Ani Oshɛ Mɔ Ni Baanyɛ Ajɔɔ Ehe Nɔ Ehã Yehowa?

1-2. Mɛni esa akɛ mɔ ko afee dani abaptisi lɛ?

YƐ AFII enumɔ ni eho nɛɛ amli lɛ, abaptisi mɛi ni fa fe miliɔn kome ni amɛbatsɔmɔ Yehowa Odasefoi. Amɛteŋ mɛi babaoo lɛ, atsɔse amɛ yɛ anɔkwale lɛ mli kɛjɛ amɛgbekɛbiiashi, tamɔ bɔ ni eba lɛ yɛ Timoteo ni hi shi yɛ blema lɛ gbɛfaŋ lɛ. (2 Tim. 3:​14, 15) Amɛteŋ mɛi komɛi hu yɛ ni amɛbakase Yehowa he nii be ni amɛdara, loo amɛgbɔlɔ po. Akɛ nɔkwɛmɔnɔ lɛ, yoo ko ni hã Yehowa Odasefoi kɛ lɛ bɔi nikasemɔ ni abaptisi lɛ afii fioo ni eho nɛ lɛ eye afii 97!

² Kɛ́ ofɔlɔi bɛ anɔkwale lɛ mli ni akɛ bo miikase Biblia lɛ, loo ofɔlɔi yɛ anɔkwale lɛ mli ni amɛkɛ bo miikase lɛ, ani oosumɔ ni abaptisi bo? Kɛ́ nakai lɛ, obɔ mɔdɛŋ waa akɛ okɛ nakai oti lɛ ema ohiɛ! Shi dani abaabaptisi bo lɛ, esa akɛ ojɔɔ ohe nɔ ohã Yehowa. Nikasemɔ nɛɛ baahã ona nɔ ni atsɔɔ kɛ́ akɛɛ mɔ ko ejɔɔ ehe nɔ ehã Yehowa. Agbɛnɛ hu, ebaaye ebua bo ni ona nɔ hewɔ ni esaaa akɛ oshashaoɔ shi akɛ obaajɔɔ ohe nɔ ohã Yehowa ni ohã abaptisi bo kɛ́ ona akɛ oshɛ.

MƐNI JI HENƆJƆƆMƆ?

3. Tsɔɔmɔ mɛi komɛi ni awie yɛ Biblia lɛ mli akɛ ajɔɔ amɛnɔ ahã Yehowa.

³ Yɛ Biblia lɛ mli lɛ, kɛ́ akɛɛ ajɔɔ nɔ ko nɔ lɛ, etsɔɔ akɛ ahala nakai nii lɛ ato afã kɛhã nitsumɔ krɛdɛɛ ko. No mli lɛ, Israelbii lɛ ji maŋ ni ajɔɔ amɛnɔ ahã Yehowa. Shi amɛteŋ mɛi komɛi yɛ ni ajɔɔ amɛnɔ ahã Yehowa yɛ gbɛ krɛdɛɛ nɔ. Akɛ nɔkwɛmɔnɔ lɛ, no mli lɛ “henɔjɔɔmɔ okadi krɔŋkrɔŋ,” ni ji shika tsuru ni atswia lɛ fɛtɛfɛtɛ ni kpɛlɛɔ kpɛtɛ yitsofiinɔ ni Aaron kɛfiɔ eyitso lɛ hiɛ. Nakai henɔjɔɔmɔ okadi lɛ tsɔɔ akɛ, Yehowa ehala lɛ ni esɔmɔ yɛ gbɛ krɛdɛɛ ko nɔ, ni ji esɔmɔ akɛ osɔfonukpa kɛhã Israelbii lɛ. (3 Mo. 8:9) Nazirmɛi lɛ hu jɔɔ amɛhe nɔ amɛhã Yehowa yɛ gbɛ krɛdɛɛ ko nɔ. Aná wiemɔ ni ji “Nazirmɛi” lɛ kɛjɛ Hebri wiemɔ ni ji nazirʹ lɛ mli, ni eshishi ji “Mɔ Ni Ajie Lɛ Ato Afã” loo “Mɔ Ni Ejɔɔ Ehe Nɔ.” Nazirmɛi lɛ hiɔ shi yɛ mlai ni awo amɛ yɛ Mose Mla lɛ mli lɛ anaa.—4 Mo. 6:​2-8.

