Okɛ nɔ ní Ŋmalɛ lɛ Kɛɔ yɛ Yarafeemɔ He lɛ Atsu Nii—Fã 1

1. Te gbele saa wɔ fɛɛ wɔhe ehaa tɛŋŋ, ni mɛɛ naagbai Yehowa Odasefoi kɛkpeɔ kɛ́ amɛsuɔlɔ ko gbo?

¹ Adesai enu piŋmɔ ni jɛɔ suɔlɔ ko gbele mli kɛbaa lɛ he yɛ yinɔsane mli fɛɛ. Nyɔŋmɔ webii lɛ hu nuɔ piŋmɔ he nakai nɔŋŋ. Taakɛ ebalɛ yɛ Yesu gbɛfaŋ lɛ, anɔkwa Kristofoi yeɔ awerɛho kɛ́ amɛnaanyo ko loo amɛwekunyo ko gbo. (Yoh. 11:33, 35) Ebɛ mlɛo akɛ mɔ ko aaakpee esuɔlɔ ko gbele naa, ni esa akɛ wɔshɛje mɔ ni agbo yɛ enɔ lɛ mii, ní wɔjɛ suɔmɔ mli wɔye wɔbua lɛ. Enɛ he miihia, titri lɛ yɛ hei ni apasa hemɔkɛyeli ehe shi waa, ni asheɔ gbohii agbeyei yɛ lɛ. Yɛ hei ni tamɔ nɛkɛ lɛ, wekumɛi kɛ akutsoŋbii ni heee yee lɛ baanyɛ anyɛ Kristofonyo ni agbo yɛ enɔ lɛ nɔ ní ekɛ ehe awo yarafeemɔ he kusumii ni kɛ ŋmalɛ lɛ kpãaa gbee lɛ mli. Te wɔɔfee tɛŋŋ wɔkpee awerɛho shihilɛ ni gbele kɛbaa lɛ naa, ní yɛ nakai beaŋ nɔŋŋ lɛ wɔkɛ wɔhe wooo yarafeemɔ nifeemɔi kɛ kusumii komɛi ni esaaa Nyɔŋmɔ hiɛ lɛ amli?

2. Mɛɛ shihilɛ mli gbohii lɛ yɔɔ, ni kɛ́ Biblia lɛ wie akɛ gbohii lɛ leee nɔ ko nɔ ko lɛ, mɛni diɛŋtsɛ ji nɔ ni etsɔɔ lɛ?

² Yɔsemɔ Anɔkwale ni Kɔɔ Gbele he Lɛ: Biblia lɛ kɛɔ akɛ: “Hiɛkalɔi le akɛ amɛbaagboi; shi gbohii lɛ, amɛleee nɔ ko nɔ ko . . . Amɛsuɔmɔ jio, amɛnyɛɛ jio, amɛwuŋayeli jio, fɛɛ eho etee jeeŋmɔ beebe . . . Nitsumɔ loo yiŋshwiemɔ loo nilee loo ŋaa ko bɛ gbohiiaje he ni oyaa lɛ.” (Jaj. 9:5, 6, 10; Lala 146:4). Kɛ́ mɔ ko gbo lɛ, eleee nɔ ko dɔŋŋ. Enuuu nɔ ko he, enyɛɛɛ ekɛ mɔ ko ashara, ni enuuu nɔ ni mɛi wieɔ loo amɛfeɔ lɛ shishi dɔŋŋ. Ákɛ anɔkwa Kristofoi lɛ, enɛ ji shishijee Biblia mli anɔkwale ni saa bɔ ni wɔfeɔ wɔnii wɔhaa kɛ́ agbo yɛ wɔnɔ lɛ he lɛ ateŋ ekome.

3. (a) Nɛgbɛ hemɔkɛyeli akɛ gbohii lɛ amumɔi lɛ náa hiɛkalɔi lɛ ashihilɛ nɔ hewalɛ lɛ jɛ? (b) Mɛɛ gbɛ nɔ Romabii 12:9 lɛ baanyɛ aye abua Yehowa webii fɛɛ koni amɛná susumɔ ni ja yɛ apasa tsɔɔmɔ nɛɛ he?

