Jeŋ Shipálɔi Etsi Nɔ Ni Blɔfo Tsɛɔ Lɛ Doomsday Clock Lɛ Kɛba Hiɛ​—Mɛni Biblia Lɛ Kɛɔ Yɛ He?

Yɛ January 24, 2023 lɛ, jeŋ shikpálɔi tsi nɔ ni Blɔfo tsɛɔ lɛ Doomsday Clocka, ni ji mfonirifeemɔŋ watsi ko, ni damɔ shi kɛhã je lɛ naagbee loo je lɛ hiɛkpatamɔ lɛ kɛbɛŋkɛ nyɔɔŋteŋ.

• “Atsi nɔ ni Blɔfo tsɛɔ lɛ Doomsday Clock lɛ, ni damɔ shi kɛhã adesai fɛɛ ahiɛkpatamɔ yɛ shikpɔŋ nɛɛ nɔ lɛ kɛbɛŋkɛ Jufɔ nyɔɔŋteŋ, yɛ ta ni yaa nɔ yɛ Ukraine, nuklea okplɛmii ni aasusu akɛ akɛbaawu ta, kɛ kɔɔyɔɔŋ tsakemɔ ni miifite nii waa yɛ je lɛŋ hei srɔtoi lɛ hewɔ, ni enɛ ji be ni atsi kɛbɛŋkɛ fe fɛɛ.”​—AFP International Text Wire.

• “Jufɔ lɛ, jeŋ shikpálɔi tsɔɔ akɛ atsi Doomsday Clock lɛ kɛba hiɛ sɛkɛnsi 90 dani nyɔɔŋteŋ baashɛ, ni enɛ ji be ni adesai ebɛŋkɛ Harmagedon fe fɛɛ yɛ yinɔsane mli.”​—ABC News.

• “Jeŋ shikpálɔi komɛi ni jɛ maji srɔtoi anɔ ebɔ kɔkɔ akɛ, nibii ni yaa nɔ lɛ tsɔɔ faŋŋ akɛ, ewaaa kwraa akɛ adesai anifeemɔi baakpãta amɛwala hiɛ yɛ shikpɔŋ nɛɛ nɔ, ni enɛ yɛ oshãra waa.”​—The Guardian.

Ani adesai ahiɛkpãtãmɔ kɛ wɔshikpɔŋ nɛɛ hiɛkpãtãmɔ ebɛŋkɛ kpaakpa? Ani esa akɛ wɔshe nɔ ni baaba wɔsɛɛ lɛ gbeyei? Mɛni Biblia lɛ kɛɔ yɛ he?

Nɔ ni baaba wɔsɛɛ

Biblia lɛ kɛɛ, “shikpɔŋ lɛ yɛ kɛmiiya naanɔ” ni “[gbɔmɛi baahi] nɔ kɛya naanɔ.” (Jajelɔ 1:4; Lala 37:29) No hewɔ lɛ, gbɔmɛi fiteŋ shikpɔŋ lɛ fɛɛ bɔ ni anyɛŋ nɔ ahi.

Kɛ̃lɛ, Biblia lɛ etsĩii tã akɛ ebaaba naagbee. Akɛ nɔkwɛmɔnɔ lɛ, Biblia lɛ kɛɛ “je lɛ  . . miiho kɛmiiya.”​—1 Yohane 2:17.

• Kɛ́ ootao ole nɔ ni Biblia lɛ tsɔɔ kɛ́ eewie je lɛ naagbee lɛ he lɛ, kanemɔ sane ni ji “Is the World Coming to an End? What Is the Apocalypse?” lɛ.

• Kɛ́ ootao ole nɔ ni Biblia lɛ kɛɔ yɛ nɔ ni nibii ni yaa nɔ yɛ je lɛ mli lɛ tsɔɔ he lɛ, kanemɔ sane ni ji “When Will the World End?” lɛ.

Bɔ ni obaafee oná jwɛŋmɔ ni ja

Ekɔɔɔ he eko naagbai ni yaa nɔ yɛ je lɛ mli bianɛ lɛ, Biblia lɛ baanyɛ aye abua wɔ ni wɔná jwɛŋmɔ ni ja. Mɛɛ gbɔ nɔ?

• Biblia lɛ hãa wɔ ŋaawoi kpakpai ni baanyɛ aye abua wɔ yɛ shihilɛ mli. (2 Timoteo 3:16, 17) Akɛ nɔkwɛmɔnɔ lɛ, kanemɔ sane ni ji “Bɔ Ni Obaafee Ni Okaye Otsui Fe Nine” lɛ koni ona bɔ ni Biblia lɛ baanyɛ aye abua bo ni oná jwɛŋmɔ ni ja ekɔɔɔ he eko naagba ni okɛkpeɔ yɛ shihilɛ mli ŋmɛnɛ lɛ.

• Biblia lɛ hãa wɔnáa hiɛnɔkamɔ ni mashi shiŋŋ kɛhã wɔsɛɛ. (Romabii 15:4) Etsɔɔ wɔ nibii ni esa akɛ wɔkpa gbɛ akɛ ebaaba amrɔ nɛɛ kɛ nibii ni baaba wɔsɛɛ hu, ni no hãa wɔnáa ekãa ekɔɔɔ he eko nibii ni wɔkɛkpeɔ bianɛ.

Bɔ ni afee ni oná Biblia lɛ he sɛɛ jogbaŋŋ kɛmɔ shi lɛ, ofainɛ, kaa Biblia mli nikasemɔ ni wɔkɛ mɛi feɔ ni wɔheee shika lɛ okwɛ ŋmɛnɛ.