Vidio Hee ni Akɛjeɔ Biblia Mli Nikasemɔi Ashishi

Mɛi pii miikwɛ vidio ko ni sɛɛ kɛɛɛ ni yitso ji Mɛni Hewɔ Esa akɛ Okase Biblia Lɛ? yɛ jw.org lɛ nɔ. Afee vidio lɛ koni ekanya mɛi ni yɔɔ wiemɔ lɛ he miishɛɛ lɛ, ni amɛkpɛlɛ ni wɔkɛ amɛ akase Biblia lɛ ní aheee nɔ ko. Kɛ́ otee shishigbɛ lɛ, obaana sane ni ji “Bi Koni Akɛ Bo Akase Biblia Lɛ”, klikimɔ nɔ loo skanimɔ okadi ni ji QR (quick response) code lɛ ni aprinti yɛ wɔdɛŋhiɛmɔ woji lɛ eko fɛɛ eko sɛɛ lɛ. Naa gbɛi komɛi ni wɔbaanyɛ wɔtsɔ nɔ wɔkɛ vidio lɛ atsu nii jogbaŋŋ.

• Kɛ́ oofee sɛɛkuu-kɛsaramɔ lɛ, bi shiatsɛ lɛ akɛ: “Ani manyɛ majie vidio ko ni tsɔɔ bɔ ni ooofee oná hetoo ohã o-Biblia mli sanebimɔi matsɔɔ bo?” Kɛ́ ekpɛlɛ nɔ lɛ, hã ni ekwɛ vidio lɛ yɛ mobail foŋ henɔ ni ohiɛ lɛ nɔ, loo yɛ lɛ diɛŋtsɛ ekɔmpiuta lɛ nɔ.

• Kɛ́ okɛ dɛŋhiɛmɔ woji hee lɛ eko hã mɔ ko kɛ́ ooye odase yɛ maŋ loo be ni onyiɛɛɛ shiɛmɔ nɔ lɛ, tsɔɔmɔ mɔ lɛ QR code lɛ ni owo lɛ hewalɛ ni ekɛ emobail foŋ henɔ ni eyɔɔ lɛ askani. Akɛni yɛ wiemɔi babaoo amli lɛ QR code lɛ baanyɛ ekɛbo aya wɔ-Web saiti lɛ nɔ he ni vidio lɛ yɔɔ lɛ tɛ̃ɛ hewɔ lɛ, obaanyɛ ojie vidio lɛ amrɔ nɔŋŋ ohã mɔ lɛ yɛ mobail foŋ henɔ ni ohiɛ lɛ nɔ.

• Hã mɛi ni okɛtsuɔ nii, mɛi ni okɛyaa skul, wekumɛi, kɛ mɛi krokomɛi ni okɛshãraa lɛ ale vidio lɛ he sane, ni okɛɛ amɛ akɛ obaasumɔ ni ojie otsɔɔ amɛ. Aloo obaanyɛ okɛ vidio lɛ he link lɛ amaje amɛ kɛtsɔ e-mail nɔ, ni okɛɛ amɛ ni amɛkwɛ.

Kɛ́ wɔkɛ vidio hee nɛɛ tsu nii lɛ, wɔbaanyɛ wɔje Biblia mli nikasemɔi babaoo ashishi, ni wɔbaanyɛ wɔye wɔbua “mɛi abɔ ní ajie ato naanɔ wala lɛ” yɛ mumɔŋ.​—Bɔf. 13:48.