Gbɛtsɔɔmɔi ni Wɔbaanyɛ Wɔkɛtsu Nii Kɛ́ Wɔkɛ Mɛni Ji Yiŋtoo ni Yɔɔ Shihilɛ Sɛɛ?—Te Ooofee Tɛŋŋ Ole Hu? Wolo Bibioo lɛ Miiha
Kɛ́ oŋa shiatsɛ lɛ, obaanyɛ okɛɛ akɛ:
“Ŋmɛnɛ, naagbai kɛ nijiaŋwujei ní anyɛɛɛ naa foi aje eyi shihilɛ mli obɔ. Ani osusuɔ akɛ nɛkɛ ji bɔ ni ato akɛ shihilɛ lɛ afee? [Ŋmɛɛ gbɛ ni eha hetoo.] Wolo bibioo nɛɛ tsɔɔ akɛ eshwɛ fioo ní Nyɔŋmɔ yiŋ ni eto kɛha adesai kɛ shikpɔŋ lɛ yɛ shishijee mli lɛ baaba mli. [Okɛ lɛ asusu mfoniri ni yɔɔ baafa 20-21 lɛ he. No sɛɛ lɛ, kanemɔ kuku 9 lɛ, ni omamɔ otii ni yɔɔ Yesaia 14:24 kɛ 46:11 lɛ anɔ mi.] Kɛ́ miba be kroko lɛ, masumɔ ni matsɔɔ bo he ni Biblia lɛ kɛɔ yɛ akɛ Nyɔŋmɔ kɛ Paradeiso baaba shikpɔŋ lɛ nɔ ekoŋŋ lɛ.” Okɛ wolo bibioo lɛ aha lɛ, ni oto gbɛjianɔ koni oyasara lɛ ekoŋŋ.
Kɛ́ oku osɛɛ otee ekoŋŋ lɛ, obaanyɛ okɛɛ akɛ:
“Nyɛsɛɛ lɛ mitsĩ tã akɛ eji Nyɔŋmɔ yiŋtoo akɛ adesai ahi shi kɛya naanɔ yɛ paradeiso shikpɔŋ nɔ. [Okɛ mfoniri ni yɔɔ baafa 20-21 lɛ atsɔɔ lɛ ekoŋŋ.] Kadimɔ akɛ Yesu, Petro kɛ David fɛɛ wie Paradeiso he.” Ha eyakɔ ewolo bibioo lɛ kɛba. Gbelemɔ baafa 21-22 lɛ, ni nyɛsusu kuku 10-13 lɛ he. Okɛ lɛ ato Biblia mli nikasemɔ he gbɛjianɔ, loo too gbɛjianɔ koni kɛ́ oba be kroko lɛ okɛ lɛ abasusu saneyitsei bibii ni yɔɔ baafa 29-30 lɛ ateŋ ekome he.
Shiɛlɔ ni ji oblanyo loo oblayoo fioo lɛ baanyɛ akɛɛ akɛ:
“Mitipɛŋfoi babaoo ayiŋ feɔ amɛ kɔshikɔshi yɛ wɔsɛɛ be he. Ani osusuɔ akɛ shihilɛ lɛ baahi aha yinɔbii ni baaba wɔsɛɛ lɛ fe bɔ ni eyɔɔ amrɔ nɛɛ? [Ŋmɛɛ gbɛ ni eha hetoo.] Biblia lɛ wieɔ shihilɛ kpakpa ní adesai fɛɛ baaná wɔsɛɛ lɛ he. [Okɛ mfoniri ni yɔɔ baafa 31 lɛ atsɔɔ lɛ, ni okane mfoniri lɛ he niŋmaa lɛ. No sɛɛ lɛ, kanemɔ 2 Petro 3:13.] Wolo bibioo nɛɛ wieɔ jɔɔmɔi ni Nyɔŋmɔ esaa eto adesai lɛ ahe. [Tsĩi saneyitsei bibii ni akɛ niŋmaa okadii ni mli ti eŋmala ni yɔɔ baafa 29-30 lɛ atã, ni okɛ wolo bibioo lɛ aha lɛ.] Masumɔ ni maku misɛɛ mabasara bo ekoŋŋ koni mikɛ bo asusu Nyɔŋmɔ shiwoo akɛ ebaaha tai fɛɛ asɛɛ afo lɛ he.” Too gbɛjianɔ koni oyasara lɛ ekoŋŋ.
