“Nyɔŋmɔ Gbɛfaŋ lɛ Aaanyɛ Nii Fɛɛ Afee”
1 Kristofoi asafo lɛ nitsumɔ titri ji ni eshiɛ Maŋtsɛyeli sanekpakpa lɛ yɛ jeŋ fɛɛ. (Mat. 24:14) Eji nitsumɔ kpele diɛŋtsɛ. Yɛ mɛi ni kwɛɔ lɛ ateŋ mɛi pii agbɛfaŋ lɛ, etamɔ nɔ ni ebaabi nibii ni fa kwraa fe nɔ ni wɔyɔɔ lɛ. Kɛha mɛi krokomɛi lɛ, nitsumɔ nɛɛ ni aaatsu he nii lɛ miihe afee tamɔ nɔ ni nyɛŋ aba mli ejaakɛ wɔyɛ hefɛoyeli, shitee-kɛ-woo, kɛ yiwaa shishi. (Mat. 24:9; 2 Tim. 3:12) Ŋwanejelɔi yɛ nɔmimaa akɛ anyɛŋ atsu nitsumɔ nɛɛ he nii. Shi kɛlɛ, Yesu kɛɛ akɛ: “Nyɔŋmɔ gbɛfaŋ lɛ aaanyɛ nii fɛɛ afee.”—Mat. 19:26.
2 Nɔkwɛmɔnii Kpakpai ni Sa akɛ Wɔkase: Yesu je esɔɔmɔ nitsumɔ lɛ shishi akɛ nuu kome ni teɔ shi woɔ je lɛ. Bɔni afee ni shitee-kɛ-wolɔi atsĩ enaa koni ekaye omanye lɛ, amɛkɛ heguɔgbee fɛɛ heguɔgbee ni aaanyɛ aba jwɛŋmɔ mli lɛ ba enɔ, naagbee mli lɛ amɛkɛ gbele yɛ piŋmɔ mli ba enɔ. Ni kɛlɛ, yɛ naagbee lɛ, Yesu jaje kɛ nɔmimaa akɛ: “Miye je lɛ nɔ kunim.” (Yoh. 16:33) Eji nifeemɔ ko ni yɔɔ naakpɛɛ lɛɛlɛŋ!
3 Yesu kaselɔi lɛ jie gbeyeishemɔ ni bɛ kɛ ekãa mumɔ ni tamɔ no nɔŋŋ kpo yɛ Kristofoi asɔɔmɔ nitsumɔ lɛ mli. Ayi amɛteŋ mɛi pii kplebii, awa amɛyi, awo amɛ tsuŋ, ni agbe amɛ tete po. Ni kɛlɛ, amɛná ‘miishɛɛ akɛ egbɛi lɛ ahewɔ lɛ abu amɛ mɛi ni sa akɛ abɔɔ amɛ ahora.’ (Bɔf. 5:41) Yɛ shi ni ateɔ awoɔ amɛ lɛ fɛɛ mli lɛ, amɛtsu nitsumɔ ko ni tamɔ nɔ ni anyɛŋ atsu ni ji sanekpakpa lɛ shiɛmɔ “kɛyashi shikpɔŋ lɛ naagbeehei lɛ.”—Bɔf. 1:8; Kol. 1:23.
4 Bɔ ni Wɔɔfee Wɔye Omanye yɛ Wɔgbii Nɛɛ Amli: Wɔ hu wɔkɛ ekãa miitsu Maŋtsɛyeli shiɛmɔ nitsumɔ lɛ yɛ shitee-kɛ-woo shihilɛi ni tamɔ nɔ ni haŋ anyɛ atsu he nii lɛ fɛɛ sɛɛ. Yɛ naatsii, yiwaa, tsuŋwoo, kɛ basabasafeemɔi krokomɛi ni akɛtsu nii koni akɛtsĩ wɔnaa lɛ fɛɛ sɛɛ lɛ, wɔmiiye omanye. Mɛɛ gbɛ nɔ enɛ baa lɛ nakai yɛ? “Jeee nyɛmɔ naa lɛ, jeee hewalɛ naa, shi Mimumɔ lɛ naa! Yehowa Zebaot kɛɛ.” (Zak. 4:6) Akɛni Yehowa yɔɔ wɔ sɛɛ nɛɛ, nɔ ko nɔ ko nyɛŋ atsĩ wɔnitsumɔ lɛ naa!—Rom. 8:31.
5 Kɛji wɔmiishiɛ lɛ, wɔbɛ yiŋtoo ko ni wɔɔdamɔ nɔ wɔshe gbeyei loo ni wɔbaanu he akɛ wɔshɛɛɛ. (2 Kor. 2:16, 17) Wɔyɛ yiŋtoo ni fe fɛɛ ni wɔɔdamɔ nɔ wɔya hiɛ yɛ Maŋtsɛyeli sanekpakpa lɛ gbɛɛ-kɛ-shwamɔ mli. Kɛtsɔ Yehowa yelikɛbuamɔ nɔ lɛ, wɔbaagbe nɔ ni ‘anyɛɛɛ atsu’ lɛ naa!—Luka 18:27.