NYƐYAA NƆ NYƐBUA!
Jeŋ Fɛɛ Edɔ Waa Bɔ Ni Eko Bako Pɛŋ—Mɛni Biblia Lɛ Kɛɔ Yɛ He?
Yɛ July 2022 lɛ, jeŋ fɛɛ dɔ waa bɔ ni eko bako pɛŋ. Naa amaniɛbɔi ni tsɔɔ nakai:
“China maŋ onukpai ebɔ mɛi ni yɔɔ China maji aaafee 70 amli lɛ kɔkɔ akɛ jeŋ baadɔ waa bɔ ni baanyɛ aye awui, ni enɛ ji shii enyɔ nɔ ni abɔɔ kɔkɔ nɛɛ yɛ nyɔɔŋ nɛɛ mli.”—July 25, 2022, CNN Wire Service.
“Jeŋ edɔ waa yɛ Yuropa aahu akɛ, yɛ Yuropa maji pii anɔ lɛ la eje yɛ koi pii amli ni amɛmiisha waa.”—July 17, 2022, The Guardian.
“Hɔgbaa lɛ, jeŋ dɔ waa yɛ maji ni yɔɔ United States bokagbɛ yɛ ŋshɔ lɛ naa, wuoyigbɛ, kɛ anaigbɛ lɛ pii amli bɔ ni eko bako pɛŋ.”—July 24, 2022, The New York Times.
Mɛni enɛɛmɛi fɛɛ tsɔɔ? Ani etsɔɔ akɛ be ko baashɛ ni adesai nyɛŋ ahi shikpɔŋ lɛ nɔ dɔŋŋ? Mɛni Biblia lɛ kɛɔ yɛ he?
Ani Biblia lɛ gba akɛ jeŋ baadɔ waa?
Hɛɛ. Bɔ ni jeŋ fɛɛ edɔ waa lɛ kɛ nibii komɛi ni Biblia lɛ gba akɛ ebaaya nɔ yɛ wɔbei nɛɛ amli lɛ yaa waa. Akɛ nɔkwɛmɔnɔ lɛ, Yesu gba akɛ yɛ wɔbei nɛɛ amli lɛ, “abaana gbeyei nibii ni eko bako pɛŋ.” (Luka 21:11, Good News Translation) Bɔ ni jeŋ dɔɔ waa yɛ wɔbei nɛɛ amli lɛ ehã mɛi pii miishe gbeyei akɛ, adesai baakpãtã nibii ahiɛ yɛ shikpɔŋ lɛ nɔ bɔ ni wɔnyɛŋ wɔhi nɔ dɔŋŋ.
Ani be ko baashɛ ni adesai nyɛŋ ahi shikpɔŋ lɛ nɔ dɔŋŋ?
Dabi. Nyɔŋmɔ bɔ shikpɔŋ lɛ koni adesai ahi nɔ kɛya naanɔ. (Lala 115:16; Jajelɔ 1:4) No hewɔ lɛ, eŋmɛŋ gbɛ ni adesai akpãtã shikpɔŋ lɛ hiɛ, moŋ lɛ ewo shi akɛ ‘ebaakpãtã mɛi ni kpãtãa shikpɔŋ lɛ hiɛ lɛ ahiɛ.’—Kpojiemɔ 11:18, shishigbɛ niŋmaa.
Naa gbalɛi enyɔ komɛi ni tsɔɔ nibii krokomɛi ni Nyɔŋmɔ ewo shi akɛ ebaafee:
“Ŋa kɛ shikpɔŋ gbiŋ baanya, ni ŋa kpataa mii baashɛ ehe, ni ebaagba afoforo tamɔ safron fɔfɔi.” (Yesaia 35:1) Nyɔŋmɔ hãŋ shikpɔŋ lɛ atsɔ ŋa kpataa ni anyɛŋ nɔ ahi, moŋ lɛ ebaasaa shikpɔŋ lɛ nɔ hei ni akpãtã hiɛ lɛ.
“Obaakwɛ shikpɔŋ lɛ, ni obaahã eba nii babaoo kɛ yibii kpakpai.” (Lala 65:9) Nyɔŋmɔ baahã shikpɔŋ lɛ atsɔ paradeiso fɛfɛo.
Kɛ́ ootao ole saji krokomɛi ni tsɔɔ akɛ, bɔ ni jeŋ dɔɔ waa kɛ nibii krokomɛi ni tamɔ nakai ni yaa nɔ lɛ fata nibii ni Biblia lɛ gba akɛ ebaaba lɛ ahe lɛ, kanemɔ sane ni yitso ji “Climate Change and Our Future—What the Bible Says” lɛ.
Kɛ́ ootao ole saji krokomɛi ni kɔɔ shi ni Nyɔŋmɔ ewo akɛ ebaasaa nibii ni afite yɛ shikpɔŋ lɛ nɔ lɛ he lɛ, kanemɔ sane ni yitso ji “Namɔ Baabaa Shikpɔŋ Lɛ Yi?” lɛ.