Sanebimɔ He

◼ Ani esa akɛ abu weku Biblia mli nikasemɔ he akɔntaa aha asafo lɛ?

Kɛji akɛ fɔlɔ Kristofonyo ko feɔ weku Biblia mli nikasemɔ ni bii ni abaptisiko amɛ fataa he lɛ, fɔlɔ lɛ baanyɛ ni kɛ́ efa aahu lɛ, ebu ŋmɛlɛtswaa kome he akɔntaa yɛ otsi kome mli, ebu sɛɛkuu-kɛ-saramɔ kome he akɔntaa yɛ otsi kome mli, ní yɛ nyɔŋ kome mli lɛ ebu shĩa Biblia mli nikasemɔ kome he akɔntaa. Nakai nɔŋŋ eji kɛji akɛ nikasemɔ lɛ yeɔ nɔ ni fa fe ŋmɛlɛtswaa kome, ni afeɔ fe shikome yɛ otsi mli, loo kɛ́ akɛ bii lɛ kaseɔ nii mɔ kome mɔ kome po.—Kwɛmɔ Our Ministry wolo lɛ, bf. 104.

Kɛji akɛ shiabii lɛ fɛɛ ji Odasefoi ni abaptisi amɛ lɛ, no lɛ esaaa akɛ abuɔ be loo nikasemɔ ni afeɔ lɛ he akɔntaa akɛ shiɛmɔ nitsumɔ (ja bi ko kã he eekase wolo ni ji enyɔ yɛ ebaptisimɔ lɛ sɛɛ). Nɔ hewɔ ji akɛ, nɔ titri ni asafo lɛ shiɛmɔyaa he akɔntaabuu jieɔ lɛ kpo ji nibii ni atsu yɛ sanekpakpa lɛ shiɛmɔ kɛ Biblia mli anɔkwale lɛ ni atsɔɔ mɛi ni ejɔko amɛwala nɔ ni abaptisiko amɛ akɛ Yehowa sɔɔlɔi lɛ mli. (Mat. 24:14; 28:19, 20) Shi kɛlɛ, enɛ haaa hiamɔ ni yɔɔ akɛ afee nikasemɔ ni tamɔ nɛkɛ be fɛɛ be lɛ aba shi yɛ gbɛ ko kwraa nɔ.

Eji sɔ̃ ni kã fɔlɔi Kristofoi anɔ akɛ amɛkɛ amɛbii akase nii. Mɛi ni yelikɛbuamɔ he miihia amɛ bɔni afee ni amɛto weku nikasemɔ shishi loo ní amɛha eya hiɛ lɛ baanyɛ abi onukpai lɛ kɛha yelikɛbuamɔ. Kɛji akɛ shihilɛ lɛ ha ebafee nɔ ni sa akɛ shiɛlɔ kroko kɛ binuu loo biyoo ko ni abaptisiko lɛ ni yɔɔ Kristofoi aweku ko mli, ni kɛ asafo lɛ bɔɔ lɛ afee Biblia mli nikasemɔ lɛ, no lɛ esa ákɛ akɛ onukpai asɛinɔtalɔ lɛ loo sɔɔmɔ nitsumɔ nɔkwɛlɔ lɛ asusu he. Kɛji akɛ akpɛlɛ nikasemɔ ni tamɔ nɛkɛ nɔ lɛ, mɔ ni kwɛɔ nɔ lɛ baanyɛ abu he akɔntaa taakɛ ebaafee yɛ Biblia mli nikasemɔi krokomɛi agbɛfaŋ lɛ pɛpɛɛpɛ.

Bii atsɔsemɔ yɛ Yehowa gbɛ̀i anɔ lɛ biɔ be kɛ mɔdɛŋbɔɔ ni fa babaoo fe nɔ ni akɛhaa yɛ shiɛmɔyaa he akɔntaabuu nɔ lɛ kɛkɛ. (5 Mose 6:6-9; Abɛi 22:6) Fɔlɔi Kristofoi sa yijiemɔ yɛ gbɛnaa nii ni tsii ni amɛtsuɔ he nii yɛ amɛbii lɛ atsɔsemɔ “yɛ Nuŋtsɔ lɛ tsɔsemɔ kɛ ŋaawoo lɛ mli” lɛ hewɔ.—Efe. 6:4.

● Ani esa akɛ toibolɔi atswa amɛdɛ yɛ Teokrase Sɔɔmɔ Skul lɛ loo yɛ Sɔɔmɔ Kpee lɛ fãi srɔtoi lɛ eko fɛɛ eko naagbee? Mɛɛ jwɛŋmɔ ni ja esa akɛ aná yɛ dɛtswaa he?

Yɛ anɔkwale mli lɛ, Yehowa Odasefoi toibolɔi yɛ hiɛsɔɔ babaoo. Eji nɔ ni sa jogbaŋŋ akɛ wɔɔsumɔ akɛ wɔjie hiɛsɔɔ kpo wɔtsɔɔ yɛ wɔnyɛmimɛi amɔdɛŋbɔɔ kɛ amɛnifeemɔi yɛ wiemɔ kpoku lɛ nɔ lɛ hewɔ. Yɛ je lɛŋ hei komɛi lɛ, ekolɛ akɛ dɛtswaa baajie hiɛsɔɔ ni tamɔ nɛkɛ lɛ kpo. Kɛlɛ, bei pii lɛ, dɛtswaa tsɔɔ hiɛsɔɔ ni aná yɛ nɔ ko ni efɔɔɔ kaa lɛ he, ni yɛ enɛ hewɔ lɛ esa akɛ efee nɔ ni jɛ suɔmɔ kɛ tsui mli.

