Sanebimɔ he

◼ Ani osaa ohe kɛha oshara ni baanyɛ aba?

Bei pii lɛ, “be kɛ nibii ni aleee ni baa trukaa” lɛ feɔ ekome koni ekɛ tsofafeemɔ mli oshara aba yɛ ŋmɛnɛŋmɛnɛ jeŋ ni wɔyɔɔ mli nɛɛ mli, ni nɔ ni fata he ji nɔnyɛɛ ni akɛbaa mɔ nɔ koni eha agbala lá awo emli. (Jaj. 9:11, NW) No hewɔ lɛ, bɔni afee ni wɔnyɛ wɔsaa wɔhe wɔha nii ni baanyɛ aba trukaa nɛɛ, Yehowa etsɔ egbɛjianɔtoo lɛ nɔ ekɛ yelikɛbuamɔ eha wɔ yɛ gbɛ̀i srɔtoi pii anɔ, shi ekpaa wɔ gbɛ akɛ wɔbaafee wɔgbɛfaŋnɔ. Gbɛtsɔɔmɔi ni yɔɔ shishigbɛ nɛɛ baaye abua bo.

• Hiɛmɔ “Advance Medical Directive/Release” wolo hee lɛ be fɛɛ be.

• Kwɛmɔ koni obii lɛ ahiɛ “Identity Card” hee lɛ.

• Tĩi nɔ ni aŋma ahɔ January 1995 Wɔ Maŋtsɛyeli Sɔɔmɔ lɛ mli lɛ mli, ní okase bɔ ni okɛ datrɛfoi kɛ kojolɔi baasusu obi lɛ helatsamɔ lɛ he.

• Tĩi saji ni aŋmala ni kɔɔ lá mli nibii komɛi kɛ nibii ni yeɔ lá najiaŋ lɛ ahe lɛ amli. (Aajie yi aaha: Buu-Mɔɔ, October 1, 1994, baafa 31; June 1, 1990, baafai 14-15; March 1, 1989, baafai 30-31; Awake!, December 8, 1994, baafai 23-27; August 8, 1993, baafai 22-25; November 22, 1991, baafa 10; kɛ nɔ ni aŋma ahɔ Wɔ Maŋtsɛyeli Sɔɔmɔ, January 1995 kɛ January 1991 lɛ mli. Okɛwo nɔ ko mli koni onine ashɛ nɔ mra.)

• Okɛ henilee akpɛ oyiŋ kɛ́ obaanyɛ oha akɛ tsɔnei ni haa lá bɔleɔ shi yɛ gbɔmɔtso lɛ he lɛ atsu nii loo kɛ́ obaanyɛ oha akɛ nibii ni lá mli nibii yɔɔ mli lɛ atsu nii.

• Dani oooya helatsamɔhe lɛ, kɛ́ eeehi kwraa lɛ, ha onukpai lɛ ale bɔni afee ni amɛnyɛ amɛye amɛbua bo koni amɛnine ashɛ Hospital Liaison Committee (HLC) lɛ nɔ, kɛ́ ehe miihia. Yɛ gbekɛ bibioo gbɛfaŋ lɛ, bi onukpai lɛ koni amɛkɛɛ HLC lɛ mra kɛ́ oshara ko ba loo kɛ́ lá ni agbalaa awoɔ mɔ mli baje sane lɛ mli.

Ha Efee Faŋŋ akɛ Osumɔɔɔ Lá: Amaniɛbɔi tsɔɔ akɛ, nyɛmimɛi hii kɛ yei komɛi mɛɔ aahu kɛyashi beni ekpeɔ sɛɛ tsɔ̃ dani amɛkɛɔ datrɛfoi ni tsáa amɛ hela lɛ akɛ amɛsumɔɔɔ lá. Enɛ esaaa tsofafeemɔŋ nitsulɔi ahiɛ ni ehaa oboteɔ oshara mli koni aha bo lá. Kɛ datrɛfoi lɛ le ohemɔkɛyelii lɛ ní nɔ ni otaoɔ akɛ afee aha bo lɛ ji nɔ ni woji ni akɛ waonaa gbɛi ewo shishi ni kɔɔ gbɛtsɔɔmɔ pɔtɛɛ ni okɛhaa lɛ he lɛ fĩɔ sɛɛ lɛ, eyeɔ ebuaa koni amɛtsu he nii ni shishashaomɔ ko kwraa bɛ mli ni bei pii lɛ, etsɔɔ amɛ tsofafeemɔ mli helatsamɔ nibii krokomɛi ni amɛbaanyɛ amɛkɛtsu nii.

Akɛni tsofafeemɔ mli oshara baanyɛ aba be fɛɛ be ní bei pii lɛ okpaaa gbɛ tsɔ̃ hewɔ lɛ, feemɔ nibii amrɔ nɛɛ koni okɛbu bo kɛ obii ahe kɛjɛ lá ni agbalaa awoɔ mɔ mli lɛ he.—Abɛi 16:20; 22:3.