Sanebimɔhe

◼ Ani esa akɛ shiɛlɔi atsɔ Intanɛt lɛ nɔ aye mɛi ni yɔɔ maji krokomɛi anɔ lɛ odase loo amɛkɛ amɛ akase nii?

Shiɛlɔi komɛi etsɔ Intanɛt lɛ nɔ kɛtao mɛi yɛ maji ni atsĩ wɔnitsumɔ lɛ naa yɛ, loo shiɛlɔi ayi faaa yɛ jɛmɛ lɛ, koni amɛkɛ amɛ akase Biblia lɛ. Yɛ shihilɛi komɛi amli lɛ, enɛ ewo yibii kpakpai. Shi eyɛ oshara akɛ shiɛlɔi baatsɔ e-mail loo Intanɛt lɛ nɔ amɛkɛ mɛi ni amɛleee amɛ agba sane. (Kwɛmɔ July 2007 Wɔ Maŋtsɛyeli Sɔɔmɔ, bf. 3 lɛ.) Eyɛ mli akɛ yiŋtoo hewɔ ni afeɔ nakai lɛ ji koni ahã mɛi ni hiɛ tsui kpakpa lɛ anu Maŋtsɛyeli sane lɛ moŋ, shi sanegbai ni tamɔ nakai lɛ baanyɛ ahã nyɛmi nuu loo nyɛmi yoo ko kɛ nanemɛi gbohii ní hemɔkɛyeli kwalɔi fata he lɛ ashara. (1 Kor. 1:19-25; Kol. 2:8) Agbɛnɛ hu, amralofoi ni yɔɔ maji ni atsĩ Maŋtsɛyeli shiɛmɔ nitsumɔ lɛ naa lɛ amli lɛ baanyɛ akane loo abo sanegbaa lɛ toi. Enɛ baanyɛ ekɛ wɔnyɛmimɛi ni yɔɔ jɛmɛ lɛ awo oshara mli. No hewɔ lɛ, esaaa akɛ shiɛlɔi yaa Intanɛt lɛ nɔ yataoɔ mɛi yɛ maji krokomɛi anɔ koni amɛshiɛ sane kpakpa lɛ amɛhã amɛ.

Kɛ́ wɔye mɔ ko ni wɔleee lɛ, ní ejɛ maŋ kroko nɔ eba he ni wɔyɔɔ lɛ odase be ni wɔnyiɛɛɛ shiɛmɔ nɔ, ni eku esɛɛ etee emaŋ lɛ, esaaa akɛ wɔkɛ lɛ tsaa sanegbaa lɛ nɔ, ja nitsumɔhe nine ni yɔɔ jɛmɛ lɛ ekɛɛ wɔ akɛ wɔfee nakai dã. Moŋ lɛ, esa akɛ wɔtsɔɔ lɛ bɔ ni ebaafee ekase nibii krokomɛi yɛ jw.org lɛ nɔ loo wɔtsɔɔ lɛ bɔ ni ebaafee enine ashɛ nitsumɔhe nine ni yɔɔ he ni ejɛ lɛ nɔ. Wɔbaanyɛ wɔwo lɛ hewalɛ hu koni eya Maŋtsɛyeli Asa ni bɛŋkɛ he ni eyɔɔ lɛ nɔ. Eji anɔkwale akɛ Maŋtsɛyeli Asai bɛ maji komɛi anɔ kwraa. Kɛ́ mɔ lɛ baasumɔ ni Odasefoi ni yɔɔ emaŋ lɛ kɛ lɛ abakase nii lɛ, no lɛ esa akɛ wɔŋma Please Follow Up (S-43) wolo lɛ nɔ nii ni wɔkɛhã wɔsafoŋ woloŋmalɔ lɛ, ni ekɛbaatsɔ jw.org lɛ nɔ ekɛmaje. Nitsumɔhe nine ni kwɛɔ nitsumɔ lɛ nɔ yɛ maŋ nɔ he ni mɔ lɛ yɔɔ lɛ le shihilɛ ni yɔɔ jɛmɛ lɛ jogbaŋŋ, ni amɛ amɛbaanyɛ amɛye amɛbua lɛ jogbaŋŋ fe wɔ.​—Kwɛmɔ June 2014 Wɔ Maŋtsɛyeli Sɔɔmɔ, bf. 7 lɛ, kɛ November 2011 Wɔ Maŋtsɛyeli Sɔɔmɔ, bf. 2 lɛ.

Kɛ́ mɔ ko ni wɔkɛ lɛ kaseɔ nii amrɔ nɛɛ fã kɛtee maŋ kroko nɔ, loo wɔkɛ mɔ ko ni yɔɔ maŋ kroko nɔ ni wɔle lɛ kɛtsɔ Intanɛt lɛ nɔ pɛ miikase nii amrɔ nɛɛ lɛ, esa akɛ wɔkɛ gbɛtsɔɔmɔi ni awie he kɛtsɔ hiɛ lɛ atsu nii. Shi wɔbaanyɛ wɔya nɔ wɔkɛ mɔ lɛ akase nii lɛ kɛyashi shiɛlɔi ni yɔɔ he ni eyɔɔ lɛ baaya eŋɔɔ. Ni kɛ̃lɛ, kɛ́ atsĩ wɔshiɛmɔ nitsumɔ lɛ naa yɛ maŋ nɔ he ni eyɔɔ lɛ, esa akɛ wɔkwɛ jogbaŋŋ kɛ́ wɔkɛ lɛ miisusu Biblia mli saji ahe kɛtsɔ woloŋmaa, tɛlifoŋ, loo elɛktrɔnik tsɔji anɔ.​—Mat. 10:16.