Kɛ́ oku osɛɛ otee ekoŋŋ lɛ, obaanyɛ okɛɛ akɛ:
“Beni mibasara bo nyɛsɛɛ lɛ, miwie Nyɔŋmɔ yiŋtoo akɛ ekɛ paradeiso baaba shikpɔŋ lɛ nɔ ekoŋŋ lɛ he kuku. [Okɛ mfoniri ni yɔɔ baafa 31 lɛ atsɔɔ lɛ ekoŋŋ.] Masumɔ ni male osusumɔ yɛ Nyɔŋmɔ shiwoo akɛ ebaaha tai fɛɛ asɛɛ afo lɛ he.” Ha eyakɔ ewolo bibioo lɛ kɛba. No sɛɛ lɛ nyɛkanea kuku 3-6 ní yɔɔ baafa 29 lɛ, ni nyɛsusu he. Too gbɛjianɔ koni kɛ́ oku osɛɛ oba lɛ okɛ lɛ asusu kuku 7-8 lɛ he.
Kɛ́ shiɛlɔ ni eda kɛ gbekɛ ko miitsu nii lɛ, mɔ ni eda lɛ baanyɛ etsɔɔ amɛyi enyɔ lɛ agbɛi ni ekɛɛ akɛ:
“Kɛ́ obaaŋmɛ gbɛ lɛ, ________ kɛ mfoniri ko baatsɔɔ bo ni ekane ŋmalɛ kuku ko kɛjɛ Biblia lɛ mli. [Gbekɛ lɛ kɛ mfoniri ni yɔɔ baafa 31 lɛ atsɔɔ ni ekane ehe niŋmaa lɛ, koni no sɛɛ lɛ ekane Kpojiemɔ 21:4.] Wolo bibioo nɛɛ tsɔɔ nɔ ni Nyɔŋmɔ baafee yɛ naagbai ni wɔkɛkpeɔ ŋmɛnɛ lɛ ahe lɛ mli. [Tsĩi saneyitsei bibii ni akɛ niŋmaa okadii ni mli ti eŋmala ni yɔɔ baafa 29-30 lɛ atã kuku, ni okɛ wolo bibioo lɛ aha lɛ.] Kɛ́ wɔku wɔsɛɛ wɔba ekoŋŋ lɛ, masumɔ ni matsɔɔ bo nɔ ni Biblia lɛ kɛɔ yɛ gbɔmɔtsoŋ hewalɛnamɔ he naagbai fɛɛ ni abaafo sɛɛ lɛ he.”
Mɔ ni eda lɛ baanyɛ akɛɛ yɛ sɛɛkuu-kɛsaramɔ lɛ mli akɛ:
“Mitsĩ tã yɛ sane ni wɔgba nyɛsɛɛ lɛ mli akɛ masumɔ ni matsɔɔ bo nɔ ni Biblia lɛ kɛɔ yɛ gbɔmɔtsoŋ hewalɛnamɔ he naagbai fɛɛ ni abaafo sɛɛ lɛ he. Kadimɔ nɔ ni aŋma yɛ biɛ lɛ.” Ha eyakɔ ewolo bibioo lɛ kɛba. No sɛɛ lɛ, nyɛsusua kuku 9-14 ni yɔɔ wolo bibioo lɛ baafa 29 lɛ he. Okɛ lɛ ato Biblia mli nikasemɔ he gbɛjianɔ, loo too gbɛjianɔ koni kɛ́ oku osɛɛ oba lɛ okɛ lɛ asusu kuku 15-17 lɛ he.