Nɔ Hewɔ Ni Wɔbaanyɛ Wɔná Hiɛnɔkamɔ Yɛ Afi 2023 Mli—Mɛni Biblia Lɛ Kɛɔ Yɛ He?

Ni wɔbote afi 2023 mli nɛɛ, wɔ fɛɛ wɔmiikpa nibii kpakpai agbɛ kɛhã wɔ kɛ wɔwekui lɛ. Mɛni hewɔ wɔbaanyɛ wɔná hiɛnɔkamɔ lɛ akɛ nibii baahi wɔsɛɛ lɛ?

Biblia lɛ hãa wɔ hiɛnɔkamɔ

Biblia lɛ hãa wɔ sanekpakpa ko, no ji akɛ, naagbai ni wɔkɛkpeɔ amrɔ nɛɛ ehiŋ shi daa, etsɛŋ esɛɛ baafo kwraa. Anɔkwa, Biblia lɛ, “aŋma koni etsɔɔ wɔ nii, koni kɛtsɔ . . . Ŋmalɛ lɛ mli miishɛjemɔ lɛ nɔ lɛ, wɔná hiɛnɔkamɔ.”​—Romabii 15:4.

• Kɛ́ ootao ole Biblia mli shiwoi lɛ ahe saji krokomɛi lɛ, kanemɔ sane ni ji, “Hiɛnɔkamɔ Diɛŋtsɛ Ni Tsɔɔ Akɛ Nibii Baahi Wɔsɛɛ” lɛ.

Hiɛnɔkamɔ ko ni baanyɛ aye abua bo bianɛ

Hiɛnɔkamɔ ni Biblia lɛ kɛhãa lɛ, etamɔ “sɛ́kɛ kɛhã wɔwala.” (Hebribii 6:19, shishigbɛ niŋmaa) Nakai hiɛnɔkamɔ lɛ baanyɛ ewaje wɔ. Ebaanyɛ eye ebua wɔ ni wɔkpee naagbai ni wɔkɛkpeɔ amrɔ nɛɛ anaa, wɔná jwɛŋmɔ ni ja, kɛ miishɛɛ ni sɛɛ efooo. Akɛ nɔkwɛmɔnɔ lɛ:

• Hiɛnɔkamɔ ni Biblia lɛ kɛhãa lɛ ye ebua nuu dãatɔlɔ ko ni enyɛ eye enaagbai anɔ. Kwɛmɔ vidio ni ji Bɔ Ni Mihiɔ Shi Hãa Lɛ Baje Mitsine lɛ koni ona bɔ ni eba lɛ ehã.

• Kɛ́ mɔ ko ni wɔsumɔɔ esane waa lɛ gbo lɛ, hiɛnɔkamɔ ni Biblia lɛ kɛhãa lɛ baanyɛ aye abua wɔ koni wɔkpee naa. Kwɛmɔ vidio ni ji Miishɛjemɔ Kɛhã Mɛi Ni Agbo Yɛ Amɛnɔ lɛ kɛna bɔ ni ebaanyɛ eye ebua bo.

Feemɔ nibii ni baahã ohiɛnɔkamɔ lɛ mli awa waa

Mɛi pii kpaa nibii kpakpai agbɛ, shi amɛnyɛɛɛ amɛná nɔmimaa akɛ amɛhiɛnɔkamɔ lɛ baaba mli gbi ko kɛ̃. Esoro Biblia lɛ shiwoi lɛ kwraa. Mɛni hewɔ? Ejaakɛ Yehowa Nyɔŋmɔ,a “mɔ ni nyɛŋ emale lɛ,” diɛŋtsɛ ji mɔ ni kɛ Biblia mli shiwoi lɛ hã. (Tito 1:2) Yehowa pɛ yɔɔ nyɛmɔ ni ebaanyɛ ehã eshiwoi lɛ fɛɛ aba mli; ebaanyɛ efee “nɔ fɛɛ nɔ ni esumɔɔ.”​—Lala 135:5, 6.

Wɔkɛ miishɛɛ miifɔ̃ bo nine koni obaná Biblia mli hiɛnɔkamɔ ni anyɛɔ akɛ he fɔ̃ɔ nɔ lɛ he sɛɛ. Kɛ́ otee nɔ ‘otao ŋmalɛi lɛ amli jogbaŋŋ’ lɛ, ohemɔkɛyeli yɛ hiɛnɔkamɔ nɛɛ mli lɛ mli baanyɛ awa. (Bɔfoi 17:11) Kaa wɔ-Biblia nikasemɔ ni wɔkɛ mɛi feɔ ni wɔheee nɔ ko lɛ okwɛ kɛna nɔ ni wɔtsɔɔ lɛ. Jee afi 2023 lɛ shishi kɛ hiɛnɔkamɔ akɛ, nibii baahi wɔsɛɛ!