Kpokpaa Nɔ Kpee He Gbɛjianɔtoo Hee

Wɔle akɛ Yehowa Nyɔŋmɔ sa suɔmɔ ni wɔɔná wɔha lɛ kɛ hetuu-kɛhamɔ ni wɔkɛaaha ekome too. Shi kɛlɛ, je lɛ sumɔɔ ni elaka wɔ koni etsi wɔ kɛjɛ wɔkɛ lɛ teŋ wekukpaa ni bɛŋkɛ kpaakpa ni wɔɔhiɛ mli lɛ he. (Yoh. 17:14) Bɔni afee ni suɔmɔ ni wɔyɔɔ kɛha Yehowa lɛ mli awa koni ewaje wɔ ni wɔtsi wɔhe kɛjɛ je lɛŋ nibii ni kɛ oshara baa wɔ mumɔŋ shidaamɔ lɛ nɔ lɛ he lɛ, kpokpaa nɔ kpee he gbɛjianɔtoo hee kɛha afi 2001 sɔɔmɔ afi lɛ saneyitso baafee “Ná Suɔmɔ Oha Nyɔŋmɔ—Jeee Nibii ni Yɔɔ Je Lɛŋ.”—1 Yoh. 2:15-17.

Suɔmɔ ni mli wa ni wɔyɔɔ kɛha Yehowa lɛ tsirɛɔ wɔ koni wɔye ehe odase. Yɛ no gbɛfaŋ po lɛ, shiɛmɔ nitsumɔ lɛ bɛ mlɛo kɛha Nyɔŋmɔ webii lɛ ateŋ mɛi babaoo. Kasemɔ bɔ ni mɛi babaoo eye hiɛ ni gboɔ nii kɛ gbɛtsii nibii krokomɛi anɔ kunim bɔni afee ni amɛkɛ amɛhe awo nitsumɔ nɛɛ mli kwraa kɛmɔ shi lɛ he nii yɛ fã ni ji “Suɔmɔ Kɛha Nyɔŋmɔ Kanyaa Wɔ yɛ Wɔ Sɔɔmɔ Nitsumɔ lɛ Mli” lɛ mli.

Te tɛi ni je lɛ efolɔ eshwie shi ni yaa nɔ efiteɔ lɛ náa wɔnɔ hewalɛ ehaa tɛŋŋ? Nifeemɔi ni tsutsu ko lɛ abuɔ nomɛi akɛ eji efɔŋ lɛ ji nɔ ni afɔɔ lɛ tsɛmɔ agbɛnɛ akɛ jeŋba ni tɔmɔ bɛ he. Wiemɔ ni ji “Mɛi ni Sumɔɔ Yehowa lɛ Nyɛ̃ɔ Efɔŋ” lɛ kɛ wiemɔ ni ahaa kɛtsaraa nɔ ni ji “Je Lɛŋ Nibii—Te Wɔbuɔ Nomɛi Wɔhaa Tɛŋŋ?” lɛ baaha wɔfai shi ni wɔtswa akɛ wɔɔtsi wɔhe kɛaajɛ akɔnɔi gbohii ahe lɛ mli awa.

Akɛ Teokrase Sɔɔmɔ Skul lɛ kɛ Sɔɔmɔ Kpee lɛ he nɔkwɛmɔnɔ baafata gbɛjianɔtoo lɛ he, kɛ agbɛnɛ Buu-Mɔɔ nikasemɔ lɛ mli sane kɛha otsi lɛ ni afo lɛ kuku. Maŋshiɛmɔ wiemɔ ni ji, “Bɔ ni Suɔmɔ kɛ Hemɔkɛyeli Yeɔ Je lɛ Nɔ Kunim” lɛ, baawo wɔ hewalɛ koni wɔkase Yesu yɛ bɔ ni ateɔ shi awoɔ je lɛŋ nɔnyɛɛi ahaa lɛ mli. (Yoh. 16:33) Kwɛmɔ koni ofɔ̃ nine otsɛ́ o-Biblia mli nikaselɔi koni amɛya eko. Mɔ fɛɛ mɔ ni miisumɔ ni abaptisi lɛ lɛ akɛɛ onukpai asɛinɔtalɔ lɛ amrɔ nɔŋŋ bɔni afee ni anyɛ ato gbɛjianɔi ni he hiaa lɛ.

Kpokpaa nɔ kpee nɛɛ baagbala wɔjwɛŋmɔ kɛya he pɔtɛɛ ni esa akɛ wɔha wɔsuɔmɔ lɛ ahi, bɔni afee ni wɔná Yehowa dɛŋ jɔɔmɔi babaoo amli ŋɔɔmɔ. Kaaha eko kwraa miije osɛɛ!