Tsu Sɛɛsaramɔi Ahe Gbɛnaa Nii Lɛ He Nii
1 Wɔyɛ yiŋtoi babaoo ni kanyaa wɔ ni haa wɔkɛ wɔhe woɔ sɛɛsaramɔi afeemɔ mli jogbaŋŋ kɛmɔɔ shi. Wɔmiisumɔ ni wɔtsu nitsumɔ ni akɛwo wɔdɛŋ lɛ jogbaŋŋ kɛgbe naa ni emɔ shi, taakɛ Paulo fee lɛ. (Bɔfoi 20:21, 24) Kɛji wɔto naa ni wɔtee mɛi fɛɛ ni yɔɔ wiemɔ lɛ he miishɛɛ lɛ aŋɔɔ lɛ, ebaaha wɔhiɛ henilee kpakpa mli beni wɔbɔɔ mɔdɛŋ ni wɔgbe wɔsɔɔmɔ nitsumɔ lɛ naa kwraa lɛ.—2 Tim. 4:5.
2 Nilee Haa Wɔtsuɔ Gbɛnaa Nii Ahe Nii: Esa akɛ anɔkwale ni eji akɛ wala ebaje oshara mli lɛ atsirɛ wɔ ni wɔkɛ ekaa afee sɛɛsaramɔi (Yoh. 17:3) Esa akɛ nilee ni wɔyɔɔ yɛ Yehowa kojomɔ kɛ bɔ ni Harmagedon ebɛŋkɛ eha lɛ he lɛ awo wɔ hewalɛ, jeee ni wɔbɔ efɔŋfeelɔi lɛ akɔkɔ kɛkɛ, shi moŋ ni wɔye wɔbua mɛi ni ‘dɔmɔɔ ŋtsɔi ni amɛyeɔ ŋkɔmɔ yɛ nihiinii ni afeɔ yɛ shikpɔŋ lɛ nɔ’ lɛ he lɛ hu (Ezek. 9:4) Ehe miihia ni amɛbafata Yehowa gbɛjianɔtoo ni anaa lɛ he.
3 Yelikɛbuamɔ he miihia gbɔmɛi lɛ bɔni afee ni amɛnu anɔkwale lɛ shishi jogbaŋŋ (Bɔfoi 8:30, 31; 18:26) Enɛ ji yiŋtoo kroko hewɔ ni esa akɛ wɔtsu wɔgbɛnaa nii ahe nii ni wɔku wɔsɛɛ ni ‘wɔyashwã’ anɔkwale dumɔ wui ni wɔdu lɛ nɔ ‘nu’ lɛ. Eji mɔ ko ekuuu esɛɛ kɛbaaa wɔŋɔɔ shii abɔ koni ebaye ebua wɔ ni wɔna Yehowa kɛ E-yiŋtoi ni yɔɔ nyam lɛ ahe anɔkwale nilee kulɛ, mɛɛ mumɔŋ hiɛyaa wɔ diɛŋtsɛ wɔɔnyɛ wɔɔna?—Mat. 7:12.
4 Jiemɔ Suɔmɔ kɛ Ekaa Kpo: Sɛɛsaramɔi afeemɔ ji gbɛ kpakpa ni wɔɔtsɔ nɔ wɔjie suɔmɔ kpo wɔtsɔɔ gbɔmɛi. Nyɛminuu shwilafo ko ni miisɔmɔ akɛ daa gbɛgbalɔ lɛ kɛɛ: “Kɛjɛ be mli ni abaptisi mi nɛɛ, nɔ ni mishweɔ ji ni magba mɛi krokomɛi nɔ ni mikase kɛjɛ Biblia lɛ mli. Eŋɔɔ minaa waa akɛ migbɔjɔmɔ nɛɛ etsiii minaa yɛ enɛ feemɔ mli. . . . Eha mikai shiai fɛɛ ni yɔɔ gbɛjegbɛ lɛ he lɛ he saji yɛ miyitsoŋ, ni yɛ nɛkɛ gbɛ nɔ lɛ, minyɛ mitee sɛɛsaramɔi yɛ mɛi ni yɔɔ Biblia kasemɔ he miishɛɛ lɛ anɔ.” Nɛkɛ nyɛminuu shwilafo nɛɛ kɛ etsui naa nii lɛlɛŋ, ni etsiii ehe naa yɛ sɛɛsaramɔi afeemɔ kɛ e-Kristofoi asuɔmɔ ni eeejie kpo etsɔɔ mɛi krokomɛi lɛ mli.
5 Kɛji wɔmiifee sɛɛsaramɔi lɛ, bei pii lɛ wɔnaa hegbɛ ni wɔkɛ Biblia lɛ tsuɔ nii jogbaŋŋ ni wɔtsɔɔ hiɛnɔkamɔ ni yɔɔ wɔmli lɛ hu shishi. (1 Pet. 3:15) Jeee shiatsɛ lɛ kɛkɛ enɛ yeɔ ebuaa, shi moŋ ewoɔ ekaa kɛ hiɛsɔɔ ni wɔyɔɔ kɛha anɔkwale lɛ hu mli hewalɛ. Sɛɛsaramɔi afeemɔ haa wɔnaa miishɛɛ ko ni wɔnyɛŋ wɔna yɛ gbɛ kroko nɔ. Ni esaaa ni bɔ ni nakai miishɛɛ lɛ ji lɛ naa baa shi kɔkɔɔkɔ. Wɔbaanyɛ wɔwo mli hewalɛ daa kɛtsɔ ekaa ni wɔkɛaafee sɛɛsaramɔi lɛ nɔ.—Abɛi 10:22.
6 Esa akɛ wɔkɛ hiɛdɔɔ asusu wɔgbɛnaa nii akɛ wɔɔfee sɛɛsaramɔi lɛ he. Yehowa webii etsiii nibii kpakpai anaa ni mɛi krokomɛi anine akashɛ nɔ, ni wɔnyɛɔ wɔnaa enɛ yɛ wɔ jeŋ muu fɛɛ nitsumɔ yɛ 1991 sɔɔmɔ afi lɛ mli lɛ mli. (Abɛi 3:27) Wɔfee sɛɛsaramɔi 344,926,952 ni wɔfee shia Biblia mli nikasemɔi hu 3,947,261. Ana kaselɔi heei 300,945 ni jɔɔ amɛhe nɔ amɛha Yehowa ni abaptisi amɛ. Eji jeee wɔsuɔmɔ mli ni wɔjɛ wɔtsu wɔgbɛnaa nii ni ji sɛɛsaramɔi afeemɔ lɛ he nii kulɛ, nɛkɛ hiɛyaa kpele nɛɛ nyɛŋ aba kɔkɔɔkɔ.—1 Tes. 2:8.