4. (a) Kɛ́ ojɔɔ ohe nɔ ohã Yehowa lɛ, belɛ mɛni okpɛ oyiŋ akɛ obaafee? (b) Kɛ́ akɛɛ ‘okwa ohe’ lɛ, te atsɔɔ tɛŋŋ? (Kwɛmɔ mfoniri lɛ hu.)

⁴ No hewɔ lɛ, kɛ́ ojɔɔ ohe nɔ ohã Yehowa lɛ, no tsɔɔ akɛ okpɛ oyiŋ akɛ obaatsɔ Yesu Kristo kaselɔ, ni ohã Nyɔŋmɔ suɔmɔnaa nii ni obaafee lɛ he ahia bo fe nɔ fɛɛ nɔ yɛ oshihilɛ mli. Mɛni ohe nɔ ni ojɔɔ lɛ baabi ni ofee? Yesu kɛɛ: “Kɛ́ mɔ ko miisumɔ akɛ enyiɛ misɛɛ lɛ, ekwa ehe.” (Mat. 16:24) Abaanyɛ atsɔɔ Greek wiemɔ ni atsɔɔ shishi akɛ “ekwa ehe” lɛ shishi hu akɛ, “ekafee nɔ ni lɛ diɛŋtsɛ esumɔɔ.” Kɛ́ ojɔɔ ohe nɔ ohã Yehowa lɛ, esaaa akɛ ofeɔ nɔ ko ni esumɔɔɔ. (2 Kor. 5:​14, 15) Enɛ tsɔɔ akɛ, obaatsi ohe kɛje “heloo lɛ nitsumɔi lɛ” ahe, tamɔ ajwamaŋbɔɔ nɛkɛ. (Gal. 5:​19-21; 1 Kor. 6:18) Ani ebaawa kɛhã bo akɛ obaatsi ohe kɛje nɛkɛ nibii nɛɛ ahe? Kɛ́ osumɔɔ Yehowa, ni oheɔ oyeɔ akɛ kɛ́ obo emlai lɛ toi lɛ obaaná he sɛɛ lɛ, ewaŋ kɛhãŋ bo kwraa. (Lala 119:97; Yes. 48:​17, 18) Nyɛmi nuu ko ni atsɛɔ lɛ Nicholas lɛ wie akɛ, “Obaanyɛ ona Yehowa mlai lɛ tamɔ afabaŋ ko ni miitsĩ onaa ni okafee nɔ ni osumɔɔ, loo tamɔ afabaŋ ko ni miibu ohe koni jata ko akaye bo awui.”

5. (a) Kɛ́ ootao ojɔɔ ohe nɔ ohã Yehowa lɛ, te obaafee lɛ ohã tɛŋŋ? (b) Mɛɛ srɔto yɔɔ henɔjɔɔmɔ kɛ baptisimɔ teŋ? (Kwɛmɔ mfoniri lɛ hu.)

⁵ Kɛ́ ootao ojɔɔ ohe nɔ ohã Yehowa lɛ, te obaafee lɛ ohã tɛŋŋ? Bɔ ni obaafee lɛ ji, obaasɔle ohã Yehowa ni owo lɛ shi akɛ obaajá ekome too pɛ, ni obaahã nɔ ni esumɔɔ lɛ he ahia bo fe nɔ fɛɛ nɔ yɛ oshihilɛ mli. Kɛ́ ofee enɛ lɛ, no tsɔɔ akɛ owo Yehowa shi akɛ obaasumɔ lɛ “kɛ otsui muu fɛɛ kɛ osusuma muu fɛɛ kɛ ojwɛŋmɔ muu fɛɛ kɛ onyɛmɔ fɛɛ.” (Mar. 12:30) Kɛ́ ojɔɔ ohe nɔ ohã Yehowa lɛ, eyɛ bo kɛ Yehowa pɛ teŋ, mɔ ko mɔ ko leee. Shi kɛ́ abaptisi bo lɛ, no lɛ mɔ fɛɛ mɔ naa, ni no hãa amɛnaa akɛ ojɔɔ ohe nɔ ohã Yehowa. Henɔjɔɔmɔ ji shiwoo ni yɔɔ hiɛdɔɔ waa, ni Yehowa miikpa gbɛ akɛ obaahi shi yɛ ohenɔjɔɔmɔ lɛ naa, ni esa akɛ bo hu obɔ mɔdɛŋ waa akɛ obaahi shi yɛ naa.—Jaj. 5:​4, 5.

MƐNI BAATSIRƐ BO NI OJƆƆ OHE NƆ OHÃ YEHOWA?

