Ani Nyɛ Asafo lɛ Yɛ Shikpɔŋkuku ni Da?
1 Kɛjɛ maŋtiasei ni yɔɔ Yudea kɛtee Galilea akrowai lɛ amli lɛ, Yesu ye odase kɛmɔ shi yɛ blema Israel shikpɔŋ ni da lɛ mli. (Mar. 1:38, 39; Luka 23:5) Wɔ hu esa akɛ wɔgba mɛi babaoo sanekpakpa lɛ bɔ ni wɔɔnyɛ. (Mar. 13:10) Shi kɛlɛ, enɛ baanyɛ afee nitsumɔ ni wa. Mɛni hewɔ?
2 Asafoi babaoo ni yɔɔ Ghana lɛ ashikpɔŋkuku lɛ yɛ akrowai titri, ni efeɔ kilomitai babaoo. Asafoi ni wieɔ maŋsɛɛ wiemɔi baanyɛ atsu nii yɛ hei ni mɛi babaoo yɔɔ, ni amɛtao gbɔmɛi ni wieɔ amɛwiemɔ lɛ. Mɛni wɔbaanyɛ wɔfee ni wɔkɛye wɔbua mɛi ni yɔɔ shikpɔŋkukuji ni lɛɛ nɛɛ nɔ koni amɛkase anɔkwale ni kɔɔ Yehowa, Yesu, kɛ Maŋtsɛyeli lɛ he lɛ?
3 Too Gbɛjianɔ Jogbaŋŋ: Ehe miihia ni shiɛmɔ nitsumɔ nɔkwɛlɔ lɛ kɛ sɔɔlɔ ni kwɛɔ shikpɔŋkuku nɔ lɛ akwɛ mɔdɛŋ ni asafo lɛ bɔɔ koni etsu nɔ ni hi fe fɛɛ lɛ he nii lɛ jogbaŋŋ. Ekolɛ, abaanyɛ ato gbɛjianɔ krɛdɛɛ kɛha Hɔɔ, be mli ni mɛi babaoo baanyɛ amɛkɛ be babaoo atsu nii lɛ. Kɛ́ ootsu nii yɛ shikpɔŋkukuji ni yɔɔ shɔŋŋ nɔ lɛ, too gbɛjianɔ ni osɛɛ atsɛ yɛ shiɛmɔ nitsumɔ lɛ mli kɛ́ eeehi, ni okɛ niyenii ni obaaye shwane aya. Nyɛbaanyɛ nyɛkpe mra fe bɔ ni nyɛfɔɔ feemɔ lɛ kɛha shiɛmɔ nitsumɔ lɛ loo nyɛyakpe yɛ he ni nyɛbaatsu nii yɛ lɛ. Kaaha shiɛlɔi ni yɔɔ tsɔne mli lɛ miifa tsɔ bɔni afee ni mɔ fɛɛ mɔ aná shiai bɔ ni sa ni etsu mli nii. Too gbɛjianɔ ni nyɛyatsu nii yɛ akrowai amli yɛ be ni kɔɔyɔŋ tsakemɔ kɛ bɔ ni gbɛjegbɛ lɛ nɔ yɔɔ lɛ baafee nɔ ni hi jogbaŋŋ.
4 Mɛi ni tsuɔ nii yɛ shikpɔŋkukuji ni awieɔ maŋsɛɛ wiemɔ yɛ mli lɛ baanyɛ abaa be ni jara wa yi kɛtsɔ gbɛi kɛ adrɛs ni yɔɔ ebe naa lɛ ní amɛaahiɛ kɛ shikpɔŋ he mfoniri lɛ nɔ. Too shikpɔŋkukuji lɛ ahe gbɛjianɔ bɔni afee ni shiɛlɔi akuu lɛ anyɛ aya mɛi ni aŋmala amɛ adrɛs lɛ fɛɛ aŋɔɔ.
