Wɔbaabɔi Tsi Obɛŋkɛ Yehowa Wolo lɛ Kasemɔ Kɛjɛ January 6 Otsi lɛ nɔ Kɛyaa
1. Kɛjɛ January 6 otsi lɛ nɔ kɛyaa lɛ, mɛɛ hegbɛ wɔbaaná ni wɔkɛtsi wɔbɛŋkɛ Yehowa kpaakpa?
1 Yehowa miisumɔ ni wɔtsi wɔbɛŋkɛ lɛ. (Yak. 4:8) Kɛjɛ January 6 otsi lɛ nɔ kɛyaa lɛ, abaaye abua wɔ koni wɔnyɛ wɔfee nakai kɛtsɔ Tsi Obɛŋkɛ Yehowa wolo lɛ ni wɔbaakase yɛ Asafoŋ Biblia Nikasemɔ lɛ shishi lɛ nɔ. Wolo lɛ hiɛkpamɔ wiemɔ lɛ tsɔɔ nɔ hewɔ ni aŋma lɛ mli, akɛ: “Gbɛ ní Yehowa tsɔɔ nɔ ejieɔ esui lɛ eko fɛɛ eko kpo lɛ he ní wɔɔsusu, ní wɔɔkwɛ bɔ ni Yesu Kristo jie lɛ kpo yɛ gbɛ ní eye emuu nɔ, kɛ gbɛ ní wɔɔtsɔ nɔ wɔná nakai sui lɛ ahe shishinumɔ baaha wɔtsi wɔbɛŋkɛ Nyɔŋmɔ.” Yɛ afi 2004 kɛmɔ 2005 mli lɛ, wɔkase wolo nɛɛ yɛ wɔsafoi lɛ amli. Kɛlɛ, kɛjɛ nakai beaŋ kɛbaa nɛɛ, shiɛlɔi hei aaafee akpekpei enyɔ eba anɔkwale lɛ mli; ni kɛha amɛteŋ mɛi babaoo lɛ, enɛ baafee klɛŋklɛŋ be ni abaasusu Yehowa sui ni nɔ bɛ lɛ ahe fitsofitso. Yɛ mɛi ni ekase wolo nɛɛ dã lɛ agbɛfaŋ lɛ, wolo lɛ ni abaakase ekoŋŋ lɛ baaha hiɛsɔɔ ni amɛyɔɔ kɛha Yehowa sui lɛ mli akwɔ.—Lala 119:14.
2. Te abaakase Tsi Obɛŋkɛ Yehowa wolo lɛ aha tɛŋŋ?
2 Bɔ ni Abaakase lɛ Aha: Nɔkwɛlɔ lɛ baakpa nikasemɔ lɛ hiɛ kuku, ekolɛ kɛ wiemɔ muu kome loo enyɔoo ko. Atsɔko ŋmalɛi ni esa akɛ akane lɛ yɛ wolo lɛ mli, no hewɔ lɛ beni nikasemɔ lɛ yaa nɔ lɛ, nɔkwɛlɔ lɛ baahala ŋmalɛi titrii komɛi ni eha akane. Nɔkwɛlɔ lɛ baanyɛ ebi saji enyɔoo ko yɛ nikasemɔ lɛ eko fɛɛ eko naagbee ni ekɛtĩ mli. Kɛ́ akrabatsa ni ji “Sanebimɔi Kɛha Sane Nɔjwɛŋmɔ” fata nɔ ni abaakase lɛ he lɛ, akɛ no baatĩ nikasemɔ lɛ mli. Kɛ́ be baaŋmɛ gbɛ lɛ, nɔkwɛlɔ lɛ baaha akane ŋmalɛi ni atsɛ yisɛɛ yɛ akrabatsa lɛ mli lɛ ekomɛi ni ebi saji krokomɛi ni baaha toibolɔi lɛ atsɔɔ amɛjwɛŋmɔ.
3. Beni akaseɔ wolo lɛ, mɛni esa akɛ wɔfee, ni mɛni hewɔ?
3 Ná he Sɛɛ Kɛmɔ Shi: Kɛ́ okase wolo lɛ dã po lɛ, tsɔ hiɛ okase dani oba kpee lɛ. Okɛ ohe awo saji ahetoohamɔ mli, ejaakɛ enɛ kɛ yijiemɔ baaha Yehowa, ebaaye ebua bo ni okai nɔ ni akase lɛ, ni mɛi krokomɛi ni eba kpee lɛ hu baaná he sɛɛ. (Lala 35:18; Heb. 10:24, 25) Beni ojwɛŋɔ Yehowa sui ni nɔ bɛ lɛ anɔ lɛ, obaatsi obɛŋkɛ lɛ kpaakpa. (Lala 77:12-14) Enɛ baaha ofai shi ni otswa akɛ obaabo emlai lɛ atoi lɛ mli awa, ni ebaakanya bo ni ogba mɛi krokomɛi ehe sane fe bɔ ni ofeɔ bianɛ lɛ po.—Lala 150:1-6.