³ Kwɛmɔ Ohe nɔ Jogbaŋŋ yɛ Tsɔɔmɔi ni Gbeɔ Nyɔŋmɔ he Guɔ lɛ Ahe: Yehowa ha efee faŋŋ kɛha Adam kɛ Hawa yɛ Eden trom lɛ mli akɛ, kɛ́ amɛbooo Emla lɛ toi lɛ, ‘amɛbaagboi.’ (1 Mose 2:17) Shi Satan kɛɛ amɛ akɛ kɛ́ amɛgbo Nyɔŋmɔ nɔ toi lɛ, ‘amɛgboŋ.’ (1 Mose 3:4) Sɛɛ mli lɛ Satan kɛ amale kroko ba: Ekɛɛ gbohii lɛ gboiko, ni amɛle nibii ni yaa nɔ, ni amɛhiɛ kamɔ yɛ mumɔi ashihilɛhe ko. Nɛkɛ amale nɛɛ gbe Yehowa kɛ egbɛi lɛ he guɔ. Yɛ mɛi ni jáa Yehowa lɛ agbɛfaŋ lɛ, hemɔkɛyeli akɛ gbohii lɛ le nibii ni yaa nɔ, ni ákɛ amɛnyɛɔ amɛnáa hiɛkalɔi anɔ hewalɛ lɛ ji amale diɛŋtsɛ. Enɛ ji nibii titrii ni Satan tsɔɔ nɔ ekɛlakaa mɛi, ní ekɛtsĩmɔɔ Biblia mli anɔkwalei anɔ hu lɛ ateŋ ekome. Eji tsɔɔmɔ ni esa akɛ mɛi fɛɛ ni sumɔɔ Nyɔŋmɔ lɛ anyɛ̃ diɛŋtsɛ! (Rom. 12:9) Ani onyɛ̃ɔ tsɔɔmɔ nɛɛ?

4. (a) Te 5 Mose 18:9-13 lɛ yeɔ ebua wɔ ni wɔnuɔ bɔ ni Yehowa nuɔ kusumii ni he tseee lɛ ahe ehaa tɛŋŋ? (b) Taakɛ 2 Korintobii 6:15-17 lɛ tsɔɔ lɛ, te esa akɛ anɔkwa Kristofoi fɛɛ afee amɛnii yɛ kusumii kɛ nifeemɔi ni kɛ hemɔkɛyeli ni ayɔɔ akɛ gbohii lɛ le nibii ni yaa nɔ, ni amɛbaanyɛ amɛná hiɛkalɔi anɔ hewalɛ lɛ he amɛha tɛŋŋ?

⁴ Yehowa fã Israelbii lɛ ni amɛtsĩ amɛhe kwraa kɛjɛ kusumii loo nifeemɔi ni kɛ apasa hemɔkɛyeli yɔɔ tsakpãa lɛ ahe. (5 Mose 18:9-13) Klɛŋklɛŋ afi 100 lɛ mli Kristofoi lɛ hu tsi amɛhe kɛjɛ apasa hemɔkɛyelii ahe. (2 Kor. 6:15-17; Kpoj. 21:8) Ekɔɔɔ he eko hewolonɔ su ní Yehowa Odasefoi ni yɔɔ ŋmɛnɛ lɛ hiɛ, weku mli ni amɛjɛ, kɛ maŋ nɔ heni amɛjɛ lɛ, amɛhu amɛkpoɔ kusumii fɛɛ ni fĩɔ hemɔkɛyeli ni ahiɛ akɛ gbohii lɛ le nibii ni yaa nɔ, ni amɛnáa hiɛkalɔi lɛ anɔ hewalɛ lɛ sɛɛ lɛ.

5. (a) Mɛni Ŋmalɛi lɛ kɛɔ wɔ yɛ yarafeemɔ kusumii ahe? (Okɛto Yohane 19:40; 3 Mose 21:5; kɛ 5 Mose 14:1, 2 lɛ he.) (b) Taakɛ atsɔɔ mli yɛ Hebribii 5:14 lɛ, mɛni esa akɛ wɔ fɛɛ wɔfee koni wɔkɛ wɔhe akawo yarafeemɔ kusumii ni he tseee lɛ amli?