5 Nyɛkwɛa koni nyɛhiɛa woji ni fa bɔ ni sa kɛya. Kɛ́ afɔɔɔ shikpɔŋkuku lɛ mli nitsumɔ lɛ, no lɛ ebaafee nɔ ni hi jogbaŋŋ akɛ oooshi dɛhiɛmɔ wolo ko loo wolo tɛtrɛɛ ni etsɛ lɛ oha mɛi ni bɛ shia lɛ. Kɛ́ Ani Obaasumɔ ni Ole Biblia lɛ Mli Saji Babaoo? dɛhiɛmɔ wolo lɛ eko yɛ nyɛwiemɔ mli lɛ, no lɛ nyɛkɛhaa mɔ fɛɛ mɔ ni nyɛkɛbaakpe lɛ, ni nyɛshia eko yɛ shiai ni mɛi bɛ lɛ.
6 Nyɛfea Ekome Kɛmɔa Shi: Ebiɔ ekomefeemɔ yɛ mɔ fɛɛ mɔ ni yɔɔ asafo lɛ mli lɛ gbɛfaŋ dani anyɛ atsu shikpɔŋkuku agbo ko mli nii. Kɛ́ ehe bahia ni akɛ nyɛmi ko kar aya he ko shɔŋŋ lɛ, no lɛ esa akɛ mɛi ni yaa lɛ afee ekome kɛwo mu ni abaahe awo mli lɛ he nyɔmɔ. Kɛ́ nyɛna akɛ shiatsɛmɛi lɛ yɛ he miishɛɛ akɛ amɛaawie lɛ, no lɛ sɛɛyoomɔ kpakpa he miihia. Ha bɔ ni ehe hiaa ni onine ashɛ mɛi fɛɛ ni yɔɔ shikpɔŋkuku lɛ mli lɛ nɔ lɛ ahi ojwɛŋmɔ mli, ni osusu shiɛlɔi krokomɛi ni mɛɔ bo yɛ kar lɛ mli lɛ hu he. Kɛ́ oosumɔ ni okɛ mɔ ko ni yɔɔ wiemɔ lɛ he miishɛɛ lɛ agba sane be saŋŋ lɛ, no lɛ ani abaanyɛ ato gbɛjianɔ bɔni afee ni akaha kuu lɛ mli bii krokomɛi ni eshwɛ lɛ miimɛ bo?
7 Too gbɛjianɔ koni oku osɛɛ ni oyasara mɛi fɛɛ ni yɔɔ he miishɛɛ ekoŋŋ. Yɛ adrɛs lɛ sɛɛ lɛ, bɔɔ mɔdɛŋ koni onine ashɛ mɔ ni yɔɔ he miishɛɛ lɛ tɛlifoŋ nɔmba nɔ bɔni afee ni onyɛ otsɔ tɛlifoŋ nɔ ni okɛye lɛ odase babaoo. Kɛ́ gbɛjegbɛi ni yɔɔ akrowa lɛ mli lɛ bɛ gbɛi loo ahako amɛ nɔmba lɛ, no lɛ bɔɔ mɔdɛŋ ni otɛŋ mfoniri loo oŋma nɔ ko bɔ ni obaanyɛ ona mɔ ko ni yɔɔ he miishɛɛ lɛ yɛ be mli ni oku osɛɛ.
8 Mɛɛ hegbɛ po wɔná akɛ wɔɔtsu Yesu famɔi nɛɛ ahe nii nɛkɛ, akɛ: “Shi maŋ fɛɛ maŋ aloo akrowa fɛɛ akrowa mli ni nyɛaatee lɛ, nyɛbia mɔ ni sa shi yɛ jɛi”! (Mat. 10:11) Eji anɔkwale akɛ Yehowa baajɔɔ nyɛ mɔdɛŋbɔi lɛ anɔ yɛ be mli ni nyɛkɛ nyɛhe haa yɛ nɛkɛ nitsumɔ ni nyɔmɔwoo kpele yɔɔ mli nɛɛ mli lɛ!