Nyɛkɛ Heshibaa Ahàa Nyɛhe
1 Gbekɛ nuu tookwɛlɔ ko kɛ ehe fɔ Yehowa nɔ ni eye tabilɔ ko ni he wa waa nɔ kunim. (1 Sam. 17:45-47) Nuu niiatsɛ ko kɛ tsuishiŋmɛɛ damɔ amanehulu naa. (Hiob 1:20-22; 2:9, 10) Nyɔŋmɔ Bi lɛ kɛ enitsɔɔmɔ lɛ he yijiemɔi fɛɛ ha e-Tsɛ lɛ. (Yoh. 7:15-18; 8:28) Humifeemɔ tsu nɔ titri he nii yɛ nɛkɛ nɔkwɛmɔnii nɛɛ eko fɛɛ eko mli. Nakai nɔŋŋ hu ŋmɛnɛ, heshibaa he miihia koni wɔnyɛ wɔdamɔ shihilɛi srɔtoi ni wɔkɛkpeɔ lɛ anaa.—Kol. 3:12.
2 Beni Wɔshiɛɔ Lɛ: Ákɛ sɔɔlɔi Kristofoi lɛ, wɔkɛ heshibaa shiɛɔ sanekpakpa lɛ wɔhaa gbɔmɛi srɔtoi fɛɛ, ni wɔtsɔɔɔ hiɛ wɔkojooo amɛ yɛ amɛweku, kusum, loo shihilɛ ni amɛjɛ mli lɛ naa. (1 Kor. 9:22, 23) Kɛji akɛ mɛi komɛi yɛ basabasa loo amɛkɛ henɔwomɔ kpoo Maŋtsɛyeli shɛɛ sane lɛ, wɔfeee nakai nɔŋŋ kɛtooo najiaŋ, shi moŋ wɔkɛ tsuishitoo yaa nɔ wɔtaoɔ mɛi ni sa lɛ. (Mat. 10:11, 14) Yɛ nɔ najiaŋ ni wɔɔbɔ mɔdɛŋ akɛ wɔkɛ wɔnilee loo woloŋlee aaasa mɛi krokomɛi ahiɛ lɛ, wɔgbalaa jwɛŋmɔ kɛyaa Nyɔŋmɔ Wiemɔ lɛ nɔ, ejaakɛ wɔle akɛ etsɔɔ mɔ yiŋ babaoo fe nɔ fɛɛ nɔ ni ekolɛ wɔbaawie. (1 Kor. 2:1-5; Heb. 4:12) Wɔkɛ yijiemɔ fɛɛ haa Yehowa yɛ Yesu kasemɔ mli.—Mar. 10:17, 18.
3 Yɛ Asafo lɛ Mli: Esa akɛ Kristofoi hu ‘kɛ heshibaa jwɛŋmɔ aba amɛhe shi amɛha amɛhe.’ (1 Pet. 5:5) Kɛji akɛ wɔsusu mɛi krokomɛi ahe akɛ amɛnɔ kwɔlɔ fe wɔ lɛ, wɔbaatao gbɛ̀i ni wɔɔtsɔ nɔ wɔsɔmɔ wɔnyɛmimɛi lɛ moŋ fe nɔ ni wɔɔkpa amɛ gbɛ ni amɛsɔmɔ wɔ. (Yoh. 13:12-17; Fil. 2:3, 4) Wɔnuŋ he akɛ wɔnɔ kwɔlɔ tsɔ, ní no hewɔ lɛ esaaa akɛ akɛɔ wɔ akɛ wɔbatsu nitsumɔi tamɔ Maŋtsɛyeli Asa lɛ nɔ bɛɛmɔ.
4 Heshibaa yeɔ ebuaa wɔ koni ‘wɔkɛ wɔhe ahi shi yɛ suɔmɔ mli’ koni wɔkɛha toiŋjɔlɛ kɛ ekomefeemɔ ni yɔɔ asafo lɛ mli lɛ aya hiɛ. (Efe. 4:1-3) Eyeɔ ebuaa wɔ koni wɔba wɔhe shi wɔha mɛi ni ahala amɛ koni amɛnyiɛ hiɛ lɛ. (Heb. 13:17) Ekanyaa wɔ koni wɔkpɛlɛ ŋaawoo loo tsɔsemɔ fɛɛ tsɔsemɔ ni ekolɛ akɛbaaha wɔ lɛ nɔ. (Lala 141:5) Ni heshibaa tsirɛɔ wɔ koni wɔkɛ wɔhe afɔ Yehowa nɔ beni wɔtsuɔ hegbɛi fɛɛ ni ekolɛ wɔnine aaashɛ nɔ yɛ asafo lɛ mli lɛ ahe nii lɛ. (1 Pet. 4:11) Taakɛ David ji lɛ, wɔyɔseɔ akɛ omanye ni ayeɔ lɛ damɔɔɔ adesa nyɛmɔ nɔ, shi moŋ Nyɔŋmɔ jɔɔmɔ nɔ.—1 Sam. 17:37.
5 Yɛ Wɔ-Nyɔŋmɔ lɛ Hiɛ: Nɔ ni he hiaa fe fɛɛ lɛ, ehe miihia ni ‘wɔba wɔhe shi yɛ Nyɔŋmɔ nine ni wa lɛ shishi.’ (1 Pet. 5:6) Kɛji akɛ wɔkɛ shihilɛi ni kaa mɔ kpe lɛ, ekolɛ wɔbaashwe akɛ wɔɔná hejɔlɛ ni Maŋtsɛyeli lɛ kɛbaaba lɛ. Shi wɔkɛ heshibaa ŋmɛɔ wɔtsui shi, ni wɔmɛɔ Yehowa koni eha eshiwoi aba mli yɛ ebe ni eto lɛ mli. (Yak. 5:7-11) Taakɛ eji anɔkwale yɛ emuuyeli mlihiɛlɔ Hiob he lɛ, nɔ ni he hiaa wɔ fe fɛɛ ji akɛ, “aaajie Yehowa gbɛi lɛ yi kɛ̃!”—Hiob 1:21.
6 Gbalɔ Daniel ‘ba ehe shi yɛ Nyɔŋmɔ hiɛ,’ ni akɛ Yehowa duromɔ kɛ hegbɛi kpakpai babaoo jɔɔ lɛ. (Dan. 10:11, 12) Eba akɛ wɔ hu wɔkɛ heshibaa aaahà wɔhe, akɛni wɔle akɛ, “heshibaa kɛ Yehowa gbeyeishemɔ nyɔmɔwoo ji nii kɛ hiɛnyam kɛ wala” lɛ hewɔ.—Abɛi 22:4.