⁵ Kusumii Srɔtoi lɛ Ahe ní Wɔɔsusu: Ŋmalɛi lɛ haa wɔnaa akɛ jeee kusumii fɛɛ ni kɔɔ yarafeemɔ he lɛ kɛ apasa hemɔkɛyeli yɔɔ tsakpaa. Ákɛ nɔkwɛmɔnɔ lɛ, ‘aŋɔ Yesu gbonyo lɛ, ni akɛ klalai lɛ kɛ tsofai lɛ fimɔ lɛ, tamɔ bɔ ni Yudafoi feɔ ni amɛkɛ fũɔ mɔ lɛ.’ (Yoh. 19:40) Shi Nyɔŋmɔ webii lɛ kpoo kusumii krokomɛi ni fĩɔ hemɔkɛyeli ni ahiɛ akɛ gbohii lɛ le nibii ni yaa nɔ yɛ shihilɛ mli lɛ kwraa. (3 Mose 19:28; 21:5; 5 Mose 14:1, 2) Ŋmɛnɛ, yɛ je lɛŋ he fɛɛ he lɛ, kusumii kɛ nifeemɔi ni kɔɔ gbele he lɛ kɛ hemɔkɛyeli nɛɛ yɛ tsakpaa tɛ̃ɛ loo ekɔɔ he yɛ gbɛ kroko nɔ. Nakai nɔŋŋ eji yɛ Ghana maŋ nɛɛ mli. Kwɛ bɔ ni ehe hiaa akɛ wɔɔtsɔse ‘wɔhenumɔ nii lɛ ni ele ekpakpa kɛ efɔŋ mlikpamɔ.’ (Heb. 5:14) Enɛ baaye abua koni wɔyɔse kusumii ni kɛ Biblia mli anɔkwalei kpãa gbee kɛ nɔ ni kɛ lɛ kpãaa gbee lɛ. Mɛɛ Biblia mli shishitoo mla baanyɛ aye abua wɔ yɛ sane nɛɛ mli?

6. (a) Mɛɛ shidaamɔ ni yɔɔ shiŋŋ 2 Korintobii 6:14-17 lɛ woɔ wɔ hewalɛ ni wɔkɔ, ni mɛɛ saji esa akɛ wɔbi wɔhe? (b) Taakɛ Kojolɔi 2:12 lɛ tsɔɔ lɛ, kɛ́ wɔkɛ wɔhe wo yarafeemɔ he kusumii ni kɛ Biblia lɛ kpãaa gbee lɛ amli lɛ, mɛni wɔfeɔ lɛ?

⁶ Shishitoo Mlai lɛ ní Wɔkɛaatsu Nii: Esaaa akɛ mɛi ni sumɔɔ ni amɛná Nyɔŋmɔ hiɛ duromɔ lɛ kɛ mɛi ni heee yeee lɛ gbalaa kɔŋtso kome ni yeee egbɔ. Biblia lɛ kɛɔ akɛ: “Yehowa kɛɛ ‘Nyɛjea amɛteŋ, ni nyɛtsea nyɛhe, ni nyɛkataa muji nɔ ko he.’” (2 Kor. 6:14, 17) Wɔbaanyɛ wɔdamɔ shishitoo mla nɛɛ nɔ wɔbi wɔhe akɛ, ‘Ani yarafeemɔ kusum ko yɛ ni ekɛ hemɔkɛyeli ni ayɔɔ akɛ mɛi ni egboi lɛ amumɔ baanyɛ aná hiɛkalɔi anɔ hewalɛ lɛ yɛ tsakpãa?’ Kɛ́ tsakpãa ko tamɔ nakai yɛ yarafeemɔ kusum ko he lɛ, belɛ ebaanyɛ eye awui fe ŋkɔmɔ kɛkɛ ni ayeɔ. Ebaafee apasa jamɔ nifeemɔ. Nifeemɔ ni tamɔ nɛkɛ baawo Yehowa, ni ji anɔkwa Nyɔŋmɔ lɛ mlila, ni ekpɛlɛŋ nɔ.—Okɛto Kojolɔi 2:12 lɛ he.

7. (a) Mɛɛ shishitoo mla ni yɔɔ 1 Korintobii 10:32 lɛ baanyɛ aye abua wɔ yɛ sane nɛɛ mli? (b) Mɛni Luka 11:52 kɛ Mateo 18:6 lɛ kɛɔ wɔ yɛ bɔ ni Yehowa nuɔ he ehaa yɛ mɛi krokomɛi anane ni aaatɔ̃tɔ̃ lɛ he?

⁷ Shishitoo mla ni ji enyɔ ni yɔɔ 1 Korintobii 10:32 lɛ kɛɔ akɛ: “Nyɛkatsɔmɔa pampii nyɛhaa Yudafoi kɛ Helabii kɛ Nyɔŋmɔ asafo lɛ fɛɛ.” Te esa ákɛ akɛ shishitoo mla nɛɛ atsu nii aha tɛŋŋ? Ale Yehowa Odasefoi jogbaŋŋ akɛ mɛi ni tsɔɔ Biblia mli anɔkwale ni kɛɔ akɛ gbohii lɛ leee nɔ ko nɔ ko, ni ákɛ amɛnyɛɛɛ amɛye amɛbua hiɛkalɔi loo amɛye hiɛkalɔi lɛ awui ko hu lɛ. No hewɔ lɛ, kɛ́ asafo lɛ mlinyo ko kɛ ehe wo yarafeemɔ kusum ko ni kɛ gbohii lɛ gbeyei ni asheɔ lɛ yɔɔ tsakpãa ko lɛ mli lɛ, mɛni baaba? Ehe ní ekɛwoɔ nakai kusum nifeemɔ lɛ mli lɛ baato mɛi ni le nɔ ni Yehowa Odasefoi heɔ amɛyeɔ kɛ nibii ni amɛtsɔɔ ni kɔɔ gbohii lɛ ahe lɛ pampi. Kɛ́ Yehowa na akɛ atɔ̃tɔ̃ mɛi komɛi anane lɛ, edɔɔ lɛ waa, ni enɛ baanyɛ aha mɛi akabo Maŋtsɛyeli shɛɛ sane lɛ toi.—Mat. 18:6; Luka 11:52.

