Nɔkwɛmɔnɔ Kɛha Gbekɛbii kɛ Onukpai Fɛɛ

Ená ekɛ Nyɔŋmɔ teŋ wekukpaa gbagbalii ni yɔɔ miishɛɛ. Ekɛ eshihilɛ fɛɛ tsu nii kɛfee Yehowa suɔmɔnaa nii. ‘Ekɛ Nyɔŋmɔ nyiɛ’ ni ajɔɔ lɛ yɛ nakai feemɔ mli. Lɛ ji Noa, nɔkwɛmɔnɔ ni esa akɛ gbekɛbii kɛ onukpai fɛɛ akase. (1 Mose 6:9) Vidio ni ji Noah—He Walked With God (Noa—Ekɛ Nyɔŋmɔ Nyiɛ) lɛ baaye ebua bo koni ofee bɔ ni Noa shihilɛ yɔɔ ha lɛ he mfoniri yɛ ojwɛŋmɔ mli, nɔ hewɔ ni ená Yehowa dɛŋ jɔɔmɔ, kɛ bɔ ni ooofee okase esui kpakpai lɛ.

Nɔ ni fata Noah vidio ni yɔɔ DVD nɔ lɛ he ji “Video Quiz” (Vidio Sanebimɔi) ni nyiɛ sɛɛ nɛɛ. Kwɛmɔ vidio lɛ, no sɛɛ lɛ bi ohe akɛ: (1) Mɛni ŋwɛibɔfoi komɛi fee ní ehiii, ni namɛi ji Nefilim loo oblaŋi agboi lɛ? (1 Mose 6:1, 2, 4) (2) Mɛni hewɔ gbɔmɛi fee efɔŋ waa lɛ, ni te Nyɔŋmɔ nu enɛ he eha tɛŋŋ? (1 Mose 6:4-6) (3) Noa yɛ srɔto yɛ mɛɛ gbɛ nɔ? (1 Mose 6:22) (4) Mɛɛ gbɛ nɔ atsɔ akpãta efɔŋfeelɔi lɛ ahiɛ? (1 Mose 6:17) (5) Te adeka lɛ dalɛ yɔɔ ha tɛŋŋ? (1 Mose 6:15) (6) Mɛɛ nɔ kroko hu Noa fee, ni te mɛi fee amɛnii yɛ he amɛha tɛŋŋ? (Mat. 24:38, 39; 2 Pet. 2:5) (7) Kooloi fɛɛ kooloi enyiɛ akɛwo adeka lɛ mli? (1 Mose 7:2, 3, 8, 9) (8) Be enyiɛ nugbɔ lɛ kɛnɛ, ni be enyiɛ nu kɛyi shikpɔŋ lɛ nɔ obɔ? (1 Mose 7:11, 12; 8:3, 4) (9) Mɛni hewɔ Noa kɛ eweku lɛ yi ná wala? (1 Mose 6:18, 22; 7:5) (10) Nɛgbɛ adeka lɛ yama? (1 Mose 8:4) (11) Te fee tɛŋŋ Noa le akɛ eyɛ shweshweeshwe akɛ aaaje kpo kɛjɛ adeka lɛ mli? (1 Mose 8:6-12) (12) Mɛni Noa fee beni eje kpo kɛjɛ adeka lɛ mli lɛ? (1 Mose 8:20-22) (13) Mɛni kwaabuɛtɛ lɛ damɔ shi kɛha? (1 Mose 9:8-16) (14) Te ‘nyiɛmɔ ni akɛ Nyɔŋmɔ aaanyiɛ’ lɛ tsɔɔ tɛŋŋ? (1 Mose 6:9, 22; 7:5) (15) Mɛni esa akɛ wɔfee koni wɔna Noa yɛ Paradeiso? (Mat. 28:19, 20; 1 Pet. 2:21)

Mɛni ji nɔ ni Biblia mli sane ni kɔɔ nuu anɔkwafo Noa ni fee toiboo lɛ he lɛ eha ole yɛ bɔ ni bo hu obaanyɛ ‘okɛ Nyɔŋmɔ anyiɛ’ ni oná hekɛnɔfɔɔ akɛ Yehowa baanyɛ ahere ewebii ni yɔɔ ŋmɛnɛŋmɛnɛ lɛ ayiwala lɛ he?—1 Mose 7:1; Abɛi 10:16; Heb. 11:7; 2 Pet. 2:9.