Atade ni Sa Jieɔ Nyɔŋmɔ Gbeyeishemɔ Kpo
1. Mɛɛ gbɛ nɔ wɔɔtsɔ wɔjie hiɛsɔɔ kpo wɔtsɔɔ yɛ wɔ kpokpaa wulu nɔ kpee ni kã wɔhiɛ lɛ mli?
1 Etsɛŋ ni wɔbaaná hegbɛ akɛ wɔɔtsɔmɔ mɛi ni Yehowa efɔ̃ amɛ nine kɛha afi 2003 “Okɛ Anunyam Aha Nyɔŋmɔ” Majimaji Ateŋ Kpeei kɛ Kpokpaa Wulu nɔ Kpeei lɛ. Kwɛ bɔ ni wɔdaa Yehowa shi babaoo akɛ efɔ̃ wɔ nine kɛha mumɔŋ okpɔlɔŋmɛɛ kpakpa ni tamɔ nɛkɛ! Wɔbaanyɛ wɔjie gbeyeishemɔ ni wɔyɔɔ kɛha lɛ, kɛ hiɛsɔɔ ni wɔyɔɔ kɛha mumɔŋ nibii ni eto he gbɛjianɔ lɛ akpo kɛtsɔ bɔ ni wɔsaa wɔhe wɔhaa lɛ nɔ.—Lala 116:12, 17.
2. Mɛni hewɔ ehe hiaa ni wɔhiɛ wɔhe falefale ni wɔsaa wɔhe yɛ hetsemɔ mli lɛ?
2 Hetsemɔ kɛ Gbɛjianɔtoo Kpakpa: Esa akɛ wɔhesaamɔ ajie wɔ-Nyɔŋmɔ, mɔ ni he tse ni eji gbɛjianɔtolɔ lɛ tɛi ni efolɔ eshwie shi lɛ akpo. (1 Kor. 14:33; 2 Kor. 7:1) Esa akɛ wɔgbɔmɔtsei, yitsɔi, kɛ waosɛɛlamii afee falefale, ni esa akɛ wɔsaa wɔhe yɛ hetsemɔ mli. Nɔ ni afɔɔ namɔ ŋmɛnɛ ji hesaamɔ yɛ gbɛ ni bɛ hiŋmɛi nɔ. Kɛlɛ, sini mli gbɔmɔ ko ni ehe gbɛi loo mɔ ko ni ehe gbɛi yɛ kpɔiaŋgbɔlemɔ mli lɛ hesaamɔ ni yɔɔ basabasa lɛ haaa Kristofonyo ko yiŋtoo ni eeedamɔ nɔ ekɛsaa ehe nakai. Kɛji akɛ wɔnyiɛ hesaamɔ ni eba nɔ lɛ sɛɛ lɛ, ebaafee nɔ ni wa kɛha mɛi akɛ amɛaana srɔtofeemɔ ni yɔɔ mɛi ni sɔmɔɔ anɔkwa Nyɔŋmɔ lɛ kɛ mɛi ni sɔmɔɔɔ lɛ lɛ ateŋ.—Mal. 3:18.
3. Mɛɛ gbɛ nɔ wɔɔtsɔ wɔná nɔmimaa akɛ wɔhesaamɔ kɛ ŋaawoo ni yɔɔ 1 Timoteo 2:9, 10 lɛ kpãa gbee?
3 Atade ni Sa Sɔɔlɔi Kristofoi: Beni bɔfo Paulo ŋma wolo kɛyaha Kristofonyo nɔkwɛlɔ Timoteo lɛ, ewo “yei” lɛ hewalɛ ni “amɛkɛ atade ni sa kɛ hiɛ ni gboɔ nɔ̃ kɛ jwɛŋmɔ ni sa awula amɛhe, . . . kɛ nitsumɔi kpakpai ni sa yei ni tsɔɔ amɛhe akɛ Nyɔŋmɔ jálɔi lɛ.” (1 Tim. 2:9, 10) Ebiɔ ni wɔsusu nii ahe jogbaŋŋ koni wɔkɛná nɔmimaa akɛ wɔtadei lɛ sa. Esa akɛ wɔkwa atadei ni jieɔ jeŋba shara shihilɛ kpo lɛ. Esa akɛ wɔtadei afee falefale, nɔ ni he tse, ni eyɔɔ hiŋmɛi nɔ—jeee nɔ ni yɔɔ hwanyaŋŋ, nɔ ni teeɔ bɔlɛnamɔ henumɔi loo akɔnɔi ashi.—1 Pet. 3:3.
4, 5. Mɛɛ kɔkɔbɔi esa akɛ Kristofoi hii kɛ yei afee toiboo aha?
4 Paulo hu tee nɔ ebɔ kɔkɔ eshi nii ni afeɔ kɛtekeɔ nɔ yɛ “yigbɔɔ loo shika loo adiagbai loo atade ni jara wa” lɛ he. (1 Tim. 2:9) Pɛpɛɛpɛ ni aŋmɛɔ yɛ jwinei ni awoɔ, hesaamɔ nibii, kɛ hewulamɔ nibii krokomɛi amli lɛ ji nilee gbɛ ni esa akɛ Kristofoi yei anyiɛ sɛɛ.—Abɛi 11:2.
