Je Lɛ Nɔyelii Lɛ Fite Amerika Dɔlai Triliɔn 2 Kɛ Sɛɛ Yɛ Tawuu Nibii Ahe​—Mɛni Biblia Lɛ Kɛɔ Yɛ He?

Yɛ afi 2022 lɛ, shika ni je lɛ nɔyelii lɛ fite yɛ tawuu nibii ahe lɛ naa yashɛ Amerika dɔlai triliɔn 2.24, ni enɛ bako daŋ yɛ yinɔsane mli. Shi eba lɛ nakai titri lɛ akɛni Russia yatutua Ukraine lɛ hewɔ. Amaniɛbɔɔ ko ni nitsumɔhe ni ji Stockholm International Peace Research Institute (SIPRI) lɛ kɛhã yɛ April 2023 lɛ tsɔɔ mli akɛ, yɛ afi 2022 mli lɛ:

• Shika ni Yuropa nɔyelii lɛ fiteɔ yɛ tawuu nibii ahe lɛ “tee hiɛ oha mlijaa 13 yɛ afi lɛ mli, ni no ji shika ni fa fe fɛɛ ni afite yɛ afi kome mli kɛjɛ afi 1991.”

• “Shika ni Russia fiteɔ yɛ tawuu nibii ahe lɛ…tee hiɛ oha mlijaa 9.2, ni kulɛ, Russia yɛ gbɛhe ni ji enumɔ yɛ maji ni fiteɔ shika waa yɛ tawuu nibii ahe lɛ mli, shi enɛ hã ebaje gbɛhe ni ji etɛ.”

• United States kã he eji maŋ ni fiteɔ shika fe fɛɛ yɛ tawuu nibii ahe yɛ je lɛ mli, “ejaakɛ shika ni je lɛ maji lɛ fɛɛ fiteɔ yɛ tawuu nibii ahe lɛ, lɛ pɛ efite oha mlijaa 39.”

Nuu ko ni atsɛɔ lɛ Dr. Nan Tian, ni fata mɛi ni ŋma SIPRI amaniɛbɔɔ lɛ ahe lɛ wie akɛ: “Yɛ nyɛsɛɛ afii nɛɛ amli lɛ, je lɛ nɔyelii lɛ etee nɔ efite shika waa yɛ tawuu nibii ahe fe be fɛɛ ni eho, ni eji okadi ni tsɔɔ akɛ wɔyɛ jeŋ ko ni bɛ shweshweeshwe kwraa mli.”

Biblia lɛ gba bɔ ni je lɛŋ maji ni yɔɔ hewalɛ waa lɛ kɛ amɛhe wuɔ ta ŋmɛnɛ, ni amɛkɛ amɛhe shiɔ mple hu lɛ efɔ̃ shi, ni etsɔɔ nɔ kome pɛ ni baanyɛ ekɛ toiŋjɔlɛ diɛŋtsɛ aba.

Biblia lɛ gba akɛ bɔ ni maji kɛ amɛhe wuɔ ta lɛ mli baawo wu

• Biblia lɛ tsɛɔ be ni wɔyɔɔ mli nɛɛ akɛ “naagbee be lɛ.”​—Daniel 8:19.

• Biblia wolo ni ji Daniel lɛ gba akɛ, yɛ nakai be lɛ mli lɛ, je lɛ maji ni yɔɔ hewalɛ lɛ kɛ amɛhe baashi mple. Jeŋ hewalɛi nɛɛ “baashishii amɛhe” loo amɛbaapele mɔ ni he wa fee fɛɛ lɛ he. Nɔ ni baafata mpleshii nɛɛ he ji “jwetrii” babaoo loo shika pii ni abaafite yɛ tawuu nibii ahe.​—Daniel 11:40, 42, 43.

Kɛ́ ootao ole Biblia mli gbalɛ ni hãa mɔ naa kpɛɔ ehe nɛɛ he saji krokomɛi lɛ, kwɛmɔ vidio ni ji Gbalɛ Lɛ Eba Mli​—Daniel Yitso 11 lɛ.

Bɔ ni abaafee aná toiŋjɔlɛ diɛŋtsɛ

• Biblia lɛ kɛɛ akɛ, Nyɔŋmɔ kɛ nɔyeli kroko baaye adesai anɔyelii anajiaŋ. Nyɔŋmɔ “baato maŋtsɛyeli ko ni anyɛŋ hiɛ akpãtã lɛ shishi. Ni ashiŋ maŋtsɛyeli nɛɛ ahãŋ maŋ ko maŋ ko. Ebaajwara maŋtsɛyelii nɛɛ fɛɛ ni ebaakpãtã amɛhiɛ, ni lɛ pɛ ebaadamɔ shi kɛya naanɔ.”​—Daniel 2:44.

• Etsɛŋ, Yehowaa Nyɔŋmɔ baafee nɔ ko ni adesai nyɛŋ afee, no ji ebaahã aná toiŋjɔlɛ diɛŋtsɛ kɛya naanɔ. Yɛ mɛɛ gbɛ nɔ? E-Maŋtsɛyeli nɔyeli ni yɔɔ ŋwɛi lɛ baafite nibii fɛɛ ni akɛwuɔ ta lɛ, ni ebaafo yiwalɛ nifeemɔi fɛɛ asɛɛ.​—Lala 46:8, 9.

Kɛ́ ootao ole nibii ni Nyɔŋmɔ Maŋtsɛyeli lɛ baafee lɛ ekomɛi lɛ, kanemɔ sane ni ji “Under God’s Kingdom ‘Peace Will Abound’ lɛ.”