Gbɛtsɔɔmɔi ni Wɔbaanyɛ Wɔkɛtsu Nii Kɛ́ Wɔkɛ Ani Nyɔŋmɔ Susuɔ Wɔhe Lɛɛlɛŋ? Wolo Bibioo lɛ Miiha
Beni otsĩ oshara ko ni atswa he adafi lɛ tã sɛɛ lɛ, obaanyɛ okɛɛ akɛ:
“Ani oyiŋ efee bo kɔshikɔshi pɛŋ yɛ nɔ hewɔ ni Nyɔŋmɔ ni kɛɛ esumɔɔ adesai lɛɛlɛŋ lɛ ŋmɛɔ amɛ gbɛ koni amɛna amanehulu lɛ? [Ŋmɛɛ gbɛ ni eha hetoo.] Wolo bibioo nɛɛ kɛ hetoo ni haa mɔ tsui nyɔɔ emli haa yɛ nakai sanebimɔ lɛ he, ni etsɔɔ nɔ ni Nyɔŋmɔ baafee yɛ wɔsɛɛ be ni ebɛŋkɛ lɛ mli. [Okɛ mfoniri ni yɔɔ baafa 27 lɛ atsɔɔ, ni okane Lala 145:16 ni yɔɔ baafa lɛ mli kuku 22 lɛ.] Mɛɛ gbɛ nɔ Nyɔŋmɔ baatsɔ ejie piŋmɔi fɛɛ ni adesai kɛkpeɔ lɛ kɛya? Masumɔ ni wɔsusu nakai sanebimɔ lɛ he kɛ miku misɛɛ kɛba ekoŋŋ.” Okɛ wolo bibioo lɛ aha lɛ, ni oto gbɛjianɔ ni oku osɛɛ ekoŋŋ.
Kɛ́ oku osɛɛ kɛtee ekoŋŋ lɛ, obaanyɛ okɛɛ akɛ:
“Beni mibasara bo lɛ, wɔkane ŋmalɛ nɛɛ. [Kanemɔ Lala 145:16 loo kɛɛmɔ emli wiemɔi lɛ.] Ni mibi akɛ: Mɛɛ gbɛ nɔ Nyɔŋmɔ baatsɔ ejie piŋmɔi fɛɛ ni adesai kɛkpeɔ lɛ kɛya?” Ha ni eyakɔ ewolo bibioo lɛ kɛba. No sɛɛ lɛ, gbelemɔ kɛya baafa 27-28, ni nyɛsusu kuku 23-25 lɛ he. Okɛ lɛ ato gbɛjianɔ kɛha Biblia mli nikasemɔ, aloo too gbɛjianɔ ni okɛ lɛ abasusu kuku 26-27 lɛ he kɛji oku osɛɛ oba be kroko.
Shiɛlɔ ni ji oblanyo loo oblayoo fioo lɛ baanyɛ akɛɛ akɛ:
“Mitipɛŋfoi babaoo susuɔ bɔ ni je lɛŋ shikamɔ baaji aha yɛ biɛ afii 10 loo afii 15 ni baaba lɛ mli lɛ he. Te osusuɔ akɛ shihilɛ lɛ baaji aha tɛŋŋ yɛ nakai beaŋ? [Ŋmɛɛ gbɛ ni eha hetoo.] Naagbai ni wɔkɛkpeɔ ŋmɛnɛ lɛ tsɔɔ akɛ wɔyɛ naagbee gbii lɛ amli. [Kanemɔ 2 Timoteo 3:1-3.] Wolo bibioo nɛɛ haa sanebimɔi ni nyiɛ sɛɛ nɛɛ ahetoo. [Kanemɔ sanebimɔi ni yɔɔ wolo lɛ sɛɛ lɛ, ni okɛ wolo bibioo lɛ aha lɛ.] Kɛji miku misɛɛ miba ni oha mi minitii fioo lɛ, mikɛ bo baasusu sane ni woɔ mɔ hewalɛ ni kɔɔ hela kɛ gbɔlɛ sɛɛ ni abaafo lɛ he.” Too gbɛjianɔ ni oku osɛɛ oya jɛmɛ ekoŋŋ.
Kɛ́ oku osɛɛ otee ekoŋŋ lɛ, obaanyɛ okɛɛ akɛ:
“Nyɛsɛɛ beni wɔgba sane lɛ, mitsĩ tã akɛ masumɔ ni mikɛ bo asusu sane ni woɔ mɔ hewalɛ ni kɔɔ hela kɛ gbɔlɛ sɛɛ ni abaafo lɛ he. Anaa nakai sane oti lɛ yɛ biɛ.” Ha ni eyakɔ ewolo bibioo lɛ kɛba. No sɛɛ lɛ, kanemɔ kuku 6-7 ni yɔɔ baafa 23-24 lɛ, ní okɛlɛ asusu he. Too gbɛjianɔ ni okɛ lɛ abasusu baafa 8-9 lɛ he kɛji oku osɛɛ oba be kroko.
Kɛ́ shiɛlɔ ni eda kɛ gbekɛ ko miitsu nii lɛ, mɔ ni eda lɛ baanyɛ etsɔɔ amɛyi enyɔ lɛ agbɛi ni ekɛɛ akɛ:
“Kɛ́ obaaŋmɛ gbɛ lɛ, ________ baakane ŋmalɛ ko eha bo. [Gbekɛ lɛ akane Lala 37:29, ni ewie he kuku.] Wolo bibioo nɛɛ tsɔɔ bɔ ni Nyɔŋmɔ baatsu eyiŋtoo kɛha shikpɔŋ kɛ adesa lɛ he nii lɛ mli. [Okɛ mfonirii ni yɔɔ baafa 24-27 lɛ atsɔɔ lɛ.] Kɛ́ wɔku wɔsɛɛ wɔba ekoŋŋ lɛ, masumɔ ni matsɔɔ bo shiwoi ni yɔɔ naakpɛɛ ni Biblia lɛ kɛhaa yɛ gbohiiashitee lɛ he.” Okɛ wolo bibioo lɛ aha lɛ, ni oto gbɛjianɔ ni oku osɛɛ oya jɛmɛ ekoŋŋ.
Mɔ ni eda lɛ baanyɛ akɛɛ yɛ sɛɛkuu-kɛsaramɔ lɛ mli akɛ:
“Nyɛsɛɛ beni mibasara bo lɛ, wɔkane Lala 37:29, ni mitsĩ tã akɛ masumɔ ni matsɔɔ bo nɔ ni Biblia lɛ kɛɔ yɛ gbohiiashitee lɛ he. Kadimɔ nɔ ni akɛɛ yɛ biɛ lɛ.” Ha ni eyakɔ ewolo bibioo lɛ kɛba. No sɛɛ lɛ, okɛ lɛ asusu kuku 12-14 ni yɔɔ baafa 24-25 lɛ he. Okɛ lɛ ato gbɛjianɔ kɛha Biblia mli nikasemɔ, aloo too gbɛjianɔ ni okɛlɛ abasusu kuku 15-16 lɛ he kɛji oku osɛɛ oyasara lɛ be kroko lɛ.