Mɛɛ gbɛ nɔ abaanyɛ ni akɛ shishitoo mla nɛɛ atsu nii yɛ wɔ Maŋtsɛyeli Asai lɛ anɔ beni afeɔ Teokrase Sɔɔmɔ Skul lɛ loo yɛ Sɔɔmɔ Kpee lɛ mli? Eka shi faŋŋ akɛ, mla ko bɛ ni teɔ shi ewoɔ dɛtswaa kɛji akɛ ejɛ suɔmɔ mli kɛ hiɛsɔɔ ni jɛ tsui mli, taakɛ afeɔ kɛ́ skulnyo hee ko ha eklɛŋklɛŋ wiemɔ lɛ. Kɛlɛ, etamɔ nɔ ni yɛ asafoi komɛi amli lɛ, dɛtswaa yɛ skul nifeemɔ lɛ eko fɛɛ eko sɛɛ lɛ ebatsɔ nɔ ko ni afeɔ kɛkɛ—tamɔ su ko ni eka mɔ he. “Bei pii lɛ wɔtswaaa wɔdɛ yɛ nifeemɔi nɛɛ asɛɛ ejaakɛ . . . ebaanyɛ etsɔ nɔ ko ni afeɔ lɛ jabejabe kɛkɛ, ni yiŋtoo diɛŋtsɛ ni hɔ sɛɛ lɛ baalaje.”—Kwɛmɔ Sanebimɔ He ni yɔɔ August, afi 1972 Wɔ Maŋtsɛyeli Sɔɔmɔ lɛ baafa 4 lɛ mli.

Bei pii lɛ, wɔnyɛmimɛi lɛ kɛ be kɛ mɔdɛŋbɔɔ babaoo tsuɔ nii kɛsaa amɛhe kɛhaa amɛnifeemɔi yɛ kpeei wuji, kpeei bibii kɛ kpeei krɛdɛɛi ni atoɔ he gbɛjianɔ lɛ ashishi. Biɛ ji he ni wɔnaa ni toibolɔi miitswa amɛdɛ, jeee yɛ wiemɔ lɛ naagbee kɛkɛ, shi bei komɛi lɛ, be mli ni wiemɔ lɛ yaa nɔ lɛ. Dɛtswaa ni jɛ suɔmɔ mli ni tamɔ nɛkɛ lɛ sa jogbaŋŋ.

Kɛlɛ, esa akɛ wɔtsi wɔhe kɛjɛ nɔ ni mɛi komɛi fɔɔ feemɔ, ni ji amɛdɛ ni amɛtswaa kɛtekeɔ nɔ yɛ be mli ni wielɔ ko ni amɛsumɔɔ esane waa loo mɔ ko ni abuɔ lɛ ni ale lɛ waa lɛ haa wiemɔ yɛ henaabuamɔ ko shishi lɛ he. Bei komɛi lɛ, atswaa dɛ yɛ wiemɔ kpoku lɛ kɛkɛ ni mɔ nɛɛ kwɔɔ hewɔ. Kɛji akɛ mɔ nɛɛ ha wiemɔ ni eŋɔɔɔ ni mɛi nyá ehe babaoo, ni kɛlɛ wielɔ ko ni aleee lɛ tsɔ̃ lɛ ha wiemɔ ni ŋɔɔ jogbaŋŋ, shi atswa dɛ fioo pɛ aha lɛ lɛ, ani enɛ jeee nifeemɔ ko ni nyiɛɔ mɔ hiɛ kɛyaa jamɔ ni akɛhaa bɔɔ nɔ lɛ mli? Kɛji akɛ atswa dɛ yɛ nɔ ni awie lɛ he shi jeee yɛ mɔ ni wie lɛ hewɔ lɛ, belɛ akɛmiiha shɛɛ sane lɛ Ŋmalɔ, ni ji Yehowa Nyɔŋmɔ, ni nakai esa akɛ ebalɛ.

Wɔteŋ mɔ fɛɛ mɔ yɛ nɔ ko ni ebaanyɛ efee ni ekɛjie anɔkwa hiɛsɔɔ kpo etsɔɔ yɛ wielɔ lɛ mɔdɛŋbɔi ahewɔ. No ji toiboo ni wɔɔfee be mli ni wiemɔ lɛ yaa nɔ, wielɔ lɛ hiɛ ni wɔɔkwɛ kɛ wɔhiɛ ni wɔkɛaatsɔɔ akɛ wɔmiinu esaji ahe susumɔ lɛ shishi ni wɔmiiná he sɛɛ lɛɛlɛŋ lɛ. Bei pii lɛ hiɛsɔɔ ni wɔná lɛ tsirɛɔ wɔ ni wɔtswaa wɔdɛ yɛ wiemɔi ni tamɔ nɛkɛ sɛɛ. Kɛ́ wɔfee enɛ lɛ, wɔ dɛtswaa lɛ ebafeee nifeemɔ ko ni afeɔ kɛkɛ, shi moŋ ebaafee shidaa ni jɛ wɔtsui mli yɛ saji kpakpai ni wɔnine eshɛ nɔ kɛjɛ Yehowa ŋɔɔ lɛ kpojiemɔ.