6. Mɛni baatsirɛ mɔ ko ni ejɔɔ ehe nɔ ehã Yehowa?

⁶ Suɔmɔ ji nɔ titri ni baatsirɛ bo ni ojɔɔ ohe nɔ ohã Yehowa. Jeee bɔ ni onuɔ he ohãa lɛ kɛkɛ hewɔ osumɔɔ Yehowa. Moŋ lɛ, nibii ni okase yɛ Yehowa he, ni ji nɔ ni Biblia lɛ tsɛɔ lɛ “nilee krɔŋŋ” kɛ “niiashishinumɔ fɛɛ ni mumɔ lɛ hãa lɛ” ji nɔ ni ehã obasumɔ lɛ waa lɛ. (Kol. 1:9) Nibii ni okase yɛ Ŋmalɛ lɛ mli lɛ ehã ohe oye akɛ (1) Yehowa yɛ, (2) Biblia lɛ ji e-Wiemɔ, ni (3) etsɔɔ esafo lɛ nɔ ehãa afeɔ esuɔmɔnaa nii.

7. Kɛ́ mɔ ko miitao ejɔɔ ehe nɔ ehã Nyɔŋmɔ lɛ, mɛɛ nibii esa akɛ efee dã?

⁷ Dani mɔ ko baajɔɔ ehe nɔ ehã Yehowa lɛ, esa akɛ ele nibii ni he hiaa ni esa akɛ mɔ ko ale klɛŋklɛŋ yɛ Nyɔŋmɔ Wiemɔ lɛ mli lɛ, ni ehi shi yɛ shishitoo mlai ni yɔɔ Biblia lɛ mli lɛ anaa hu. Mɔ ko ni tamɔ nɛkɛ lɛ bɔɔ mɔdɛŋ egbaa mɛi nibii ni ekaseɔ yɛ Biblia lɛ mli lɛ. (Mat. 28:​19, 20) Esumɔɔ Yehowa waa, ni nɔ ni kã etsui nɔ ji, ni ejá Yehowa kome too pɛ. Ani nakai eji yɛ ogbɛfaŋ? Kɛ́ osumɔɔ Yehowa waa lɛ, jeee mɔ ni kɛ bo kaseɔ Biblia lɛ, ofɔlɔi, loo onanemɛi ahewɔ obaajɔɔ ohe nɔ ni ohã abaptisi bo.

8. Kɛ́ ohiɛ sɔɔ nibii ni Yehowa efee ehã bo lɛ, mɛni hewɔ no baatsirɛ bo ni ojɔɔ ohe nɔ ohã lɛ? (Lala 116:​12-14)

⁸ Kɛ́ ojwɛŋ nibii fɛɛ ni Yehowa efee ehã bo lɛ ahe lɛ, ewaaa kwraa akɛ obaasumɔ ni ojɔɔ ohe nɔ ohã lɛ. (Kanemɔ Lala 116:​12-14.) Biblia lɛ hãa wɔleɔ akɛ, “nikeenii kpakpai fɛɛ kɛ nikeenii ni hi kɛwula shi fɛɛ” jɛɔ Yehowa ŋɔɔ. (Yak. 1:17) Nikeenii nɛɛ ateŋ nɔ ni jara wa fe fɛɛ ni ekɛhã wɔ ji, e-Bi Yesu ni ehã ebagbo kɛkpɔ̃ wɔ lɛ. Mɛɛ gbɛ nɔ wɔnáa nikeenii nɛɛ he sɛɛ? Kpɔmɔnɔ lɛ hewɔ wekukpaa kpakpa yɔɔ okɛ Yehowa teŋ lɛ, ni no nɔŋŋ hewɔ Yehowa ehã bo hiɛnɔkamɔ akɛ obaahi shi kɛya naanɔ lɛ. (1 Yoh. 4:​9, 10, 19) Kɛ́ ojɔɔ ohe nɔ ohã Yehowa lɛ, no baatsɔɔ akɛ ohiɛ sɔɔ nɔ ni efee kɛtsɔɔ akɛ esumɔɔ bo waa lɛ kɛ nibii krokomɛi fɛɛ ni efeɔ ehãa bo lɛ. (5 Mo. 16:17; 2 Kor. 5:15) Enɛ ji nɔ ni Oyi Aná Wala Kɛya Naanɔ! wolo lɛ, nikasemɔ 46 oti 4 lɛ kɛ emli vidio ni yitso ji Kee Nyɔŋmɔ Nii lɛ woɔ bo hewalɛ ni ofee.

ANI OSHƐ MƆ NI BAANYƐ AJƆƆ EHE NƆ NI ABAPTISI LƐ?

