Ani Obaanyɛ Obote ‘Shinaa Kpeteŋkpele ni Agbele Naa Kɛha Nitsumɔ Pii’ lɛ Mli?
1. Mɛɛ “shinaa kpeteŋkpele” agbele naa aha wɔ ‘kɛha nitsumɔ pii’?
1 Beni agbele “shinaa kpeteŋkpele naa aha” bɔfo Paulo ‘kɛha nitsumɔ pii’ lɛ, ekɛ miishɛɛ ŋɔ hegbɛ lɛ ni etee nɔ eshiɛ yɛ mɛi babaoo ni te shi wo lɛ lɛ fɛɛ sɛɛ. (1 Kor. 16:9) Ŋmɛnɛ lɛ, yɛ jeŋ fɛɛ lɛ Maŋtsɛyeli shiɛlɔi aaafee 642,000 ebote shinaa kpeteŋkpele ni agbele naa kɛha nitsumɔ pii lɛ mli kɛtsɔ amɛhe ni amɛkɛwo daa gbɛgbamɔ nitsumɔ lɛ mli lɛ nɔ.
2. Mɛni hewɔ nilee yɔɔ mli akɛ wɔɔpɛi wɔshihilɛ mli yɛ be kɛ beaŋ lɛ?
2 Shihilɛi Tsakeɔ: Eyɛ mli akɛ ekolɛ wɔshihilɛ eŋmɛŋ wɔ gbɛ koni wɔtsu babaoo amrɔ nɛɛ moŋ, shi shihilɛi tsakeɔ. No hewɔ lɛ, nilee yɛ mli akɛ wɔɔpɛi wɔshihilɛ mli wɔkwɛ yɛ be kɛ beaŋ ni wɔkamɛ kɛha shihilɛi ni hi jogbaŋŋ dani wɔkpɛ wɔyiŋ akɛ wɔbaatsu babaoo. (Jaj. 11:4) Ani oji oblanyo loo oblayoo ni miihe agbe skul naa? Ani oji fɔlɔ ni etsɛŋ ni obii lɛ baabɔi skulyaa? Ani eshwɛ fioo ni obaaba nitsumɔ mli hejɔɔmɔ? Shihilɛ mli tsakemɔi nɛɛ baanyɛ aha oná be pii ni baaŋmɛ bo gbɛ koni okɛ ohe awo daa gbɛgbamɔ nitsumɔ lɛ mli. Nyɛmiyoo ko ni kɛ gbɔmɔtsoŋ hewalɛnamɔ he naagbai kpe be ko ni eho lɛ kpɛ eyiŋ akɛ ekɛ ehe baawo gbɛgbamɔ nitsumɔ lɛ mli beni eye afii 89. Mɛni hewɔ? Akɛni eyako helatsamɔhe afi kɛ sɛɛ nɛ hewɔ lɛ, enu he akɛ egbɔmɔtsoŋ hewalɛnamɔ baaŋmɛ lɛ gbɛ koni ekɛ ehe awo gbɛgbamɔ nitsumɔ lɛ mli.
