli akɛ weku?
4 Fɔlɔi, nyɛsusua nɔkwɛmɔnɔ ni nyɛfeɔ nyɛhaa nyɛbii lɛ he. Nyɛhaa efea nɔ ni hi jogbaŋŋ, ni amɛbaana yɛ amɛshihilɛ mli fɛɛ akɛ eji jwetri. Nɔkwɛlɔ gbɛfalɔ ko ŋa ni amrɔ nɛɛ eye kɛjɛ afii 70 kɛyaa lɛ kɛɛ akɛ: “Miiná nɔkwɛmɔnɔ kpakpa ni mi-fɔlɔi ni yɔɔ suɔmɔ lɛ fee amɛfɔ̃ shi lɛ he sɛɛ lolo. Ni eji misɔlemɔ ni mli wa waa akɛ majie hiɛsɔɔ ni mli wa waa kpo matsɔɔ gboshinii nɛɛ kɛtsɔ ekɛ nitsumɔ jogbaŋŋ nɔ yɛ afii ni baaba ni kã wɔhiɛ nɛɛ fɛɛ mli.”