4 Nyɛkɛ Tɔmɔi Akea

NƆ NI ETSƆƆ

Kɛ́ akɛɛ okɛ tɔmɔ ake lɛ, etsɔɔ akɛ kɛ́ mɔ ko fee bo nɔ ko lɛ, obaaŋmɛɛ he ni obɛŋ mɔ lɛ owoŋ omli. Kɛ́ okɛ tɔmɔ ke lɛ, no etsɔɔɔ akɛ oobu nɔ ni mɔ lɛ fee lɛ akɛ ebɛ hiɛdɔɔ loo ni obaafee onii tamɔ nɔ ni efeko bo nɔ ko kwraa.

BIBLIA MLI SHISHITOO MLA: “Kɛ́ mɔ ko yɛ sane yɛ mɔ ko he po lɛ, nyɛyaa nɔ nyɛnáa tsui nyɛhãa nyɛhe ni nyɛkɛkea nyɛhe tswaa.”​—Kolosebii 3:13.

“Kɛ́ osumɔɔ mɔ ko lɛ, okɛ ojwɛŋmɔ emãaa efãtɔi lɛ anɔ, shi moŋ okɛ ojwɛŋmɔ maa esui kpakpai anɔ.”​—Aaron.

NƆ HEWƆ NI EHE HIAA

Kɛ́ obɛ ohefatalɔ lɛ owo omli lɛ, obaaye bo diɛŋtsɛ ogbɔmɔtso lɛ awui ni onáŋ miishɛɛ. Ni no baanyɛ afite nyɛgbãla lɛ hu.

“Gbi ko lɛ, miwu kpa mi fai yɛ nɔ ko ni efee ni dɔ mi waa lɛ he. No mli lɛ, ewa kɛhã mi akɛ mikɛbaake lɛ. Mikɛ ke lɛ sɛɛ mli moŋ, shi edɔ mi waa akɛ minyɛɛɛ mafee nakai mra, ejaakɛ enɛ hãaa wɔnyɛ wɔkɛ wɔhe aye jogbaŋŋ.”​—Julia.

NƆ NI OBAANYƐ OFEE

OKƐ SAJI NƐƐ APƐI OMLI OKWƐ

Be kroko ni ohefatalɔ lɛ baafee nɔ ko, loo ebaawie nɔ ko ni baadɔ bo waa lɛ, bi ohe akɛ:

• ‘Ani sane gbaa minaa waa?’

• ‘Ani nɔ ni efee mi lɛ yɛ hiɛdɔɔ waa aahu akɛ ja ekpa mi fai dã, aloo manyɛ maŋmɛɛ he kɛkɛ?’

OKƐ OHEFATALƆ LƐ ASUSU SANEBIMƆI NI NYIƐ SƐƐ NƐƐ AHE

• Kɛ́ mihefatalɔ lɛ tɔ̃ minɔ lɛ, be enyiɛ eheɔ mi dani mikɛ ehe keɔ lɛ?

• Mɛni manyɛ mafee koni kɛ́ mihefatalɔ lɛ tɔ̃ minɔ lɛ, mikɛ ehe ake lɛ oya?

ŊAAWOO

• Kɛ́ ohefatalɔ lɛ tɔ̃ onɔ lɛ, kaaná ehe jwɛŋmɔ fɔŋ.

• Kɛ́ okai akɛ “wɔ fɛɛ wɔtɔ̃ɔ babaoo” lɛ, no baaye ebua bo ni ojie nɔ ni ohefatalɔ lɛ fee bo lɛ kɛjɛ ojwɛŋmɔ mli.​—Yakobo 3:2.

“Kɛ́ tɔmɔ lɛ jɛ wɔyi enyɔ lɛ fɛɛ lɛ, ewaaa akɛ wɔkɛbaake. Shi kɛ́ mɔ kome pɛ tɔ̃ lɛ, no lɛ ewa. Kɛ́ akpa bo fai ni okpɛlɛ ni okɛ tɔmɔi ke lɛ, no tsɔɔ akɛ obaa ohe shi diɛŋtsɛ.”​—Kimberly.

BIBLIA MLI SHISHITOO MLA: “Okɛ mɔ ni kɛ bo yeɔ sane lɛ asaa mra.”​—Mateo 5:​25.