Shɛ́ Onikaselɔ lɛ Tsui He
1 Dani Yesu baakwɔ kɛya ŋwɛi lɛ, ekɛɛ ekaselɔi lɛ ní amɛtsɔɔ mɛi krokomɛi ní “amɛye” nii fiaa ni efã amɛ lɛ “nɔ.” (Mat. 28:19, 20) Kɛ́ mɔ ko ‘baaye’ Kristo famɔi lɛ anɔ lɛ, no lɛ esa akɛ saji lɛ ashɛ etsui he. (Lala 119:112) Te ooofee tɛŋŋ okanya mɔ ko ní okɛkaseɔ Biblia lɛ tsui?
2 Sɔlemɔ Obi Yehowa Gbɛtsɔɔmɔ: Kaselɔfeemɔ ji Nyɔŋmɔ nitsumɔ. Ejɔɔmɔi ahe miihia waa kɛha omanyeyeli, shi jeee wɔnyɛmɔi. (Bɔf. 16:14; 1 Kor. 3:7) No hewɔ lɛ, sɔlemɔ ní wɔɔsɔle wɔbi Yehowa yelikɛbuamɔ ní wɔkɛtsɔɔ mɛi krokomɛi anɔkwale lɛ he miihia.—Yes. 50:4.
3 Lé Nɔ ni Nikaselɔ lɛ Heɔ Eyeɔ: Lé ní wɔɔle nɔ ni gbɔmɛi heɔ amɛyeɔ kɛ nɔ hewɔ ni amɛheɔ amɛyeɔ lɛ baanyɛ aha wɔle nɔ ni wɔbaakɛɛ koni wɔkɛshɛ amɛtsui he. Mɛni hewɔ nikaselɔ ko náa tsɔɔmɔ pɔtɛɛ ko he miishɛɛ lɛ? Mɛni ha ená nɔmimaa akɛ esa akɛ ehe eye lɛ? Nakai nilee lɛ baanyɛ aye abua wɔ koni wɔkɛ sɛɛyoomɔ awie.—Bɔf. 17:22, 23.
4 Okɛ Sane Naatsɔɔmɔ He Ŋaa kɛ Sane Naataamɔ ni Jɛ Ŋmalɛ Mli Atsu Nii: Esa akɛ shishinumɔ ahi anɔkwale lɛ mli kɛha nikaselɔ lɛ. (Bɔf. 17:24-31) Esa akɛ wɔkɛ hiɛnɔkamɔ ni wɔyɔɔ lɛ he yiŋtoo kpakpa aha. (1 Pet. 3:15) Shi kɛlɛ, feemɔ enɛ yɛ mlihilɛ kɛ tsuishitoo mli be fɛɛ be.
5 Okɛ Nɔkwɛmɔnii Awaje Lɛ: Nɔkwɛmɔnii haaa efee mlɛo kɛha nikaselɔ lɛ akɛ eeenu nibii ashishi kɛkɛ shi moŋ, amɛkanyaa ehenumɔi hu. Amɛnáa jwɛŋmɔ lɛ kɛ tsui lɛ fɛɛ nɔ hewalɛ. Yesu kɛtsu nii shii abɔ. (Mar. 4:33, 34) Eji anɔkwale akɛ, bɔni afee ni nɔkwɛmɔnɔ lɛ amɔ shi lɛ, ehe miihia ni ekɛ nitsumɔ lɛ asa oti ni asusuɔ he lɛ he, ni esa akɛ ekɔ nikaselɔ lɛ shihilɛ he.
6 Tsɔɔmɔ Sɛɛnamɔi ni Yɔɔ Anɔkwale lɛ ní Aboɔ Toi lɛ Mli: Gbɔmɛi miisumɔ ni amɛle sɛɛnamɔi ni yɔɔ nɔ ni amɛkaseɔ lɛ kɛ nitsumɔ mli. Ye obua onikaselɔ lɛ koni ena nilee ni yɔɔ Paulo wiemɔi ni yɔɔ 2 Timoteo 3:14-17 lɛ mli lɛ mli.
7 Kɛ́ mɛi komɛi booo onitsɔɔmɔ lɛ toi lɛ, kaaha onijiaŋ miije wui. Jeee mɛi fɛɛ hiɛ toiboo tsui. (Mat. 13:15) Shi kɛlɛ, aŋkroaŋkroi komɛi batsɔmɔɔ heyelilɔi. (Bɔf. 17:32-34) Eba akɛ mɔdɛŋ ni wɔbɔɔ koni wɔkɛ sanekpakpa lɛ ashɛ mɛi babaoo atsui he lɛ baaye abua amɛ koni amɛkpɛlɛ nɔ ni Yesu efã lɛ nɔ, ní “amɛye . . . nɔ.”