8. (a) Mɛɛ srɔtofeemɔ yɔɔ wɔ kɛ mɛi ni yɔɔ je lɛ mli lɛ teŋ? (Nyɛkanea Filipibii 2:15 lɛ ni nyɛkɛto sane nɛɛ he.) (b) Mɛɛ gbɛ nɔ suɔmɔ ni wɔyɔɔ kɛha Yehowa lɛ saa yiŋ ni wɔkpɛɔ lɛ he?

⁸ Nyɛnyɛ̃a Nɔ̃ Fɔŋ: Kɛ́ mɛi ni heee yeee lɛ kɛ amɛhe wo kusumii ni tamɔ enɛɛmɛi lɛ amli lɛ, bei pii lɛ amɛleee akɛ amɛkɛ amɛhe miiwo apasa jamɔ mli. Ni bei pii lɛ amɛnuuu nɔ hewɔ ni wɔsumɔɔɔ ni wɔkɛ wɔhe woɔ kusum nifeemɔi ni he tseee lɛ amli lɛ shishi. No hewɔ lɛ, ebɛ mlɛo akɛ wɔɔkɔ shidaamɔ ní tamɔ nɛkɛ, ni enɛ baanyɛ aka suɔmɔ ni wɔyɔɔ kɛha Yehowa lɛ, kɛ anɔkwa ni wɔyeɔ lɛ lɛ waa diɛŋtsɛ. Wɔmiisumɔ ni wɔhi shi akɛ mɛi ni ‘shwamɔ ko bɛ amɛhe, ni kpa ko bɛ amɛhe.’ (Fil. 2:15) Suɔmɔ ni wɔyɔɔ kɛha Yehowa lɛ tsirɛɔ wɔ koni ‘wɔhi efɔŋ kwraa, ni wɔkpɛtɛ ekpakpa he.’ (Rom. 12:9) Wɔle jogbaŋŋ akɛ kɛ́ wɔkɛ wɔhe wo nifeemɔ ko ní kɛ hemɔkɛyeli ni ayɔɔ akɛ gbohii lɛ le nibii ni yaa nɔ, ni ákɛ, amɛnáa hiɛkalɔi lɛ anɔ hewalɛ lolo lɛ mli lɛ, ebaafee nɔ ni ejaaa gbɛ loo osatofeemɔ po. Yɛ nɛkɛ shishitoo mlai nɛɛ ahewɔ lɛ, nyɛhaa wɔsusua yarafeemɔ he kusumii komɛi ni yaa nɔ yɛ hei ní wɔyɔɔ lɛ ahe jogbaŋŋ wɔkwɛa.

Kusumii ni Afeɔ Dani Afũɔ Gbonyo lɛ

9. (a) Bei pii lɛ mɛɛ kusum afeɔ kɛ́ aju gbonyo lɛ he ní asaa lɛ koni ayafũ lɛ lɛ? (b) Mɛni hewɔ mɛi komɛi feɔ nibii nɛɛ?

⁹ Gbonyo lɛ Saamɔ: Ekolɛ falefalefeemɔ hewɔ lɛ, abaaju gbonyo lɛ he dani ayafu lɛ. (Bɔf. 9:37) Shi esaaa akɛ wɔkɛ wɔhe woɔ nifeemɔ ni kɛ ŋmalɛ lɛ kpãaa gbee, ni ji gbonyo lɛ ni asaa lɛ koni eyatsa eshihilɛ lɛ nɔ yɛ heni eyaa lɛ mli. Kɛ́ mɛi ni sheɔ gbonyo gbeyei lɛ miisaa gbonyo lɛ, ekolɛ amɛbaaye ŋkpai, ni amɛbaajie gbonyo lɛ waonaa kɛ ehe tsɔi koni sɛɛ mli lɛ akɛtsu nii kɛha fũu ni ji enyɔ. Awoɔ baa ni akɛjuɔ gbonyo lɛ he. Ekolɛ akɛ sɛbɛ loo wɔŋ-kpãai baawo gbonyo lɛ atade lɛ loo gbonyo adeka lɛ mli. Mɛi komɛi heɔ amɛyeɔ akɛ enɛɛmɛi fɛɛ he miihia bɔni afee ni gbonyo lɛ anyɛ ayashɛ blematsɛmɛi lɛ aŋɔɔ shweshweeshwe.

