Okɛ Nitsumɔi Kpakpai Awo Yehowa Hiɛ Nyam

¹ Kɛ oyaje he ko ni ahum miitswa waa yɛ jɛmɛ lɛ, kwɛ bɔ ni omii shɛɔ ohe kɛ́ onyɛ ona tsũ ko mli oyadamɔ! Kɛ emli yɛ kulɔkulɔ kɛ shweshweeshwe, ni mɛi ni yɔɔ mli lɛ here bo hiɛmɛɛ lɛ, onáa miishɛɛ akɛ ooohi jɛmɛ. Maŋtsɛyeli shiɛmɔ nitsumɔ lɛ kudɔɔ mɛi kɛjɛɔ Satan gbɛjianɔtoo lɛ mli kɛyaa tsũ ni tamɔ nakai mli. Ani wɔdaa gbi jeŋba baanyɛ eye ebua mɛi krokomɛi koni amɛna bɔ ni abobaahe ni yɔɔ shweshweeshwe nɛɛ mli ŋɔɔ ha? Hɛɛ, ejaakɛ Yesu kɛɛ akɛ gbɔmɛi ‘baana wɔnifeemɔnii kpakpai lɛ, ni amɛbaawo wɔtsɛ ni yɔɔ ŋwɛi lɛ hiɛ nyam.’—Mat. 5:16.

² Te esa akɛ wɔba wɔjeŋ wɔha tɛŋŋ koni wɔnifeemɔi lɛ agbala mɛi krokomɛi kɛba Yehowa ŋɔɔ kɛ egbɛjianɔtoo lɛ mli? Kɛtsɔ Yesu wiemɔi ni aŋma yɛ Luka 6:31 kɛ 10:27 lɛ ni wɔɔha ekudɔ wɔshihilɛ daa gbi lɛ nɔ. Enɛ baakanya wɔ koni wɔjie suɔmɔ ni akɛsusuɔ mɔ he lɛ kpo wɔtsɔɔ nanemɛi adesai, ni ana srɔtofeemɔ ni yɔɔ wɔ kɛ je lɛŋ bii ni nɔ ko nɔ ko jeee amɛhe sane ko, ní amɛsusuuu mɔ he nɛɛ teŋ.

³ Nyɛmi yoo ko ni ta lɛlɛ ni akɛfoɔ faa mli lɛ na akɛ nu hiɛ gbɛfaa eha hela emɔ oblayoo ko waa ni enyɛɛɛ ekwɛ ebi bibioo ni ekɛnyiɛ lɛ. Nyɛmi yoo lɛ kɛ ehe ha akɛ ebaakwɛ gbekɛ lɛ. Beni yoo lɛ bi lɛ bɔ ni eeefee ejie hiɛsɔɔ kpo etsɔɔ nɔ ni efee lɛ, nyɛmi yoo lɛ kɛɛ lɛ akɛ: ‘Ofainɛ kɛ́ Yehowa Odasefoi ba oŋɔɔ be kroko lɛ, bo amɛ toi.’ Yoo lɛ fee nakai, ni amrɔ nɛɛ, lɛ kɛ ewu fɛɛ ebatsɔmɔ Odasefoi. Nitsumɔi kpakpai lɛ ji nɔ ni ha amɛbo Maŋtsɛyeli shɛɛ sane lɛ toi.

⁴ Wɔwala Fɛɛ Fata He: Wɔjeŋba yɛ akutso ni wɔyɔɔ mli lɛ mli, beni wɔyɔɔ nitsumɔ aloo skul, kɛ beni wɔjieɔ wɔhiɛtserɛ lɛ haa mɛi krokomɛi náa yiŋsusumɔ ko yɛ wɔ kɛ wɔ jamɔ lɛ he. Enɛ hewɔ lɛ, ehi akɛ wɔɔbi wɔhe akɛ: ‘Te mɛi krokomɛi naa mi kɛ miweku lɛ tɛŋŋ? Ani akutsoŋbii lɛ naa wɔshia kɛ wɔkpoteŋ akɛ emli tse ni eyɛ falefale? Ani wɔnanemɛi nitsulɔi kɛ nanemɛi skulbii naa akɛ wɔbaa mra, ni wɔtsuɔ nii jogbaŋŋ? Ani mɛi krokomɛi naa wɔhesaamɔ akɛ nɔ ni hi ni bulɛ yɔɔ he?’ Wɔnitsumɔi kpakpai lɛ baanyɛ eha jamɔ ni wɔkɛhaa Yehowa lɛ asa mɛi krokomɛi ahiɛ waa.

⁵ Petro bɔ Kristofoi lɛ kɔkɔ akɛ abaaye amɛhe fɛo. (1 Pet. 4:4) Esa akɛ wɔná nɔmimaa akɛ jeee wɔjeŋba hewɔ awieɔ wɔhe yɛ gbɛ ni ejaaa nɔ lɛ. (1 Pet. 2:12) Kɛ wɔdaa gbi nifeemɔi woɔ Nyɔŋmɔ ni wɔjáa lɛ lɛ hiɛ nyam lɛ, no lɛ, wɔbaafee tamɔ kanei ni akɛma he ko ni kwɔ, ni ebaagbala mɛi krokomɛi kɛbote tsũ ni yɔɔ shweshweeshwe ni Yehowa kɛhaa lɛ mli.—Mat. 5:14-16.