Bɔ ni Aaafee Atsɔ̃ Mɛi Krokomɛi Ayiŋ
1 Abuɔ bɔfo Paulo akɛ eji sɔɔlɔ ni tsɔ̃ɔ mɛi ayiŋ. (Bɔf. 19:26) Maŋtsɛ Agripa po kɛɛ lɛ akɛ: “Shwɛ fioo ni oha miyiŋ atsɔ̃ ni matsɔ Kristofonyo.” (Bɔf. 26:28) Mɛni ha Paulo le mɔ yiŋtsɔ̃mɔ waa yɛ esɔɔmɔ nitsumɔ lɛ mli nakai lɛ? Ekɛ mɛi susuɔ Ŋmalɛi lɛ ahe yɛ nilee mli, ni etsakeɔ saji ni ekɛtsɔ̃ɔ mɔ yiŋ lɛ mli koni ekɔ etoibolɔi lɛ ashihilɛ he.—Bɔf. 28:23.
2 Bɔni afee ni wɔkase Paulo lɛ, ehe miihia ni wɔ hu wɔtsɔ̃ mɛi ayiŋ yɛ wɔsɔɔmɔ nitsumɔ lɛ mli. Yɛ mɛɛ gbɛ nɔ? Kɛtsɔ ŋaalee ni wɔkɛaatsu nii yɛ be mli ni wɔmiiwie aloo wɔmiibo mɛi krokomɛi atoi lɛ nɔ. (Abɛi 16:23) Gbɛ̀i etɛ ni he hiaa waa baaye ebua wɔ koni wɔfee nakai.
3 Bó Sane Toi Jogbaŋŋ: Bó toi beni mɔ kroko lɛ wieɔ lɛ, ni okwɛ he ni okɛ lɛ kpãa gbee yɛ ni sanegbaa lɛ baadamɔ nɔ. Kɛ ete shi ewo sane ko lɛ, bɔɔ mɔdɛŋ ni ole nɔ hewɔ ni efee nakai. No baaye ebua bo koni ole nɔ diɛŋtsɛ ni eheɔ eyeɔ, nɔ hewɔ ni eheɔ eyeɔ, kɛ nɔ ni ha ehe eye. (Abɛi 18:13) Okɛ ŋaalee atsu nii ni okɛle enɛɛmɛi kɛjɛ eŋɔɔ.
4 Bi Saji: Kɛ mɔ ko tsɔɔ akɛ eheɔ Triniti lɛ eyeɔ lɛ, obaanyɛ obi lɛ akɛ: “Ani oheɔ Triniti lɛ oyeɔ be fɛɛ be?” Okɛfata he akɛ: “Ani otao mli jogbaŋŋ yɛ Biblia lɛ mli okwɛ nɔ ni eyɔɔ kɛɛmɔ yɛ sane nɛɛ he?” Obaanyɛ obi hu akɛ: “Kɛ Nyɔŋmɔ ji Triniti fã ko lɛ, kulɛ ani wɔkpaaa gbɛ akɛ Biblia lɛ baatsĩ enɛ tã faŋŋ?” Hetooi ni akɛbaaha bo lɛ baaye ebua bo koni okɛ mɔ lɛ asusu nɔ ni Ŋmalɛi lɛ yɔɔ kɛɛmɔ lɛ he.
5 Okɛ Lɛ Asusu Nii Ahe yɛ Gbɛ ni Ja Nɔ: Odasefonyo ko bi yoo ko ni heɔ eyeɔ akɛ Yesu ji Nyɔŋmɔ lɛ akɛ: ‘Kɛ ootao otsɔɔ akɛ mɛi enyɔ ji gbɔmɛi kome lɛ, mɛɛ wekukpaa obaakɛɛ akɛ ekã amɛteŋ?’ Eha hetoo akɛ: “Makɛɛ akɛ nyɛmimɛi hii enyɔ ji amɛ.” Ekɛfata he akɛ: “Ekolɛ amɛji haaji ni je amɛhe waa. Shi yɛ be mli ni Yesu tsɔɔ wɔ akɛ Nyɔŋmɔ ji Tsɛ lɛ ni lɛ diɛŋtsɛ ji Bi lɛ, mɛni etaoɔ ekɛɛ wɔ lɛ?” Yoo lɛ nu oti lɛ shishi akɛ mɔ kome ye mɔ kroko lɛ onukpa ni eyɛ hewalɛ babaoo hu fe lɛ. (Mat. 20:23; Yoh. 14:28; 20:17) Atsɔ yiŋtsɔ̃mɔ nɔ, ni ashɛ etsui kɛ ejwɛŋmɔ he.
6 Eji anɔkwale akɛ jeee mɔ fɛɛ mɔ sumɔɔ anɔkwale lɛ, ekɔɔɔ he eko bɔ ni aaatsɔ nilee kɛ gbɛ ni ja nɔ akɛ sane lɛ aha amɛ. Shi taakɛ Paulo ji lɛ, nyɛhaa wɔkɛ mɔdɛŋbɔɔ ataoa mɛi ni hiɛ tsui krɔŋŋ yɛ wɔshikpɔŋkuku lɛ mli lɛ, ni wɔkɛ yiŋtsɔ̃mɔ aha amɛkpɛlɛ Maŋtsɛyeli shɛɛ sane lɛ nɔ.—Bɔf. 19:8.