Niiashikpamɔi
◼ Australia: Beni John ni etee skul waa lɛ ji gbekɛ lɛ, eyaa sɔlemɔ, shi beni eda lɛ eheee eyeee kwraa akɛ Nyɔŋmɔ yɛ. Gbɛgbalɔ ko baha lɛ Was Life Created? wolo bibioo lɛ, ni beni eku sɛɛ eyasara lɛ lɛ, eha lɛ Origin of Life wolo bibioo lɛ eko. Gbɛgbalɔ lɛ tee nɔ eha lɛ woji tɛtrɛbii heei ni eba lɛ ni egbalaa ejwɛŋmɔ kɛyaa amɛmli saji ni kɔɔ adebɔɔ loo Biblia mli gbalɛi ahe lɛ nɔ. Beni gbɛgbalɔ lɛ na akɛ agbɛnɛ lɛ esaa John jwɛŋmɔ bɔ ni ebaanyɛ eha lɛ woji krokomɛi lɛ, eha lɛ The Bible—God’s Word or Man’s? lɛ eko. Beni John kane wolo lɛ egbe naa lɛ, ekɛɛ, “Miheɔ miyeɔ akɛ anyɛŋ ale kɛji Nyɔŋmɔ yɛ loo Nyɔŋmɔ bɛ, shi mifeee shɛii yɛ he.” No sɛɛ lɛ, gbɛgbalɔ lɛ ha lɛ Biblia lɛ Tsɔɔ wolo lɛ eko, ni ekɛ saji ni yɔɔ baafa 20 kuku 8 lɛ kɛ baafa 23-24 kuku 13-16 lɛ tsɔɔ lɛ. Ŋmalɛi ni atsɛ yisɛɛ yɛ kukuji nɛɛ amli lɛ ta John tsuiŋ aahu akɛ ekɛɛ, “Ekolɛ esa akɛ masaa makase Biblia lɛ ekoŋŋ.”
◼ Mexico: Nuu ko kɛɛ shiɛlɔ ko akɛ eheee eyeee akɛ Nyɔŋmɔ mumɔ lɛŋ ajɛ aŋma Biblia lɛ. Shiɛlɔ lɛ kɛɛ nuu lɛ akɛ ebaasumɔ ni etsɔɔ lɛ odaseyelii ni tsɔɔ akɛ mumɔŋ ajɛ aŋma Biblia lɛ. Beni akase nii lɛ kɛshɛ he ko lɛ, nɔ ni nuu lɛ kaseɔ kɛjɛɔ Biblia lɛ mli lɛ bɔi etsui lɛ nɔ hewalɛ namɔ. Nyɔŋmɔ jeŋba he tɛi lɛ ni ekase lɛ ji nɔ titri ni ná enɔ hewalɛ waa. Ekɛɛ shiɛlɔ lɛ akɛ: “Tsutsu ko lɛ, kɛ́ wɔkane Biblia lɛ, etamɔ nɔ ni ŋaawoo lɛ jɛ wolo ko kɛkɛ mli ni eshiii mi kpu po. Shi amrɔ nɛɛ kɛ́ wɔkane lɛ, titri lɛ emli ŋaawoo ni kɔɔ jeŋba he lɛ, etsurɔɔ mitsuiŋ.”
