Amɛfee Anɔkwayeli He Nɔkwɛmɔnɔ Kpakpa Amɛfɔ̃ Shi
1 Aje gbɛgbalɔ krɛdɛɛi nitsumɔ ni fata be-fɛɛ sɔɔmɔ nitsumɔ lɛ he lɛ shishi yɛ afi 1937 mli. Hii kɛ yei ni he esa ní yɔɔ niiashikpamɔ yɛ Kristofoi ashiɛmɔ nitsumɔ lɛ mli lɛ jɛ amɛsuɔmɔ mli amɛkpɛlɛ hei srɔtoi fɛɛ ni asafo lɛ kɛ gbɛtsɔɔmɔ ha amɛ koni amɛyashiɛ yɛ lɛ nɔ. Eyɛ mli akɛ, afii saŋŋ eho moŋ, shi gbɛgbalɔi krɛdɛɛi kã he amɛmiifee nɔkwɛmɔnɔ kpakpa yɛ anɔkwayeli he, ni esa akɛ wɔkase amɛ.—Heb. 6:12.
2 Amɛnyiɛ Nitsumɔ lɛ Hiɛ: Shishijee lɛ, gbɛgbalɔi krɛdɛɛi nyiɛɔ shiɛmɔ nitsumɔ lɛ hiɛ kɛtsɔ shiɛmɔ wiemɔi ni amɔmɔ awo gramafon bibii komɛi anɔ ni amɛtswaa yɛ shiatsɛmɛi lɛ ashĩai amli lɛ nɔ. Kɛfata he lɛ, no mli lɛ ayɛ Biblia saji ni amɔmɔ awo plɛtei anɔ, ni no ji nɔ ni kɛ́ amɛmiifee sɛɛkuu-kɛsaramɔ lɛ, amɛtswaa amɛhaa shiatsɛmɛi lɛ. No mli lɛ, maŋtiasei wuji ni ato asafoi yɛ jɛmɛ momo lɛ amli enɛ yaa nɔ yɛ. Sɛɛ mli lɛ, atsu gbɛgbalɔi krɛdɛɛi kɛtee hei ni Maŋtsɛyeli jajelɔi babaoo ahe ehia yɛ lɛ. Amɛnane kpaaa yɛ mɛi ni yɔɔ wiemɔ lɛ he miishɛɛ lɛ ashĩai amli, ni amɛkɛ amɛ fee Biblia mli nikasemɔ. Ekãa ni amɛkɛtsu nii lɛ ha ato asafoi heei babaoo. Deŋme ni amɛgbo yɛ sanekpakpa lɛ jajemɔ lɛ mli lɛ fata he ni asafo lɛ eshwere taakɛ wɔnaa ŋmɛnɛ lɛ. (Yes. 60:22) Gbɛgbalɔi krɛdɛɛi kã he amɛmiitsu gbɛfaŋnɔ ko ni he hiaa waa he nii yɛ sanekpakpa lɛ ni ashiɛɔ atsɔɔ “bɔɔ nii fɛɛ ni yɔɔ ŋwɛi shishi lɛ” mli.—Kol. 1:23.
3 Amɛsa Kasemɔ: Gbɛgbalɔi krɛdɛɛi komɛi kɛ afii babaoo ehi be-fɛɛ sɔɔmɔ nitsumɔ lɛ mli. Shihilɛi srɔtoi ni hii kɛ yei anɔkwafoi nɛɛ kɛkpe yɛ afii ni eho lɛ amli lɛ ewaje amɛhemɔkɛyeli lɛ. (1 Pet. 1:6, 7) Amɛkɛ miishɛɛ ni amɛbaaná yɛ heloonaa nibii amli lɛ shãa afɔle ni amɛyasɔmɔɔ yɛ hei ni hiamɔ da yɛ lɛ. Amrɔ nɛɛ, amɛteŋ mɛi komɛi egbɔlɔ, ni helai kɛ naagbai krokomɛi miihao amɛ. (2 Kor. 4:16, 17) Kɛlɛ, amɛkã he “amɛ[mii]wo yibii yɛ gbɔlɛ mli.” (Lala 92:15) Amɛkɛ amɛhe fɔ̃ɔ Yehowa nɔ, ni ejɔɔ amɛ.—Lala 34:9; Abɛi 10:22.
4 Yɛ anɔkwale mli lɛ, esa akɛ wɔjie gbɛgbalɔi krɛdɛɛi lɛ ayi. Kɛ́ duromɔ naa ni gbɛgbalɔi krɛdɛɛi komɛi miisɔmɔ yɛ nyɛsafo lɛ mli lɛ, no lɛ ŋɔɔ hegbɛ lɛ ni okɛ amɛ ata shi nyɛgba sane koni okase nii kɛjɛ amɛniiashikpamɔi lɛ amli. Ohiɛ asɔ anɔkwayeli ni amɛkɛsɔmɔɔ ákɛ Maŋtsɛyeli jajelɔi lɛ. Ha amɛshifimɔ lɛ awo bo hewalɛ. Yehowa baajɔɔ mɛi fɛɛ ni kaseɔ amɛhemɔkɛyeli lɛ hu, ni amɛhiɛ baaba nyam yɛ ehiɛ ejaakɛ “mɛi ni yeɔ anɔkwa lɛ, enáa amɛhe miishɛɛ.”—Abɛi 12:22.