‘Mɛni Manyɛ Mafee?’
1 ‘Mɛni manyɛ mafee?’ Ŋwanejee ko bɛ he akɛ, sanebimɔ ni tamɔ nakai yɛ Biblia kasemɔ kuu fioo ko mli bii ní Charles Taze Russell to amɛhe gbɛjianɔ yɛ afi 1870 afii lɛ amli lɛ ajwɛŋmɔ mli. Beni nakai mra be mli Biblia kaselɔi lɛ nuɔ Nyɔŋmɔ suɔmɔnaa nii ashishi kɛyaa hiɛ lɛ, amɛsusu nɔ ni amɛbaanyɛ amɛfee ní amɛkɛye amɛbua mɛi krokomɛi koni amɛkase Nyɔŋmɔ yiŋtoi ahe nii lɛ he. Eka shi faŋŋ akɛ, Biblia mli nilee ni amɛnáa ni amɛkɛaaya je lɛŋ fɛɛ lɛ ji nitsumɔ ni da waa diɛŋtsɛ.
2 Eji miishɛɛ sane kɛha wɔ akɛ, amɛtsu nakai kaa lɛ he nii kɛmɔ shi. Yɛ mɛɛ gbɛ nɔ? Mɔ fɛɛ mɔ tsu egbɛfaŋnɔ ni tamɔ nɔ ko fioo lɛ he nii, ni no hewɔ lɛ, ŋmɛnɛ abale Yehowa Odasefoi yɛ je lɛŋ fɛɛ—gbɛjianɔtoo ni miihe ashɛ Maŋtsɛyeli jajelɔi akpe toi akpei ekpaa ni sɔmɔɔ yɛ asafoi aaashɛ 90,000 mli yɛ shikpɔji kɛ ŋshɔkpɔi 234 nɔ!—Yes. 60:22.
3 Okɛ Sɛɛfimɔ Babaoo Aha: Ehe miihia ni wɔteŋ mɔ fɛɛ mɔ aná nitsumɔ ni da waa diɛŋtsɛ ni Yesu gba efɔ̃ shi akɛ abaatsu yɛ naagbee gbii nɛɛ amli lɛ mli gbɛfaŋ nɔ. (Mar. 13:10) Eka shi faŋŋ akɛ anyɛŋ ashi nitsumɔ nɛɛ aha onukpai fioo ni yɔɔ lɛ pɛ; ni nakai nɔŋŋ hu shiɛmɔ nitsumɔ lɛ kãaa gbɛgbalɔi lɛ pɛ anɔ. Yɛ faŋŋ mli lɛ, Kristofonyo fɛɛ Kristofonyo yɛ gbɛfaŋnɔ ni he hiaa ni ebaatsu he nii. Wɔ fɛɛ wɔbaanyɛ wɔná shiɛmɔ nitsumɔ lɛ mli gbɛfaŋnɔ yɛ gbɛ ko nɔ. (1 Tim. 1:12) He fɛɛ he ni wɔɔfee enɛ kɛyashɛ lɛ, wɔ kɛ mɛi krokomɛi baaná he sɛɛ.—1 Tim. 4:16.
4 Mɔ fɛɛ mɔ hu baanyɛ ekɛ sɛɛfimɔ babaoo hu aha wɔ-Kristofoi anyɛmifeemɔ lɛ yɛ gbɛ̀i krokomɛi ni he hiaa anɔ. Wɔbaanyɛ wɔfĩ asafoŋ kpeei lɛ asɛɛ kɛtsɔ ya ni wɔɔya daa ní wɔkɛ wɔhe awo mli kɛ miishɛɛ lɛ nɔ. (Lala 122:1, 8, 9) Wɔbaanyɛ wɔtsu wɔgbɛfaŋnɔ koni wɔha asafo lɛ he atse yɛ jeŋba mli. Wɔbaanyɛ wɔkɛ shika afĩ jeŋ muu fɛɛ nitsumɔ lɛ sɛɛ bɔ ni wɔhewalɛ baanyɛ yɛ shika gbɛfaŋ. Wɔbaanyɛ wɔná Maŋtsɛyeli Asa lɛ nɔ falefalefeemɔ mli gbɛfaŋnɔ. Mɔ fɛɛ mɔ baanyɛ aha suɔmɔ kɛ ekomefeemɔ mumɔ ni miishɛɛ yɔɔ mli aya nɔ yɛ asafo lɛ mli kɛtsɔ mɛi heei, gbekɛbii, kɛ mɛi hu ni egbɔlɔ lɛ ayelikɛbuamɔ nɔ.—Kol. 3:12, 14.
5 No hewɔ lɛ ekolɛ obaabi akɛ, ‘Mɛni manyɛ mafee?’ Eyɛ mli akɛ ekolɛ mɔdɛŋ ni nyɛbɔɔ akɛ aŋkroaŋkroi lɛ baanyɛ afee bibioo moŋ, shi kɛ́ otsu ogbɛfaŋnɔ he nii lɛ, belɛ ootsu nii koni okɛha asafo lɛ afee nɔ ni mli wa, nɔ ni yɔɔ ekãa kɛ nɔ ni yɔɔ hewalɛ. No hewɔ lɛ wɔ fɛɛ wɔyɛ gbɛfaŋnɔ ni he hiaa ni wɔɔtsu he nii koni wɔkɛ woo aha Yehowa gbɛi lɛ!