“Midamɔ Shi Shiŋŋ! Midamɔ Shi Shiŋŋ! Midamɔ Shi Shiŋŋ!”
1 Anɔkwa Kristofonyo ko ní je Mɛi Ahiɛkpatamɔ lɛ mli lɛ wiemɔi nɛɛ tsɔɔ bɔ ni Odasefoi akpei abɔ—ní yɔɔ shihilɛ mli kɛ mɛi ni egboi—lɛ afaishitswaa ji lɛ mli, mɛi ni ye amɛhemɔkɛyelii lɛ amli anɔkwa yɛ Nazi niseniianiifeemɔ lɛ fɛɛ sɛɛ lɛ. (Efe. 6:11, 13) Awieɔ amɛsane ni taa mɔ tsuiŋ ni tsɔɔ ekãa kɛ kunim ni amɛye lɛ he yɛ vidio ni kanyaa mɔ tsui, ni ji Jehovah’s Witnesses Stand Firm Against Nazi Assault (Yehowa Odasefoi Damɔ Shi Shiŋŋ yɛ Nazi Tutuamɔ Shishi) lɛ mli. Aawo mɛi fɛɛ ni yɔɔ asafo lɛ mli lɛ hewalɛ koni amɛkwɛ ni amɛgba amɛsusumɔi kɛ henumɔi lɛ ahe sane amɛtsɔɔ amɛhe.
2 Nyɛhaa sanebimɔi nɛɛ akanyaa nyɛsusumɔi: (1) Mɛɛ yiŋtoi ahewɔ Yehowa Odasefoi kɔ shidaamɔ ni yɔɔ shiŋŋ amɛshi Nazibii lɛ? (2a) Mɛɛ susumɔi ni teɔ shi woɔ amɛhe te shi yɛ ŋamɔ ko hewɔ, ni mɛni hewɔ? (2b) Te enɛ sa Odasefoi awekui ahe eha tɛŋŋ? (3) Odasefoi enyiɛ akɛyawo yiwalɛ nsrai amli, te akadi amɛ aha tɛŋŋ, ni te Gestapobii lɛ kɛ amɛ ye ha tɛŋŋ? (4) Mɛni wɔnyɛmimɛi lɛ sumɔɔɔ ni amɛkɛshãa afɔle ni amɛkɛheɔ amɛheyeli? (5a) Mɛɛ gbɛ nɔ Yehowa Odasefoi wie amɛshi niseniianii ni Hitler nɔyeli lɛ feɔ lɛ, ni mɛɛ be? (5b) Te Hitler fee enii yɛ he tɛŋŋ? (6) Mɛɛ gbɛ nɔ ekome ni Yehowa webii fee lɛ fee yibaamɔ kɛha amɛ kɛ mɛi krokomɛi, yɛ gbɔmɔtsoŋ kɛ mumɔŋ? (7) Mɛɛ Maŋtsɛyeli lala afo yɛ yiwalɛ nsra lɛ mli? (8) Mɛɛ hii, yei kɛ oblahii kɛ oblayei anɔkwafoi anɔkwɛmɔnii kpakpai kanyaa bo koni ohiɛ ohemɔkɛyeli lɛ mli oha Yehowa, ní ekɔɔɔ he eko nɔ ni baaba? (Kwɛmɔ 1999 Yearbook lɛ hu, baafai 144-147.) (9) Ákɛ Yehowa Odasefoi ateŋ mɔ kome lɛ, te vidio nɛɛ haa onuɔ he ohaa tɛŋŋ yɛ je lɛ fã ni ojeee lɛ he?
3 Yehowa Odasefoi anɔkwɛmɔnɔ kpakpa ni ajie yɛ Stand Firm vidio lɛ mli lɛ baanyɛ aye abua oblahii kɛ oblayei, kɛ mɛi ni jeee Odasefoi lɛ po koni amɛkpee saji ni he hiaa tamɔ mɛi ahe tsui ní anaaa, tipɛŋfoi anɔnyɛɛ, kɛ henilee naa. Kɛ́ oji oblanyo loo oblayoo ní miiya nɔtsamɔ skul lɛ, ani obaanyɛ oha otsɔɔlɔi lɛ hegbɛ koni amɛkɛ saji nɛɛ atsɔɔ nii yɛ klas lɛ? Ekolɛ obaanyɛ okɛ vidio lɛ eko aha amɛ ni otsɔɔ akɛ eji yinɔsane mli sane ko ni ale, loo sane ni awie he ni kɔɔ jeŋba kpakpa he.
4 Stand Firm vidio lɛ ji dɛŋdade ko ni hi fe fɛɛ ni akɛaatsɔɔ bɔ ni ŋwɛi nitsɔɔmɔ haa wɔ mumɔŋ hewalɛ koni wɔkɛsa Nyɔŋmɔ hiɛ kɛtsɔ shi ni wɔɔdamɔ shiŋŋ kɛha nɔ ni ja lɛ nɔ. (1 Kor. 16:13) Gbaa mɛi fɛɛ ni yɔɔ anɔkwale lɛ he miishɛɛ lɛ.