9. Kɛ́ eba lɛ henɔjɔɔmɔ gbɛfaŋ lɛ, mɛni hewɔ esaaa akɛ okɛ ohe toɔ mɛi krokomɛi ahe?

⁹ Ekolɛ oonu he akɛ oshɛko mɔ ni baanyɛ ajɔɔ ehe nɔ ni abaptisi lɛ. Ekolɛ oona akɛ esa akɛ ofee tsakemɔi komɛi yɛ oshihilɛ mli koni onyɛ ohi shi yɛ Yehowa jeŋba he mlai lɛ anaa, loo ekolɛ oona akɛ esa akɛ ofee nibii ni baahã ohe Yehowa oye waa. (Kol. 2:​6, 7) Esoro bɔ ni mɔ fɛɛ mɔ ni akɛ lɛ kaseɔ Biblia lɛ yaa ehiɛ ehãa. Gbekɛbii kɛ oblahii kɛ oblayei komɛi shɛɔ henɔjɔɔmɔ kɛ baptisimɔ he mra. Shi mɛi komɛi hu lɛ, eheɔ amɛ be fioo. No hewɔ lɛ, okɛ ohe akato mɔ ko mɔ ko he. Kwɛmɔ tsakemɔi ni he hiaa ni ofee lɛ, ni ofee.—Gal. 6:​4, 5.

10. Kɛ́ oonu he akɛ oshɛko mɔ ni baanyɛ ajɔɔ ehe nɔ ehã Yehowa po lɛ, mɛni obaanyɛ ofee? (Kwɛmɔ akrabatsa ni ji “Kɛhã Mɛi Ni Atsɔse Amɛ Yɛ Anɔkwale Lɛ Mli Lɛ” hu.)

¹⁰ Kɛ́ oonu he akɛ oshɛko mɔ ni baanyɛ ajɔɔ ehe nɔ ehã Yehowa po lɛ, okɛfee oti ni ma ohiɛ akɛ obaabɔ mɔdɛŋ oshɛ he. Sɔlemɔ ni Yehowa aye abua bo ni onyɛ ofee tsakemɔi ni sa lɛ. (Fip. 2:13; 3:16) Ná nɔmimaa akɛ, Yehowa baabo osɔlemɔ lɛ toi ni ebaaye ebua bo.—1 Yoh. 5:14.

NƆ HEWƆ NI MƐI KOMƐI SHASHAOƆ SHI

11. Mɛni Yehowa baafee kɛye ebua bo ni onyɛ oye lɛ anɔkwa?

¹¹ Mɛi komɛi yɛ ni amɛshɛ henɔjɔɔmɔ kɛ baptisimɔ, shi amɛshashaoɔ shi akɛ amɛbaafee nakai. Ekolɛ amɛnuɔ he akɛ kɛ́ abaptisi amɛ ni amɛyafee esha ko ni yɔɔ hiɛdɔɔ lɛ, abaashwie amɛ kɛje asafo lɛ mli. Kɛ́ nakai onuɔ he lɛ, hemɔ oye akɛ Yehowa baaye ebua bo koni ‘onyiɛ bɔ ni sa ehiɛ, bɔ ni afee ni osa ehiɛ kwraa.’ (Kol. 1:10) Agbɛnɛ hu, ebaahã bo nyɛmɔ lɛ ni onyɛ ofee nɔ ni ja. Ebaanyɛ eye ebua bo aahu, ejaakɛ eye ebua mɛi babaoo ni amɛfee nɔ ni ja. (1 Kor. 10:13) No hewɔ ni afɔɔɔ mɛi shwiemɔ yɛ Kristofoi asafo lɛ mli lɛ. Yehowa yeɔ ebuaa ewebii lɛ ni amɛyaa nɔ amɛyeɔ lɛ anɔkwa.

