Gbɛjianɔ ni Aaato Kɛtsɔ Hiɛ—Kɛha Mɛni?
1 Wɔ fɛɛ wɔsusuɔ wɔgbɛjianɔtoo kɛha wɔsɛɛ lɛ he. Mɛi ni yɔɔ shikpɔŋ nɔ hiɛnɔkamɔ lɛ miikpa gbɛ akɛ amɛaahi shi kɛya naanɔ yɛ Nyɔŋmɔ jalɛ jeŋ hee lɛ mli. Shi nibii komɛi yɛ ni náa mɔ nɔ hewalɛ ni baanyɛ ashɔ nakai hiɛnɔkamɔ lɛ kɛjɛ mɔ tsuiŋ kɛya. Ebiɔ mɔdɛŋbɔɔ diɛŋtsɛ koni wɔya nɔ wɔtswa wɔshihilɛ kɛbɔle Nyɔŋmɔ Maŋtsɛyeli lɛ he nibii lɛ ahe koni heloo lɛ sɛɛdii nibii ni kaa mɔ lɛ akalaka wɔ.—1 Yoh. 2:15-17.
2 Je lɛ nyɛŋ anu nibii ni gbɔmɛi ni haa amɛjwɛŋmɔ hiɔ mumɔŋ nibii anɔ lɛ sumɔɔ lɛ ashishi kɔkɔɔkɔ. (1 Kor. 2:14) Yɛ be mli ni adesai krokomɛi miaa amɛhiɛ koni amɛná gbɛi, hewalɛ, loo ninamɔ lɛ, wɔ lɛ wɔdiɔ mumɔŋ jwetrii asɛɛ. (Mat. 6:19-21) Kɛji wɔbɔ mɔdɛŋ koni wɔjaje wɔsusumɔi ni ekɛ bɔ ni je lɛ susuɔ wɔsɛɛ be he ehaa lɛ akpã gbee lɛ, ani wɔbaanyɛ wɔshɛ wɔmumɔŋ otii lɛ ahe? Etsɛŋ ni je lɛŋ nibii baahe wɔtsuii fɛɛ. Mɛɛ gbɛ nɔ wɔɔtsɔ wɔtsĩ enɛ naa?
3 “Nyɛwoa Nuntsɔ Yesu Kristo”: Gbɛ kome ni wɔkɛaana kɛji wɔmiitswa wɔ wɔsɛɛ shihilɛ kɛmiibɔle Maŋtsɛyeli lɛ he nibii ahe ji ni wɔpɛi wɔ sanegbaa mli wɔkwɛ. Ani be fɛɛ be lɛ wɔmiiwie heloonaa nibii kɛ je lɛŋ sɛɛnamɔi ahe? Kɛji nakai eji lɛ, esa akɛ wɔsusu he wɔkwɛ akɛ wɔtsui miiŋmɛɛ mumɔŋ sui ni ejwɛŋɔ nɔ lɛ ahe lo. Ekolɛ ehe baahia ni wɔkɛ nɔmimaa ‘awo Nuntsɔ Yesu Kristo moŋ fe ni wɔbaaha heloo lɛ nɔjwɛŋmɔ lɛ atsɔ heloo lɛ sɛɛdii.’—Rom. 13:14.
4 Oblahii kɛ oblayei baanyɛ ‘awo Kristo’ kɛtsɔ gbɛjianɔ ni amɛaato kɛtsɔ hiɛ kɛha gbi ni amɛkɛ amɛhe aaawo be-fɛɛ sɔɔmɔ lɛ mli. Atsɔse oblanyo ko ni miitao ni ekɛ ehe awo daa gbɛgbamɔ nitsumɔ lɛ mli lɛ yɛ hiŋmɛigbelemɔ ko ni kusum nifeemɔ ni yɔɔ jɛmɛ ji ni oblahii abatsɔmɔ mɛi ni yɔɔ shweshweeshwe yɛ shika gbɛfaŋ. No hewɔ lɛ, ekɛ ehe wo jarayeli nitsumɔ mli vii aahu kɛyashɛ he ko akɛ ekɛ ehe woɔ kpeeiyaa kɛ sɔɔmɔ nitsumɔ lɛ mli kɛkɛ akɛ mɔ ni bɛ he miishɛɛ. Be ko lɛ eje shishi ená hekɛnɔfɔɔ yɛ Yesu wiemɔi ni anaa yɛ Mateo 6:33 lɛ mli ni ekpa nitsumɔ ni heɔ mɔ be fɛɛ ni sɛɛnamɔ bɛ he ni etsuɔ lɛ, ni ekɛ ehe wo be-fɛɛ sɔɔmɔ nitsumɔ lɛ mli. Taakɛ ewie lɛ, amrɔ nɛɛ ekɛ henilee kpakpa miisɔmɔ Yehowa ‘kɛ enyɛmɔ fɛɛ.’
5 Biblia lɛ kɛɔ akɛ nilee yɛ mli akɛ abaato gbɛjianɔ kɛha wɔsɛɛ. (Abɛi 21:5) Eba akɛ wɔ fɛɛ wɔɔfee nakai be mli ni wɔkɛ Nyɔŋmɔ suɔmɔnaa nii yeɔ klɛŋklɛŋ gbɛhe yɛ wɔjwɛŋmɔ mli lɛ.—Efe. 5:15-17.