5 Shishitoo mla ni yɔɔ ŋaawoo ni Paulo kɛha Kristofoi yei lɛ mli lɛ kɔɔ Kristofoi hii hu ahe. Esa akɛ nyɛmimɛi hii akwa atadei ni jieɔ je lɛ susumɔi akpo lɛ. (1 Yoh. 2:16) Ákɛ nɔkwɛmɔnɔ lɛ, yɛ shikpɔji komɛi anɔ lɛ, nɔ ni fɔɔ kaa ji atadei wuyaa, kɛ atadei ni da fe nine ni awoɔ, shi hesaamɔ ni tamɔ nɛkɛ lɛ esaaa Nyɔŋmɔ sɔɔlɔ. Nakai nɔŋŋ abaanyɛ awie yɛ tsɛŋtoo he.—be-GA bf. 133, kk. 1.
6. Mɛni hewɔ esa akɛ wɔha wɔtadewoo kɛ hesaamɔ afee nɔ ni sa jogbaŋŋ yɛ be mli ni wɔfãa gbɛ kɛyaa kpokpaa wulu nɔ kpee lɛ kɛ beni wɔkuɔ sɛɛ kɛbaa, beni wɔyɔɔ kpokpaa wulu nɔ kpee lɛ shishi, kɛ yɛ gbi fɛɛ gbi mli nifeemɔ lɛ sɛɛ lɛ?
6 Yɛ Hiɛtserɛjiemɔ Nifeemɔi Amli: Nyɛmimɛi hii kɛ yei pii feɔ nɔkwɛmɔnɔ kpakpa yɛ atadewoo kɛ hesaamɔ mli yɛ be mli ni amɛbaa nifeemɔ lɛ shishi lɛ. Kɛlɛ, amaniɛbɔi tsɔɔ akɛ mɛi komɛi kwɛɛɛ amɛhesaamɔ jogbaŋŋ beni amɛfãa gbɛ kɛyaa kpee ni amɛkuɔ amɛsɛɛ kɛbaa loo beni amɛkɛ amɛhe woɔ hiɛtserɛjiemɔ nifeemɔi amli yɛ gbi lɛ mli nifeemɔ lɛ sɛɛ lɛ. Yɛ anɔkwale mli lɛ, bɔ ni wɔsaa wɔhe wɔhaa—kɛji yɛ nifeemɔ be lɛ mli loo yɛ bei krokomɛi amli jio lɛ—náa bɔ ni mɛi krokomɛi naa Nyɔŋmɔ webii amɛhaa lɛ nɔ hewalɛ. Akɛni wɔtsɛɔ wɔkpee lɛ tsitsinaa-tsɛɛ nii lɛ hewɔ lɛ, esa akɛ wɔsaa wɔhe be fɛɛ be yɛ gbɛ ni sa Kristofoi sɔɔlɔi lɛ nɔ. Bei pii lɛ, enɛ tsirɛɔ mɛi krokomɛi ni amɛjieɔ wɔyi, ni egbeleɔ gbɛ ni wɔnyɛɔ wɔyeɔ odase.—1 Kor. 10:31-33.
7. Mɛɛ hewalɛ wɔtadewoo kɛ hesaamɔ ni sa lɛ baanyɛ aná yɛ mɛi krokomɛi anɔ?
7 Taakɛ bɔ ni hiɛ ŋmɔlɔŋmɔlɔ haa wɔhiɛ feɔ fɛo lɛ, nakai nɔŋŋ atade kɛ hesaamɔ ni sa lɛ haa anáa bulɛ kɛhaa shɛɛ sane ni wɔshiɛɔ kɛ gbɛjianɔtoo ni wɔdamɔɔ enajiaŋ lɛ. Ekolɛ ebaatsirɛ mɛi komɛi ni baana wɔ yɛ afi nɛɛ “Okɛ Anunyam Aha Nyɔŋmɔ” Kpeei lɛ abe lɛ mli lɛ atsuii ni amɛbi nɔ hewɔ ni esoro wɔ lɛ, ni yɛ naagbee lɛ amɛbaakɛɛ akɛ: “Wɔkɛ nyɛ aaatee; ejaakɛ wɔnu [ni wɔna] akɛ Nyɔŋmɔ kɛ nyɛ yɛ!” (Zak. 8:23) Eba akɛ wɔteŋ mɔ fɛɛ mɔ aaajie Yehowa gbeyeishemɔ kpo kɛtsɔ wɔtadewoo kɛ hesaamɔ nɔ.
[Akrabatsa ni yɔɔ baafa 5]
Okɛ Bulɛ Asaa Ohe
▪ Be mli ni ofãa gbɛ
▪ Yɛ kpee lɛ shishi
▪ Yɛ hiɛtserɛjiemɔ nifeemɔ bei amli