Ani Obaaŋɔ Hegbɛ Lɛ?
Kaimɔ ni Baa lɛ Hãa Wɔnyɛɔ Wɔjieɔ Hiɛsɔɔ Kpo
1. Mɛɛ hegbɛ krɛdɛɛ Kaimɔ lɛ hãa wɔnáa?
1 Kaimɔ lɛ, ni baagbee April 14 lɛ nɔ lɛ, hãa wɔnáa hegbɛ krɛdɛɛ ni wɔkɛaaná hiɛsɔɔ kɛhã Yehowa ejurɔfeemɔ lɛ ni wɔjie nakai hiɛsɔɔ lɛ kpo. Sane ni yɔɔ Luka 17:11-18 lɛ hãa wɔnaa bɔ ni Yehowa kɛ Yesu buɔ hiɛsɔɔ kpo ni ajieɔ lɛ amɛhãa. Mɔbɔ sane ji akɛ, kpitiyelɔi nyɔŋma ni he tã lɛ ateŋ mɔ kome pɛ ŋɔ hegbɛ lɛ ni ebada Yesu shi. Wɔsɛɛ lɛ, Yehowa baatsɔ nikeenii ni ji kpɔmɔnɔ lɛ nɔ efã helai srɔtoi fɛɛ ashishi, koni adesai anyɛ ahi shi kɛya naanɔ! Ekã shi faŋŋ akɛ, no beaŋ lɛ, jɔɔmɔi nɛɛ ni wɔbaaná lɛ baahã wɔda Yehowa shi daa. Shi te wɔɔfee tɛŋŋ wɔjie hiɛsɔɔ ni wɔyɔɔ lɛ kpo yɛ otsii ni jwere wɔhiɛ lɛ amli?
2. Mɛɛ gbɛ nɔ wɔbaanyɛ wɔtsɔ wɔná hiɛsɔɔ kɛhã kpɔmɔnɔ lɛ?
2 Ná Hiɛsɔɔ: Kɛ́ wɔjwɛŋ nɔ ko ni mɔ ko efee ehã wɔ lɛ nɔ lɛ, no baahã wɔhiɛ asɔ nɔ ni mɔ lɛ efee lɛ. Akɛ gbɛjianɔtoo kɛhã Kaimɔ lɛ he Biblia kanemɔ krɛdɛɛ lɛ ewo hei srɔtoi, tamɔ saji krokomɛi ni fata he (appendix B12) ni yɔɔ New World Translation henɔ hee ni afee lɛ, wɔ-kalanda lɛ, kɛ Ŋmalɛi lɛ Amli ni Wɔɔkwɛ Daa wolo lɛ mli, koni no aye abua wɔ ni wɔhiɛ asɔ kpɔmɔnɔ lɛ waa. Mɛni hewɔ okɛ oweku lɛ efeee ekome ni nyɛsusu ŋmalɛi nɛɛ ahe? Kɛ́ wɔfee nakai lɛ, ebaahã hiɛsɔɔ ni wɔyɔɔ kɛhã kpɔmɔnɔ lɛ mli awa waa, ni enɛ baahã wɔba wɔjeŋ jogbaŋŋ.—2 Kor. 5:14, 15; 1 Yoh. 4:11.
3. Mɛɛ gbɛi anɔ wɔbaanyɛ wɔtsɔ wɔjie hiɛsɔɔ kpo yɛ Kaimɔ be lɛ mli?
3 Jiemɔ Hiɛsɔɔ Kpo: Nifeemɔi anɔ atsɔɔ ajieɔ hiɛsɔɔ kpo. (Kol. 3:15) Kpitiyelɔ ni jie hiɛsɔɔ kpo lɛ bɔ mɔdɛŋ ni etao Yesu ni eda lɛ shi. Ŋwanejee ko bɛ he akɛ, ekɛ miishɛɛ kɛ ekãa gba mɛi krokomɛi naakpɛɛ gbɛ nɔ ni atsɔ atsa lɛ lɛ he sane. (Luka 6:45) Ani hiɛsɔɔ ni wɔyɔɔ kɛhã kpɔmɔnɔ lɛ baakanya wɔ ni wɔkɛ wɔhe awo ta ni abaafã kɛtswa Kaimɔ lɛ he adafi lɛ mli kɛ ekãa? Gbɛ kroko ni hi jogbaŋŋ ni wɔbaanyɛ wɔtsɔ nɔ wɔda Yehowa kɛ Yesu shi ji ni wɔkɛ wɔhe baawo gbɛgbalɔi awamɔ nitsumɔ lɛ mli loo ni wɔkɛ wɔbe pii baatsu shiɛmɔ nitsumɔ lɛ yɛ Kaimɔ be lɛ mli. Yɛ Kaimɔ lɛ shishi lɛ, hiɛsɔɔ ni wɔná yɛ wɔtsui mli lɛ baatsirɛ wɔ ni wɔhere mɛi ni eba lɛ ni wɔbɔ mɔdɛŋ wɔhã saji ni amɛbaabibii lɛ ahetoo.
4. Mɛni esa akɛ wɔfee koni kɛ́ Kaimɔ be nɛɛ ho lɛ wɔkashwa wɔhe?
4 Ani Kaimɔ nɛɛ baafee naagbee nɔ ni wɔbaaye? (1 Kor. 11:26) Wɔlé. Shi nɔ ni wɔle ji akɛ, kɛ́ Kaimɔ be nɛɛ ho lɛ, hegbɛ krɛdɛɛ ni wɔná ni wɔkɛaajie hiɛsɔɔ kpo lɛ hu baaho aya. Ani obaaŋɔ hegbɛ lɛ? Eba akɛ wɔdaaŋ wiemɔi ni tsɔɔ hiɛsɔɔ ni wɔyɔɔ lɛ, kɛ wɔtsuiŋ jwɛŋmɔi lɛ baasa Yehowa, mɔ ni jɛ etsuiŋ eduro wɔ kpɔmɔnɔ lɛ hiɛ.—Lala 19:15.