12. Mɛɛ nibii baaye abua bo ni okafee esha ni yɔɔ hiɛdɔɔ?

¹² Akɛni wɔyeee emuu hewɔ lɛ, ewaaa akɛ wɔbaanu he akɛ wɔyafee efɔŋ. (Yak. 1:14) Shi kɛ́ oonu he akɛ oyafee efɔŋ ko lɛ, bo ji mɔ ni baakpɛ oyiŋ kɛji obaafee nakai efɔŋ lɛ loo ofeŋ. Mɛi komɛi wieɔ akɛ, kɛ́ mɔ ko nu he akɛ eyafee efɔŋ ko lɛ, bɔ fɛɛ bɔ ni fee lɛ, ebaayafee; enyɛŋ efee nɔ ko yɛ he. Shi enɛ jeee anɔkwale. Anɔkwa sane lɛ ji, mɔ fɛɛ mɔ baanyɛ akase bɔ ni ebaafee ekudɔ esusumɔi ni enyɛ ejie susumɔi ni ejaaa kɛje etsui mli. No hewɔ lɛ, kɛ́ onu he akɛ ofee efɔŋ ko lɛ, no etsɔɔɔ doo akɛ obaafee nakai efɔŋ lɛ. Mɛɛ nibii baaye abua bo ni okafee efɔŋ? Sɔlemɔ daa, ni okase Nyɔŋmɔ Wiemɔ lɛ hu daa. Agbɛnɛ hu, kaafolɔ asafoŋ kpeei amli. Kɛfata he lɛ, gbaa mɛi nibii ni okaseɔ lɛ. Kɛ́ otee nɔ ofee nibii nɛɛ, no baaye abua bo ni ohi shi yɛ ohenɔjɔɔmɔ lɛ naa. Ni be fɛɛ be lɛ, hã ehi ojwɛŋmɔ mli akɛ Yehowa baaye ebua bo ni ofee nakai.—Gal. 5:16.

13. Mɛɛ nɔkwɛmɔnɔ kpakpa Yosef fee ehã wɔ?

¹³ Kɛ́ otsɔ hiɛ osusu nɔ ni obaafee kɛ́ okɛ kaa kpe lɛ he lɛ, ewaŋ tsɔ kɛhãŋ bo akɛ obaahi shi yɛ ohenɔjɔɔmɔ lɛ naa. Ekã shi faŋŋ akɛ, mɛi komɛi ni awie amɛhe yɛ Biblia lɛ mli lɛ nyɛ amɛfee nakai eyɛ mli akɛ amɛyeee emuu tamɔ wɔ nɔŋŋ. Amɛteŋ mɔ kome ji Yosef. Potifar ŋa lɛ ka shii abɔ akɛ ebaahã ekɛ lɛ awɔ, shi no mli lɛ, Yosef le nɔ ni esa akɛ efee. Biblia lɛ kɛɛ “ekpɛlɛɛɛ,” ni ekɛɛ enuŋtsɔ lɛ ŋa lɛ akɛ: “Te aaafee tɛŋŋ ní mafee efɔŋ kpele nɛɛ, ní mafee esha mashi Nyɔŋmɔ lɛ?” (1 Mo. 39:​8-10) Enɛ hãa wɔnaa faŋŋ akɛ, dani yoo nɛɛ baaka Yosef lɛ, no mli lɛ Yosef etsɔ hiɛ esusu nɔ ni esa akɛ efee kɛ́ ekɛ shihilɛ ni tamɔ nɛkɛ kpe lɛ he momo. No hewɔ lɛ, be ni kaa lɛ ba lɛ, ewaaa tsɔ kɛhãaa lɛ akɛ ebaadamɔ naa.

14. Mɛni baaye abua bo ni onyɛ ojo efɔŋ naa foi?

¹⁴ Mɛɛ gbɛ nɔ obaanyɛ okase Yosef koni onyɛ ojo efɔŋ naa foi kɛ́ okɛ kaa ko kpe? Obaanyɛ osusu nɔ ni obaafee kɛ́ okɛ kaa ko kpe lɛ he bianɛ. Tsi ohe kwraa kɛje nibii ni Yehowa nyɛɔ lɛ ahe, ni kɛ́ amɛba ojwɛŋmɔ mli lɛ, jiemɔ yɛ ojwɛŋmɔ mli amrɔ nɔŋŋ. (Lala 97:10; 119:165) Kɛ́ ofee nakai lɛ, kɛ́ okɛ kaa ko kpe lɛ, ojwɛŋ he shii enyɔ po ni obaatsi ohe kɛje he, ejaakɛ ole nɔ ni esa akɛ ofee momo. Mɛni hewɔ? Ejaakɛ otsɔ hiɛ okpɛ oyiŋ yɛ he momo.