10. (a) Kɛ́ mɔ ni egbo lɛ ji heyelilɔ lɛ, mɛni hewɔ ebaafee nɔ ni nilee bɛ mli akɛ abaaŋmɛ wekumɛi ni heee yeee lɛ agbɛ ni amɛsaa gbonyo lɛ kɛha fũu lɛ? (b) Kɛ́ wekumɛi ni heee yeee lɛ ŋɔ gbonyo lɛ ni amɛyafee kusumii ni tsɔɔ fũu hiɛ lɛ, mɛni esa akɛ wɔfee?

¹⁰ Yɛ maji komɛi amli lɛ, weku lɛ mli bii pɔtɛɛ komɛi ji mɛi ni saa gbonyo lɛ kɛha efũu. Kɛ́ mɔ ni egbo lɛ ji heyelilɔ dani egbo lɛ, esa akɛ nyɛmimɛi lɛ abɔ mɔdɛŋ fɛɛ ní amɛbaanyɛ ni amɛkwɛ ni wekumɛi ni jeee heyelilɔi lɛ akafee amɛ diɛŋtsɛ amɛkusum ni kɛ Biblia lɛ kpãaa gbee amɛha gbonyo lɛ. Ekã shi faŋŋ akɛ, eji wɔnyɛmi lɛ yɛ wala mli kulɛ, ekpɛlɛŋ nifeemɔ ni tamɔ enɛ nɔ. Shi kɛ́ yɛ wɔmɔdɛŋbɔɔ lɛ fɛɛ sɛɛ lɛ, wekumɛi ni heee yeee lɛ ekpɛlɛɛɛ, ni amɛŋɔ gbonyo lɛ, wɔkɛ wɔhe woŋ amɛnifeemɔi ni kɛ Biblia lɛ kpãaa gbee lɛ amli kwraa. Ni wɔyɛ hekɛnɔfɔɔ akɛ wekumɛi ni heee yeee lɛ nyɛŋ afee nɔ ko ni baatsi wala ni wɔsuɔlɔ ni egbo lɛ baaná wɔsɛɛ lɛ naa. Nyɛmi lɛ kɛ anɔkwayeli sɔmɔ Yehowa aaahu kɛyashi egbo, ni Yehowa hiɛ kpaŋ enɔ.

11. (a) Mɛni hewɔ ni kɛ́ Kristofonyo ko kpɛ eyiŋ akɛ ehaaa ni akɛ gbonyo lɛ afɔ̃ shi kɛha kwɛmɔ lɛ, esaaa akɛ awieɔ ashiɔ lɛ lɛ? (b) Kɛ́ akɛ gbonyo lɛ baafɔ̃ shi kɛha kwɛmɔ lɛ, te esa akɛ afee lɛ tɛŋŋ?

¹¹ Gbonyo lɛ ni Akɛ Aaafɔ̃ Shi Kɛha Kwɛmɔ:a Kɛji akɛ weku lɛ mli bii lɛ baasumɔ ni akɛ gbonyo lɛ afɔ̃ shi kɛha kwɛmɔ jio, amɛsumɔŋ ni amɛfee nakai jio lɛ, eji amɛ diɛŋtsɛ amɛyiŋkpɛɛ. Kɛ́ weku ko ní mlibii lɛ ji Kristofoi lɛ kpɛ amɛyiŋ akɛ amɛsumɔŋ ni afee enɛ yɛ amɛ diɛŋtsɛ amɛyiŋkpɛi komɛi ahewɔ lɛ, esaaa akɛ awieɔ ashiɔ amɛ. Kɛ́ amɛkpɛ amɛyiŋ akɛ amɛkɛ gbonyo lɛ baafɔ̃ shi kɛha kwɛmɔ lɛ, no lɛ esa akɛ asusu bɔ ni abaafee lɛ aha lɛ he jogbaŋŋ bɔni afee ni ekafee nɔ ni yɔɔ haŋtsii, ni ekafee nɔ ni kɛ Kristofoi ahemɔkɛyeli hu kpãaa gbee.