3. Mɛɛ gbɛ nɔ mɛi komɛi efee tsakemɔi koni amɛnyɛ amɛkɛ amɛhe awo daa gbɛgbamɔ nitsumɔ lɛ mli?
3 Yɛ Paulo gbɛfaŋ lɛ, no mli lɛ eto eyiŋ akɛ ebaafã gbɛ kɛyasara nyɛmimɛi ni yɔɔ Korinto lɛ. Shi kɛlɛ, sanekpakpa lɛ hewɔ lɛ etsake ejwɛŋmɔ. Mɛi babaoo ni kɛ amɛhe ewo daa gbɛgbamɔ nitsumɔ lɛ mli ŋmɛnɛ lɛ fee tsakemɔi babaoo koni amɛnyɛ amɛtsu gbɛgbamɔ nitsumɔ lɛ. Mɛi komɛi eha amɛshihilɛi efee mlɛo aahu akɛ nitsumɔ ni akɛ be fã tsuɔ haa amɛnáa shika kɛtsuɔ amɛshihilɛ ni efee mlɛo lɛ mli hiamɔ nii ahe nii. Amɛná miishɛɛ yɛ amɛsɔɔmɔ hegbɛ nɛɛ mli. (1 Tim. 6:6-8) Gbalashihilɛ mli hefatalɔi komɛi efee tsakemɔi ni baaŋmɛ amɛ gbɛ koni wu lɛ pɛ atsu nii, bɔni afee ni ŋa lɛ anyɛ ekɛ ehe awo daa gbɛgbamɔ nitsumɔ lɛ mli.
4. Kɛ́ wɔbɛ nɔmimaa akɛ wɔbaanyɛ wɔshɛ ŋmɛlɛtswai ni ataoɔ lɛ he lɛ, mɛni wɔbaanyɛ wɔfee?
4 Ohe akafee oya kɛmu sane naa akɛ onyɛŋ otsu gbɛgbamɔ nitsumɔ lɛ, yɛ gbeyei ni osheɔ akɛ onyɛŋ oná ŋmɛlɛtswai abɔ ni ataoɔ lɛ hewɔ. Ŋmɛlɛtswai enyɔ kɛ fioo pɛ ataoɔ yɛ odɛŋ daa gbi. Kɛ́ obɛ nɔmimaa akɛ obaanyɛ ofee enɛ lɛ, no lɛ kaa gbɛgbalɔi awamɔ nitsumɔ lɛ nyɔŋ kome loo nyɔji enyɔ okwɛ, ni okɛma ohiɛ akɛ obaaná ŋmɛlɛtswai 70 yɛ eko fɛɛ eko mli. Enɛ baaha osa miishɛɛ babaoo ni yɔɔ gbɛgbamɔ nitsumɔ lɛ mli lɛ naa okwɛ. (Lala 34:9) Okɛ mɛi ni miitsu gbɛgbamɔ nitsumɔ lɛ amrɔ nɛɛ lɛ agba sane. Ekolɛ amɛkɛ naagbai ni tamɔ onɔ̃ lɛ kpe ni amɛtsu he nii. (Abɛi 15:22) Bi Yehowa ní ejɔɔ mɔdɛŋ ni obɔɔ koni olɛɛ osɔɔmɔ nitsumɔ lɛ mli lɛ nɔ.—1 Yoh. 5:14.
5. Mɛni hewɔ daa gbɛgbamɔ nitsumɔ lɛ ji nitsumɔ ni sɛɛnamɔ yɔɔ he lɛ?
5 Nitsumɔ ni Sɛɛnamɔ Yɔɔ He: Daa gbɛgbamɔ nitsumɔ lɛ ni akɛ he woɔ mli lɛ kɛ jɔɔmɔi babaoo baa. Ehaa onáa miishɛɛ kpele ni jɛɔ nihamɔ babaoo mli kɛbaa lɛ eko. (Bɔf. 20:35) Daa gbɛgbamɔ nitsumɔ lɛ baaha ohe asa kɛja Nyɔŋmɔ Wiemɔ ni ji anɔkwale lɛ mli pɛpɛɛpɛ. (2 Tim. 2:15) Ebaaha oná Yehowa dɛŋ jɔɔmɔi yɛ gbɛ̀i babaoo nɔ. (Bɔf. 11:21; Fil. 4:11-13) Gbɛgbamɔ nitsumɔ lɛ baaye aye abua bo ní oná Nyɔŋmɔjamɔ sui, tamɔ tsuishiŋmɛɛ nɛkɛ, ni ebaaha obɛŋkɛ Yehowa kpaakpa. (Yak. 4:8) Ani obaanyɛ obote shinaa kpeteŋkpele ni agbele naa kɛha nitsumɔ pii lɛ mli ni obatsɔ daa gbɛgbalɔ?