◼ United States: Beni nyɛmi nuu ko kɛ eŋa tsuɔ maŋtiasei wuji amli odaseyeli krɛdɛɛ lɛ, amɛkɛ yoo ko ni jɛ Taiwan gba sane. Yoo lɛ heɔ Nyɔŋmɔ nɔ eyeɔ, shi esusuɔ akɛ afee Biblia lɛ aha mɛi ni jɛ United States, Canada, Yuropa, loo jɛmɛ niiaŋ lɛ pɛ. Eyɛ mli akɛ nɔ ko he ehiaaa lɛ moŋ, shi elé yiŋtoo hewɔ ni eyɔɔ shihilɛ mli. No hewɔ lɛ, etsi ebɛŋkɛ amɛkpɔlɔ lɛ he akɛ aleenɔ Biblia lɛ baanyɛ aye abua lɛ ni ele yiŋtoo hewɔ ni eyɔɔ shihilɛ mli lɛ lo. Nyɛmi nuu lɛ kɛ eŋa lɛ kɛ lɛ bɔi Biblia lɛ Tsɔɔ wolo lɛ kɛ wolo bibioo ni ji Lasting Peace and Happiness—How to Find Them lɛ kasemɔ. Yɛ nɔ najiaŋ ni amɛkɛ lɛ aaakase Biblia lɛ Tsɔɔ wolo lɛ yitso 2 lɛ, amɛkɛ lɛ susu wolo bibioo lɛ fã ni yitso ji “A Guidebook for the Blessing of All Mankind” (Gbɛtsɔɔmɔ Wolo ni Baaha Ajɔɔ Adesai Fɛɛ) lɛ he. Beni akɛ yoo lɛ susu nakai fã lɛ mli klɛŋklɛŋ kukuji ekpaa lɛ ahe lɛ, enaa kpɛ ehe yɛ bɔ ni esoro Biblia lɛ kwraa yɛ jamɔŋ woji krokomɛi ahe lɛ he. Beni akɛ lɛ esusu Biblia mli gbalɛi ni eba mli lɛ ahe lɛ, ekɛɛ akɛ, “Wolo ko wolo ko bɛ ni manyɛ makɛɛ akɛ eja tamɔ Biblia lɛ!”
◼ Japan: Eyɛ mli akɛ shiatsɛ ko kɛɛ shiɛlɔ ko akɛ eheee Nyɔŋmɔ nɔ eyeee moŋ, shi shiɛlɔ lɛ yaa jɛmɛ ni ekɛ lɛ yasusuɔ Awake! lɛ mli saji ni yitso ji “Was It Designed?” (Ani Aje Gbɛ Afee?) lɛ ahe kuku. Fiofio lɛ, nuu lɛ jwɛŋmɔ bɔi tsakemɔ ni ekpɛlɛ nɔ akɛ ekolɛ Bɔlɔ ko yɛ. Amrɔ nɛɛ eheɔ eyeɔ akɛ Nyɔŋmɔ yɛ, ni shiɛlɔ lɛ kɛ lɛ miikase wolo bibioo ni ji Sanekpakpa ni Jɛ Nyɔŋmɔ Ŋɔɔ! lɛ.
◼ Canada: Nyɛmi yoo ko ha yoo ko ni miije kpo yɛ eshia mli kɛya etsɔne he lɛ woji tɛtrɛbii hee ni eba lɛ eko. Beni nyɛmi yoo lɛ ku esɛɛ etee eŋɔɔ lɛ, yoo lɛ ma nɔ mi doo akɛ ebɛ sane lɛ he miishɛɛ ni eheee Nyɔŋmɔ nɔ eyeee. Nyɛmi yoo lɛ haaa enɛ aje enijiaŋ wui, shi ekpɛ eyiŋ akɛ ebaayaha lɛ wolo bibioo ni ji Shihilɛ ni Yɔɔ Miishɛɛ—Bɔ ni Aaafee Aná lɛ eko. Beni nyɛmi yoo lɛ tee eyana yoo lɛ yɛ shĩa lɛ, ekɛɛ lɛ akɛ ele akɛ eheee Nyɔŋmɔ nɔ eyeee moŋ, shi eesusu ehe ejaakɛ ele akɛ eji fɔlɔ mɔ kome mɔ. Ekɛ wolo bibioo lɛ baafa 4 kuku 6 lɛ ni wieɔ he ni wɔbaanyɛ wɔná ŋaawoo kpakpa kɛjɛ lɛ tsɔɔ lɛ. No sɛɛ lɛ, ewo lɛ hewalɛ ni ekane ŋaawoi ni akɛha yɛ nikasemɔ 2 lɛ mli ni kɔɔ bii atsɔsemɔ he lɛ. Yoo lɛ ná he miishɛɛ waa ni eŋɔ wolo lɛ.