E+/taseffski/via Getty Images (Stock photo. Posed by model.)
NYƐYAA NƆ NYƐBUA!
Oblahii Kɛ Oblayei Ni Náa Jwɛŋmɔŋ Naagba Lɛ Ayi Miifa Waa—Mɛni Biblia Lɛ Kɛɔ Yɛ He?
Yɛ Ju, February 13, 2023 lɛ, gbɔmɔtsoŋ hewalɛnamɔ nitsumɔhe ko ni ji, Centers for Disease Control and Prevention (CDC) ni yɔɔ United States lɛ kɛ jwɛŋmɔŋ naagba he amaniɛbɔɔ ni kɔɔ oblahii kɛ oblayei ni yɔɔ Amerika lɛ ahe lɛ hã. Amaniɛbɔɔ lɛ tsɔɔ mli akɛ, oblahii kɛ oblayei ni yaa sɛkɛndre skul lɛ ayibɔ ni fa fe oha mlijaa 40 amiishɛɛ tã be kplaŋŋ, ni yɛ nakai beiaŋ nɔŋŋ lɛ amɛnu he akɛ amɛbɛ hiɛnɔkamɔ ko kwraa.
Yoo ko ni atsɛɔ lɛ Dr. Kathleen Ethier, ni eji onukpa kɛhã CDC lɛ fã ko ni kwɛɔ oblahii kɛ oblayei kɛ skulbii ahewalɛnamɔ nɔ lɛ (Division of Adolescent and School Health) wie akɛ: “Eyɛ mli akɛ afii nyɔŋma ni eho lɛ, wɔnaa akɛ bɔ ni oblahii kɛ oblayei náa jwɛŋmɔŋ naagba lɛ amli miiwo wu moŋ nɛ, shi bɔ ni naagba nɛɛ yaa nɔ emli woɔ wu kɛ amaniɛbɔi ni tsɔɔ bɔ ni oblayei komɛi kaa akɛ amɛbaagbe amɛhe lɛ efa waa bɔ ni wɔnako eko dã.”
Amaniɛbɔɔ lɛ tsɔɔ mli akɛ:
Yɛ oblayei 10 fɛɛ 10 mli lɛ, anáa mɛi fe 1, ni ji oha mlijaa 14 ni anyɛ amɛnɔ akɛ amɛ ná bɔlɛ, jeee yɛ amɛsuɔmɔnaa. Dr. Ethier wie akɛ: “Enɛ yɛ musuŋshaa kɛ gbeyei fɛɛ. Ejaakɛ oblayei 10 fɛɛ 10 ni obaana lɛ, kɛ́ hooo kwraa lɛ ato amɛteŋ mɔ kome loo nɔ ni fe nakai kabonaa.”
Yɛ oblayei 3 fɛɛ 3 mli lɛ, anáa mɔ kome ni eka akɛ ebaagbe ehe.
Yɛ oblayei 5 fɛɛ 5 mli lɛ, aaafee amɛteŋ mɛi 3 amiishɛɛ tã loo amɛhiɛnɔkamɔ fɛɛ tã.
Amaniɛbɔɔ nɛɛ kumɔɔ mɔ tsui waa. Kulɛ oblahiiaŋ kɛ oblayeiaŋ ji be ni esa akɛ aná miishɛɛ waa. Mɛni baanyɛ aye abua oblahii kɛ oblayei koni amɛnyɛ amɛdamɔ naagbai ni amɛkɛkpeɔ ŋmɛnɛ lɛ anaa? Mɛni Biblia lɛ kɛɔ yɛ he?
Biblia lɛ kɛ ŋaawoi ni baanyɛ aye abua oblahii kɛ oblayei lɛ hãa
Biblia lɛ hãa wɔnaa jaramɔ bei ni wɔyɔɔ mli ŋmɛnɛ lɛ jogbaŋŋ. Etsɛɔ bei nɛɛ akɛ “bei krɛdɛi ni mli shihilɛ wa.” (2 Timoteo 3:1-5) Kɛ̃lɛ, Biblia lɛ kɛ ŋaawoi ni be hooo ehã oblahii kɛ oblayei akpekpei abɔ ni yɔɔ jeŋ fɛɛ. Ŋaawoi nɛɛ miiye miibua amɛ kɛmiikpee naagbai ni amɛkɛkpeɔ lɛ anaa, ni amɛmiiye omanye. Kanemɔ saji ni ajɛ Biblia lɛ mli aŋma ni nyiɛ sɛɛ nɛɛ lɛ okwɛ.
Yelikɛbuamɔ kɛhã oblahii kɛ oblayei ni nuɔ he akɛ esa akɛ amɛgbe amɛhe
Yelikɛbuamɔ kɛhã oblahii kɛ oblayei ni amɛná jwɛŋmɔŋ naagba, amɛmiishɛɛ etã, loo amɛnáa susumɔi ni ejaaa
Bɔ Ni Obaafee Oná Miishɛɛ Kɛ́ Omiishɛɛ Tã (nitɛŋmɔi ni tsɔɔ mɔ nii)
Yelikɛbuamɔ kɛhã oblahii kɛ oblayei ni aawa amɛyi yɛ skul loo yɛ Intanɛt lɛ kɛ social media nɔ
Yii Yiwalɔ Lɛ Ni Omaaa Lɛ Atswɛrɛ (nitɛŋmɔi ni tsɔɔ mɔ nii)
Yelikɛbuamɔ kɛhã oblahii kɛ oblayei ni atoɔ amɛ kabonaa loo afeɔ amɛ bɔlɛnamɔ niseniianii
Biblia lɛ kɛ ŋaawoi ni baanyɛ aye abua hãa fɔlɔi
Biblia lɛ kɛ ŋaawoi ni baaye abua fɔlɔi koni amɛkɛye amɛbua amɛbii oblahii kɛ oblayei kɛkpee shihilɛ mli naagbai anaa lɛ hãa. Kanemɔ saji ni ajɛ Biblia lɛ mli aŋma ni nyiɛ sɛɛ nɛɛ lɛ okwɛ.