15. Mɛni kɛ́ ofee lɛ ebaahã Yehowa ana akɛ ‘okɛ hiɛdɔɔ miitao esɛɛ gbɛ’? (Hebribii 11:6)

¹⁵ Ekolɛ ole akɛ anɔkwale lɛ nɛ, ni oosumɔ ni osɔmɔ Yehowa kɛ otsui muu fɛɛ, shi loloolo lɛ onuuu he akɛ ojɔɔ ohe nɔ ohã Yehowa ni ohã abaptisi bo. Kɛ́ nakai lɛ, obaanyɛ ofee nɔ ni Maŋtsɛ David fee lɛ. Kpa Yehowa fai akɛ: “Ao Nyɔŋmɔ, taomɔ mimli, ni ole mitsui. Pɛimɔ mimli, ni ole susumɔi ni gbaa minaa lɛ fɛɛ. Kwɛmɔ kɛji gbɛ fɔŋ ko yɛ mimli, ni otsɔɔ mi gbɛ kɛya naanɔ gbɛ lɛ nɔ.” (Lala 139:​23, 24) Yehowa jɔɔ mɛi fɛɛ ni “kɛ hiɛdɔɔ taoɔ esɛɛ gbɛ lɛ.” Ohiɛ ni omiaa koni oshɛ oti ni okɛma ohiɛ akɛ obaajɔɔ ohe nɔ ni ohã abaptisi bo lɛ he lɛ hãa enaa akɛ ‘okɛ hiɛdɔɔ miitao esɛɛ gbɛ.’—Kanemɔ Hebribii 11:6.

YAA NƆ OFEE NIBII NI BAAHÃ OKƐ YEHOWA TEŊ NAANYOBƆƆ LƐ MLI AWA

16-17. Mɛni mɛi ni fɔlɔi ji Yehowa Odasefoi lɛ baanyɛ afee koni Yehowa agbala amɛ kɛba eŋɔɔ? (Yohane 6:44)

¹⁶ Yesu kɛɛ ‘mɔ ko nyɛŋ aba eŋɔɔ, akɛ ja Yehowa gbala lɛ dã.’ (Kanemɔ Yohane 6:44.) Susumɔ nɔ ni Yesu wie nɛɛ he waa, ni okwɛ bɔ ni ekɔɔ ohe ehãa, ejaakɛ nɔ ni ewie lɛ mli kwɔ. Yehowa naa nɔ kpakpa ko yɛ mɔ fɛɛ mɔ ni egbalaa kɛbaa eŋɔɔ lɛ he. Enaa mɛi ni tamɔ nɛkɛ lɛ akɛ “enii ni eshwɛɛɛ he kwraa.” (5 Mo. 7:6) No hewɔ lɛ, nakai enaa bo.

¹⁷ Ani ofɔlɔi ji Yehowa Odasefoi ni amɛmiitsɔse bo yɛ anɔkwale lɛ mli? Ekolɛ obaanu he akɛ amɛ amɛmiigbala bo kɛmiinyiɛ amɛsɛɛ. Shi Biblia lɛ kɛɛ: ‘Tsi obɛŋkɛ Nyɔŋmɔ, ni ebaatsi ebɛŋkɛ bo.’ (Yak. 4:8; 1 Kro. 28:9) Kɛ́ bo otsɔ hiɛ otsi obɛŋkɛ Yehowa lɛ, lɛ hu ebaatsi ebɛŋkɛ bo. Yehowa enaaa bo akɛ mɔ ko ni nyiɛ mli kɛkɛ ni aaya. Lɛ egbalaa mɔ fɛɛ mɔ kɛbaa eŋɔɔ—ni nyɛ mɛi ni nyɛfɔlɔi yɔɔ asafo lɛ mli lɛ hu fata he. Kɛ́ nyɛtsɔ hiɛ nyɛtsi nyɛbɛŋkɛ Yehowa lɛ, lɛ hu ebaatsi ebɛŋkɛ nyɛ tamɔ Yakobo 4:8 lɛ kɛɛ lɛ.—Okɛto 2 Tesalonikabii 2:13 lɛ he.

18. Mɛni he wɔbaasusu yɛ nikasemɔ ni nyiɛ sɛɛ lɛ mli? (Lala 40:8)

¹⁸ Kɛ́ ojɔɔ ohe nɔ ohã Yehowa ni ohã abaptisi bo lɛ, belɛ ookase Yesu. Ejɛ esuɔmɔ mli ekɛ ehe hã koni efee nɔ fɛɛ nɔ ni e-Tsɛ lɛ baakɛɛ efee lɛ. (Kanemɔ Lala 40:8; Heb. 10:7) Yɛ nikasemɔ ni nyiɛ sɛɛ lɛ mli lɛ, wɔbaasusu nɔ ni baaye abua bo ni oya nɔ osɔmɔ Yehowa yɛ obaptisimɔ lɛ sɛɛ lɛ he.