Wɔshiɛɔ Sanekpakpa
1 Kwɛ hegbɛ kpele ni wɔná akɛ wɔji mɛi ni hiɛ “nibii kpakpai ahe sanekpakpa!” (Rom. 10:15, NW) Wɔyɛ shɛɛ sane ni shɛjeɔ mɔ mii ni wɔɔgba mɛi ni yajeɔ basabasafeemɔ kɛ nijiaŋwujee shihilɛ mli lɛ. Te wɔbaafee tɛŋŋ wɔye wɔbua amɛ koni amɛyɔse akɛ wɔkɛ “nɔ ko kpakpa he sanekpakpa” miiha?—Yes. 52:7, NW.
2 Saamɔ Ohe kɛ Sanekpakpa: Saji ni wɔgbaa mɛi yɛ shiɛmɔ nitsumɔ lɛ mli lɛ baafee nɔ ni náa mɔ nɔ hewalɛ kpakpa kɛ́ wɔgbala wɔjwɛŋmɔ kɛtee nibii ni baaha aná jwɛŋmɔ ni ja yɛ he lɛ anɔ. No hewɔ lɛ, kɛ́ wɔmiihala shiɛmɔ wiemɔ ni wɔkɛbaatsu nii, ní wɔmiisusu wolo ni wɔkɛbaaha lɛ mli saji ahe lɛ, ehe baahia ni wɔma shɛɛ sane lɛ mli fãi srɔtoi ni baaha aná jwɛŋmɔ ni ja yɛ he lɛ anɔ mi. Wɔbaanyɛ wɔkpa gbɛ akɛ nibii ni woɔ mɔ hewalɛ baajɛ mli aba, kɛ́ wɔkɛ wɔhiɛnɔkamɔ ni jɛ Biblia lɛ mli lɛ ha kɛ nɔmimaa kɛ miishɛɛ lɛ.—Abɛi 25:11.
3 Eyɛ mli akɛ wɔnuɔ he wɔhaa mɛi kɛ́ amɛtsɔɔ bɔ ni jeŋ shihilɛi ni mli woɔ wu lɛ esa amɛhe eha lɛ moŋ, shi esa akɛ wɔtsɔɔ amɛ akɛ Nyɔŋmɔ Maŋtsɛyeli lɛ ji adesai anaagbai anaa tsabaa diɛŋtsɛ. Kɛ wɔmiigba Yehowa “oweletɔɔ gbi” ni baa lɛ he sane po lɛ, wɔbaasumɔ ni wɔtsɔɔ bɔ ni yɛ anɔkwale mli lɛ eji “sanekpakpa kɛha heshibalɔi lɛ” mli. (Yes. 61:1, 2, NW) Wɔbaanyɛ wɔma nɔ mi wɔha wɔ toibolɔi lɛ ekoŋŋ akɛ miishɛɛ ni fe fɛɛ kɛ nɔkpakpa ni fe fɛɛ baajɛ nɔ fɛɛ nɔ ni Yehowa feɔ lɛ mli kɛba yɛ naagbee mli.
4 Okɛ Anɔkwale lɛ Aha kɛ Miishɛɛ Diɛŋtsɛ: Kɛ gbɔmɛi na wɔhiɛ ŋmɔlɔŋmɔlɔ su lɛ ni amɛnu gbee ni wɔkɛwieɔ lɛ ni tsɔɔ akɛ wɔyɛ nɔmimaa lɛ, ehaa amɛboɔ toi waa. Kɛ wɔkɛ nɔkpakpa gbɛkpamɔ tsɔɔ wɔjwɛŋmɔ yɛ saji ahe lɛ, wɔ toibolɔi lɛ baana akɛ ‘wɔnyáa yɛ hiɛnɔkamɔ lɛ mli.’ (Rom. 12:12) No hewɔ lɛ, ekolɛ amɛbaasumɔ waa akɛ amɛaabo sanekpakpa lɛ toi. Eka shi faŋŋ akɛ, wɔyɛ yiŋtoo kpakpa yɛ jwɛŋmɔ kpakpa ni wɔɔná ni wɔjie miishɛɛ su kpo wɔtsɔɔ daa yɛ shiɛmɔ nitsumɔ lɛ mli lɛ sɛɛ.
5 Ákɛ sanekpakpa lɛ he sɔɔlɔi lɛ, wɔfeɔ babaoo fe sane kɛkɛ ni wɔkɛ mɛi lɛ gbaa. Wɔ shiɛmɔ lɛ kɛ hiɛnɔkamɔ ni ma shi shiŋŋ ni tsɔɔ shihilɛ kpakpa ni abaaná bianɛ kɛ wɔsɛɛ be mli hu lɛ haa. (1 Tim. 4:8) Yɛ be mli ni wɔyaa mɔ fɛɛ mɔ ŋɔɔ lɛ, jwɛŋmɔ ni ja ni wɔyɔɔ lɛ baaje kpo yɛ nɔ ni wɔkɛɔ lɛ mli ni ebaaye ebua gbɔmɛi koni amɛkpɛlɛ sanekpakpa lɛ nɔ. Yɛ be mli ni wɔsusuɔ nɔ ni wɔkɛɔ lɛ he kɛ bɔ ni wɔkɛɔ lɛ wɔhaa lɛ he jogbaŋŋ lɛ, nyɛhaa wɔkanyaa mɛi ni hiɛ tsui kpakpa lɛ koni amɛhere miishɛɛ sanekpakpa ni wɔshiɛɔ lɛ nɔ!