Yiŋtoi Nyɔŋma kɛ Enyɔ Ahewɔ ni Wɔshiɛɔ

Mɛni hewɔ wɔshiɛɔ yɛ shia kɛ shia ni wɔkɛ mɛi kaseɔ Biblia lɛ? Ani yiŋtoo titri lɛ ji ni wɔye wɔbua mɛi koni amɛnyiɛ wala gbɛ lɛ nɔ? (Mat. 7:14) No ji yiŋtoi ni atsɔɔ yɛ shishigbɛ lɛ ateŋ klɛŋklɛŋ nɔ, shi no jeee yiŋtoo titri hewɔ ni wɔshiɛɔ lɛ. Te yiŋtoi 12 ahewɔ ni wɔshiɛɔ ni yɔɔ shishigbɛ nɛɛ ateŋ nɔ ni osusuɔ akɛ ehe hiaa fe fɛɛ lɛ?

1. Kɛ́ wɔshiɛ lɛ, wɔyeɔ wɔbuaa mɛi koni amɛná wala.—Yoh. 17:3.

2. Akɛbɔɔ efɔŋfeelɔi lɛ kɔkɔ.—Ezek. 3:18, 19.

3. Eyeɔ ebuaa ni Biblia mli gbalɛ baa mli.—Mat. 24:14.

4. Etsɔɔ akɛ Nyɔŋmɔ yeɔ jalɛsane. Mɔ ko nyɛŋ akɛɛ akɛ Yehowa haaa efɔŋfeelɔi aná hegbɛ kɛtsake amɛtsui dani ekpata amɛhiɛ.—Bɔf. 17:30, 31; 1 Tim. 2:3, 4.

5. Wɔkɛtsuɔ wɔsɔ̃ akɛ wɔye wɔbua mɛi ni akɛ Yesu la lɛ hé amɛ lɛ, koni amɛbale Nyɔŋmɔ lɛ he nii.—Rom. 1:14, 15.

6. Ehaaa wɔye mɛi ala yi sɔ̃.—Bɔf. 20:26, 27.

7. Efata nibii ni abaadamɔ nɔ ahere wɔyiwala lɛ ahe.—Ezek. 3:19; Rom. 10:9, 10.

8. Etsɔɔ suɔmɔ ni wɔyɔɔ kɛha mɛi krokomɛi.—Mat. 22:39.

9. Etsɔɔ akɛ wɔfeɔ toiboo wɔhaa Yehowa kɛ e-Bi lɛ.—Mat. 28:19, 20.

10. Eji wɔjamɔ lɛ fã.—Heb. 13:15.

11. Etsɔɔ akɛ wɔsumɔɔ Nyɔŋmɔ.—1 Yoh. 5:3.

12. Eyeɔ ebuaa kɛtseɔ Yehowa gbɛ́i lɛ he.—Yes. 43:10-12; Mat. 6:9.

Ekã shi faŋŋ akɛ jeee yiŋtoi nɛɛ pɛ ahewɔ wɔshiɛɔ. Akɛ nɔkwɛmɔnɔ lɛ, kɛ́ wɔshiɛ lɛ, ewajeɔ wɔhemɔkɛyeli lɛ, ni ehaa wɔnáa hegbɛ ni nɔ bɛ hu akɛ Nyɔŋmɔ hefatalɔi nitsulɔi. (1 Kor. 3:9) Kɛlɛ, yiŋtoo ni ji 12 lɛ ji nɔ titri hewɔ ni wɔshiɛɔ lɛ. Kɛji mɛi bo wɔ toi jio amɛbooo wɔ toi jio lɛ, shiɛmɔ nitsumɔ lɛ yeɔ ebuaa kɛtseɔ Nyɔŋmɔ gbɛ́i lɛ he, ni ehaa Yehowa náa hetoo ehaa mɔ ni bɔɔ lɛ ahora lɛ. (Abɛi 27:11) Anɔkwa, wɔyɛ yiŋtoi kpakpai ahewɔ ni ‘wɔfɔŋ nitsɔɔmɔ kɛ sanekpakpa lɛ shiɛmɔ’ lɛ.—Bɔf. 5:42.