12. (a) Mɛɛ kusumii ni tsɔɔ fũu hiɛ mɛi ni lé anɔkwale lɛ kɛ amɛhe woɔ mli? (b) Mɛni hewɔ ebafeŋ nɔ ni sa akɛ anɔkwa Kristofoi kɛ amɛhe baawo nifeemɔi ni tamɔ nɛkɛ lɛ amli lɛ?

¹² Yɛ hei komɛi lɛ, bei pii lɛ asaa gbonyo lɛ afɔ̃ɔ saatso ko ni ajegbɛ akɛ nibii esaa he jogbaŋŋ nɔ. Kɛ́ yoo ji mɔ ni egbo lɛ, ekolɛ abaawo lɛ ayemforo atade yɛŋ, ni abaawo lɛ jwinei kɛ ashinaoi babaoo, ni akɛ hesaamɔ nibii ni akɛkpaa hiɛ saa lɛ. Nɔ ni afɔɔ feemɔ amrɔ nɛɛ ji akɛ, afeɔ mɔ ni egbo lɛ mfoniri awoɔ atadei, klaladukui, nibii ni akɛ samfei tsotsoroɔ he, papai, kɔɔpoi, kɛ nibii krokomɛi ahe. Afeɔ enɛ ni ajaa koni mɛi ni baaya yara lɛ awo loo ahiɛ kɛnyiɛ yara lɛ nɔ. Akɛ mɔ ni egbo lɛ mfoniri kpɛtɛɔ mɛi ni eba yara lɛ atadei ahe. Ani nilee yɛ mli akɛ wɔkɛ wɔhe baawo je lɛŋ nifeemɔi ni tamɔ enɛɛmɛi lɛ amli? Dabi. Kɛfata he lɛ, nakai feemɔ tsɔɔ akɛ aajá mɔ ni egbo lɛ diɛŋtsɛ.

13. (a) Mɛɛ Ŋmalɛ naa shishitoo mla kroko hu woɔ wɔ hewalɛ koni wɔtsi wɔhe kwraa kɛjɛ je lɛŋ kusumii lɛ ahe (Nyɛkanea 1 Yohane 2:15, 16 lɛ ni nyɛkɛto sane lɛ he.) (b) Kusumii nɛɛ ni wɔkɛ wɔhe aaawo mli lɛ kɛ mɛni baaba Yehowa gbɛi lɛ kɛ ewebii lɛ anɔ? (Nyɛkanea Efesobii 5:10, 11, 15, 16 lɛ ni nyɛkɛto sane lɛ he.)

¹³ Eyɛ mli akɛ Biblia lɛ ewieee nibii fɛɛ ni kɔɔ yarafeemɔ he moŋ, shi mɛi ni edara yɛ mumɔŋ lɛ le akɛ nifeemɔi ni tamɔ nɛkɛ lɛ ‘jɛɛɛ Nyɔŋmɔ ŋɔɔ, shi moŋ je lɛ mli ejɛ.’ (1 Yoh. 2:15, 16) Kɛ́ wɔkɛ wɔhe wo nifeemɔi ni tamɔ enɛɛmɛi amli lɛ, no baaha mɛi ni heee yeee lɛ kɛ amɛhe awo nifeemɔi ni esaaa amli, tamɔ fó ni aaafó waa ni ehiii kpatamɔ, shika kɛ nibii krokomɛi ni akɛaafɔ̃ gbonyo lɛ masɛi, gbonyo lɛ ni aaafua, kɛ gbonyo lɛ ni akɛaawie tamɔ nɔ ni ehiɛ kã. Kɛ́ enɛ ba yɛ Kristofonyo ko yara nɔ, ekɛ heguɔgbee kpele baaba Yehowa gbɛi lɛ kɛ ewebii lɛ anɔ. Ekã shi faŋŋ akɛ wɔhe ni wɔɔtsi kɛjɛ kusumii ni mɛi ni yɔɔ mumɔŋ duŋ mli lɛ kɛ amɛhe woɔ mli lɛ ahe lɛ ji gbɛ ni hi fe fɛɛ ni wɔɔtsɔ nɔ wɔha yara lɛ yɛ lɛ afee nɔ ni sa, ni hi kɛha anɔkwa Kristofoi.—Efe. 5:15-17.

14. (a) Mɛni ji “kpeshii”? (b) Bei pii lɛ, mɛɛ be akɛ gbonyo lɛ baa shĩa dani ayafũɔ lɛ? (d) Mɛni mɛi fɔɔ feemɔ kɛ́ aashi kpé, ni mɛni hewɔ amɛsusuɔ akɛ nakai feemɔ he miihia lɛ? (e) Mɛni hewɔ esaaa akɛ anɔkwa Kristofoi shiɔ kpé lɛ?

