Sanebimɔi Ni Jɛ Kanelɔi Adɛŋ
Kpojiemɔ 17:16, 17 lɛ kɛɛ etsɛŋ Yehowa kɛ “eyiŋtoo” baawo jeŋmaji lɛ atsuiiaŋ. Mɛni ji nakai ‘yiŋtoo’ lɛ?
Kpojiemɔ 17:16, 17 lɛ tsɔɔ wɔ bɔ ni amanehulu kpeteŋkpele lɛ baaje shishi ahã. Jɛmɛ kɛɔ akɛ: “Akolontoi nyɔŋma ni ona lɛ kɛ kooloo awuiyelɔ lɛ, amɛbaanyɛ ashawo yoo lɛ ni amɛbaafee lɛ butuu ni amɛbaajie ehe fɛɛ, ni amɛbaaye eheloo ni amɛkɛ la baashã lɛ kwraa. Ejaakɛ Nyɔŋmɔ kɛwo amɛtsuiiaŋ koni amɛtsu eyiŋtoo he nii, hɛɛ, koni amɛkɛ amɛmaŋtsɛyeli lɛ ahã kooloo awuiyelɔ lɛ kɛtsu amɛyiŋtoo kome lɛ he nii.” Mɛɛ ‘yiŋtoo’ Nyɔŋmɔ kɛbaawo jeŋmaji lɛ atsuiiaŋ lɛ? Be ko ni eho lɛ, wɔwie yɛ wɔwoji lɛ amli akɛ, nakai yiŋtoo lɛ ji, koni amɛkpãtã amale jamɔi fɛɛ ni yɔɔ je lɛ mli lɛ ahiɛ.
Shi bianɛ lɛ, wɔná shishinumɔ hee yɛ sane nɛɛ he. ‘Yiŋtoo’ ni Yehowa kɛbaawo jeŋmaji lɛ atsuiiaŋ lɛ ji, ni “amɛkɛ amɛmaŋtsɛyeli lɛ ahã kooloo awuiyelɔ lɛ.” Te gbalɛ nɛɛ baafee tɛŋŋ eba mli? Sanebimɔi ni nyiɛ sɛɛ nɛɛ baaye abua wɔ ni wɔna.
Namɛi ahe awie yɛ gbalɛ nɛɛ mli? Awie “ashawo yoo” ko he. Gbɛ́i kroko ni akɛle “ashawo yoo” nɛɛ ji, “Babilon Kpeteŋkpele lɛ,” ni edamɔ shi kɛhã amale jamɔi fɛɛ ni yɔɔ je lɛ mli lɛ. Agbɛnɛ hu, awie ‘kooloo awuiyelɔ ko ni tsuɔ waa’ he, ni edamɔ shi kɛhã Jeŋmaji Ekomefeemɔ lɛ. Ato kuu nɛɛ shishi yɛ 1919 koni ekwɛ ni toiŋjɔlɛ ahi je lɛŋ fɛɛ, ni no mli lɛ atsɛɔ lɛ Jeŋmaji Akpaŋmɔ lɛ. (Kpo. 17:3-5) Naagbee kwraa lɛ, awie akɛ kooloo awuiyelɔ lɛ yɛ “akolontoi nyɔŋma.” Akolontoi nyɔŋma nɛɛ damɔ shi kɛhã nɔyelii fɛɛ ni fiɔ kooloo awuiyelɔ lɛ sɛɛ lɛ.
Mɛni wɔle yɛ ashawo yoo lɛ kɛ kooloo awuiyelɔ ni tsuɔ waa lɛ he? Ashawo yoo lɛ ‘ta kooloo awuiyelɔ lɛ nɔ,’ ni tsɔɔ akɛ, efiɔ kooloo awuiyelɔ lɛ sɛɛ, ni ebɔɔ mɔdɛŋ ni etsɔɔ lɛ nɔ ni efee.
Mɛni baaba ashawo yoo lɛ nɔ? Kooloo awuiyelɔ lɛ kɛ akolontoi nyɔŋma ni fiɔ esɛɛ lɛ ‘baanyɛ ashawo yoo lɛ’ aahu akɛ, amɛbaahe nɔ fɛɛ nɔ ni eyɔɔ lɛ yɛ edɛŋ, ni amɛbaahã mɛi fɛɛ ana akɛ gbɔmɔ fɔŋ ji lɛ. No sɛɛ lɛ, amɛbaakpãtã ehiɛ tamɔ bɔ ni Yehowa ewie lɛ pɛpɛɛpɛ. (Kpo. 17:1; 18:8) Enɛ baafee amale jamɔi fɛɛ anaagbee. Shi dani enɛ baaba lɛ, Yehowa baahã nɔyelii lɛ afee nɔ ko ni anako dã yɛ adesai ashihilɛ mli.
Mɛni Yehowa baahã nɔyelii lɛ afee? Yehowa kɛ “eyiŋtoo” lɛ baawo akolontoi nyɔŋma lɛ tsui mli. Mɛni ji nakai ‘yiŋtoo’ lɛ? No ji, ni ‘amɛkɛ amɛhewalɛ kɛ amɛhegbɛ lɛ ahã kooloo awuiyelɔ ni tsuɔ waa lɛ,’ ni ji, Jeŋmaji Ekomefeemɔ lɛ. (Kpo. 17:13) Enɛ tsɔɔ akɛ, jeee nɔyelii lɛ diɛŋtsɛ ni baajɛ amɛsuɔmɔ mli amɛkɛ amɛhewalɛ kɛ amɛhegbɛ lɛ baahã kooloo awuiyelɔ lɛ. Gbalɛ lɛ tsɔɔ akɛ, Yehowa diɛŋtsɛ ni baahã amɛfee nakai. (Abɛi 21:1; okɛto Yes. 44:28 lɛ he.) Shi ani nɔyelii lɛ kɛ amɛhewalɛ lɛ baahã kooloo awuiyelɔ lɛ fiofio? Dabi kwraa! Enɛ baaba lɛ trukaa. No sɛɛ lɛ, kooloo awuiyelɔ lɛ kɛ hewalɛ ni ená lɛ baatsu nii kɛkpãtã amale jamɔi fɛɛ ahiɛ kwraa.
No hewɔ lɛ, mɛni wɔbaanyɛ wɔkpa gbɛ? Yehowa baahã nɔyelii lɛ kɛ amɛhewalɛ lɛ ahã Jeŋmaji Ekomefeemɔ lɛ trukaa. Ni kɛ́ eba lɛ nakai pɛ, etsɛŋ, amanehulu kpeteŋkpele lɛ baaje shishi. No hewɔ lɛ, kɛ́ wɔnu akɛ nɔyelii lɛ kɛ amɛhewalɛ lɛ miihã Jeŋmaji Ekomefeemɔ lɛ fiofio jio, wɔnuuu nakai jio, esaaa akɛ wɔyeɔ wɔtsui. Moŋ lɛ, esa akɛ ‘wɔya nɔ wɔshi kpe ni wɔhã wɔhiɛ ahi wɔhe nɔ,’ ejaakɛ etsɛŋ, nibii baatsake trukaa!—1 Tes. 5:6.