¹⁴ Kpeshii: Kpeshii ji henaa ni abuaa yɛ mɔ ni egbo lɛ shĩa loo he kroko, ni ahiɔ gbonyo lɛ he jenamɔ muu fɛɛ. Bei pii lɛ kpeshii lɛ jeɔ shishi gbɛkɛ, ni etsaa nɔ aahu kɛyashiɔ jenamɔ yi waa. Esaaa akɛ asusuɔ akɛ kpeshii tamɔ weku ni agbo yɛ amɛnɔ lɛ shĩa ni abaaya ni ayashɛje amɛmii, ni aye amɛ ŋkɔmɔ yɛ be ni sa mli lɛ nɔŋŋ. Esoro enɛ yɛ kpeshii he. Bei pii lɛ, gbi dani enɔ jetsɛremɔ ní abaayafũ gbonyo lɛ, akɛ lɛ baa shĩa. Mɛi buaa amɛhe naa ni amɛláa, amɛsɔleɔ, ni amɛwieɔ gbonyo lɛ he ekpakpa kɛyashiɔ jetsɛremɔ. Asusuɔ akɛ nifeemɔ nɛɛ he miihia koni akɛbu gbonyo lɛ kɛ ewekumɛi ni yɔɔ wala mli lolo lɛ ahe kɛjɛ mumɔi fɔji ahe. Akɛni eyɛ faŋŋ akɛ kusum nɛɛ kɛ susumɔ ni ayɔɔ akɛ gbonyo lɛ mumɔ lɛ kã he eyɛ shihilɛ mli lolo lɛ yɛ tsakpãa hewɔ lɛ, anɔkwa Kristofoi jɛɔ nilee amɛtsiɔ amɛhe kɛjɛɔ kpeshii ni damɔɔɔ ŋmalɛ nɔ nɛɛ he. Kɛ́ be fioo ko pɛ wɔkɛ shi kpé po lɛ, ekɛ wɔfaishitswaa akɛ ‘wɔbaahi efɔŋ’ lɛ kpaŋ gbee.—Rom. 12:9.

15. (a) Kɛ́ heyelilɔ ko gbo lɛ, mɛni Odasefoi komɛi feɔ? (b) Kɛ́ wɔfee nakai lɛ, mɛni mɛi komɛi baanyɛ asusu? (d) Mɛɛ gbɛ nɔ wɔbaanyɛ wɔkɛ shishitoo mlai ni yɔɔ 2 Korintobii 6:17 kɛ Maleaki 3:18 lɛ atsu nii?

¹⁵ Kɛ́ asafo lɛ mlinyo ko gbo lɛ, esa akɛ wɔkwɛ jogbaŋŋ ní wɔkaha mɛi komɛi ná susumɔ lɛ akɛ wɔ hu wɔmiishi kpé yɛ gbɛ ko nɔ. Ákɛ nɔkwɛmɔnɔ lɛ, mɛni mɛi baasusu kɛ́ gbi gbɛkɛ dani enɔ jetsɛremɔ abaayafũ gbonyo lɛ, Odasefoi bua amɛhe naa yɛ heni gbonyo lɛ kã lɛ, ní amɛkɛ ŋmɛlɛtswai babaoo lá ni amɛsɔle lɛ? Eyɛ mli akɛ ekolɛ amɛhiɛ yiŋtoo ni ja yɛ enɛ feemɔ he moŋ, shi esa akɛ amɛsusu mɛi krokomɛi ahenilee he. (1 Kor. 10:23) Ani kɛ́ wɔto nifeemɔ nɛɛ lɛ he gbɛjianɔ gbɛkɛ lɛ, enyɛŋ etɔ̃tɔ̃ wɔnyɛmimɛi heyelilɔi krokomɛi ní le heni kpeshii shishifã jɛ lɛ anaji? Ani mɛi ni heee yeee lɛ baanyɛ amu sane naa akɛ Yehowa Odasefoi hu shiɔ kpé tamɔ jamɔi krokomɛi lɛ feɔ lɛ nɔŋŋ? Ekã shi faŋŋ akɛ, hegbɛi krokomɛi babaoo yɛ ni wɔbaanyɛ wɔtsɔ nɔ kɛye mɛi ni agbo yɛ amɛnɔ lɛ odase, ni wɔkɛshɛje amɛ mii. Esa akɛ shishitoo mlai nɛɛ ahe susumɔ atsirɛ wɔ ní wɔkafee nɔ ko ni baafee tamɔ nɔ ni wɔmiishi kpé. Nakai ni wɔbaafee lɛ baatsɔɔ akɛ esoro wɔ yɛ je lɛ he, ni ebaatsɔɔ hu akɛ wɔtswa wɔfai shi akɛ wɔbaatsi wɔhe kɛjɛ ‘muji nibii’ ahe.—2 Kor. 6:17; Mal. 3:18.

16. (a) Kɛ́ aato nifeemɔi ni tsɔɔ fũu hiɛ lɛ he gbɛjianɔ lɛ, mɛɛ ŋmalɛ esa akɛ asusu he? (b)  Bei pii lɛ, mɛɛ naagbai baa kɛ́ akɛ gbonyo lɛ ba shĩa gbi dani enɔ jetsɛremɔ abaayafũ lɛ, loo akɛtee akɛyatsɔ weku shĩa lɛ? (d)  Kɛ́ afee ekome kɛto nibii ahe gbɛjianɔ jogbaŋŋ lɛ, mɛni baanyɛ ajɛ mli kɛba?

¹⁶ Nilee babaoo yɛ ŋaawoo nɛɛ mli akɛ: “Hiɛtɛ̃lɔ naa efɔŋ ní baa, ni eteeɔ ehe; shi mɛi ni náko jwɛŋmɔ lɛ batsɔɔ he kɛhoɔ, ni amɛnaa nɔ̃.” (Abɛi 22:3) Eji anɔkwale akɛ Biblia mli shishitoo mla nɛɛ kɔɔ kpeshii hu he. Niiashikpamɔ etsɔɔ akɛ, kɛ́ akɛ gbonyo lɛ ba shĩa gbi dani enɔ jetsɛremɔ abaayafũ lɛ lɛ, ekɛ naagba baa. Naagbai krokomɛi hu baa kɛ́ akɛ gbonyo lɛ tee wekumɛi ni amɛjeee heyelilɔi lɛ ashĩa lɛ. Akɛni akɛ gbonyo lɛ ebafɔ̃ shi hewɔ lɛ, ehaa wekumɛi kɛ akutsoŋbii lɛ nuɔ he akɛ esa akɛ amɛbua amɛhe naa koni amɛlá ní amɛsɔle jenamɔ muu lɛ fɛɛ koni amɛkɛbu gbonyo lɛ he. Bei pii lɛ ashiɔ kpé aahu kɛyashiɔ beni afũɔ gbonyo lɛ. Bɔni afee ni shihilɛ ni tamɔ nɛkɛ akaba yɛ Kristofoi ayara feemɔ shishi lɛ, ebaahi akɛ wekumɛi ni ji heyelilɔi lɛ aaasusu gbi kɛ be pɔtɛɛ ni akɛ gbonyo lɛ baaba weku shĩa lɛ aloo heni akɛlɛ baafɔ̃ lɛ he. Kɛ́ ehe baahia ni akɛ gbonyo lɛ aba weku shĩa lɛ po lɛ, ebaafee nɔ ni ‘nilee’ yɔɔ mli akɛ abaaya ayawo lɛ gbi nɔ ni abaafũ lɛ lɛ moŋ fe ní abaayawo lɛ gbi gbɛkɛ dani enɔ jetsɛremɔ ni abaafũ lɛ lɛ. Eji anɔkwale akɛ, enɛ feemɔ ebafeŋ mlɛo yɛ shihilɛi komɛi amli, shi kɛ́ ato nibii ahe gbɛjianɔ jogbaŋŋ, ni afee ekome kɛtsu he nii lɛ, ebaanyɛ eye omanye. Enɛ ni wɔɔfee lɛ baaye abua wɔ ni wɔkatɔ̃tɔ̃ mɛi krokomɛi anane.—Abɛi 22:3.

17. Mɛni he wɔbaasusu yɛ Wɔ Maŋtsɛyeli Sɔɔmɔ ni baaba yɛ nyɔji ni baanyiɛ sɛɛ lɛ amli?

¹⁷ Abaasusu saji krokomɛi ni he hiaa ni kɔɔ yarafeemɔ he yɛ Wɔ Maŋtsɛyeli Sɔɔmɔ ni baaba yɛ nyɔji ni baanyiɛ sɛɛ lɛ amli. Ákɛ anɔkwa Kristofoi lɛ, sane nɛɛ baaye abua wɔ koni wɔle bɔ ni wɔɔfee wɔhiɛ henilee kpakpa mli, ní wɔkatɔ̃tɔ̃ mɛi krokomɛi anane beni wɔkɛ nɔ ni Ŋmalɛ lɛ kɛɔ yɛ yarafeemɔ he lɛ tsuɔ nii lɛ.—1 Kor. 10:32.

[Shishigbɛ niŋmaa]