Yitso 41

Naataomɔ ko Shishijee He

BENI etee niyeli okpɔlɔŋmɛɛ lɛ shishi yɛ Simon shia lɛ sɛɛ etsɛɛɛ lɛ, Yesu je eshiɛmɔ gbɛfaa ni ji enyɔ yɛ Galilea lɛ shishi. Beni etee nakai maŋ lɛ mli klɛŋklɛŋ lɛ, no mli lɛ eklɛŋklɛŋ kaselɔi, Petro, Andrea, Yakobo, kɛ Yohane fata ehe. Shi agbɛnɛ bɔfoi 12 lɛ, kɛ agbɛnɛ yei komɛi, hu fata ehe. Mɛnɛɛmɛi ateŋ mɛi komɛi ji Maria Magdalena, Susana, kɛ Yohana ni ewu ji Maŋtsɛ Herode tsulɔ nukpa lɛ.

Yɛ be mli ni Yesu sɔɔmɔ nitsumɔ lɛ yaa nɔ lɛ, nakai nɔŋŋ hu ji naataomɔ ni kɔɔ enitsumɔ lɛ he lɛ. Akɛ nuu ko ni daimonio yɔɔ emli, ni eshwila ni enyɛɛɛ ewie hu ba Yesu ŋɔɔ. Beni Yesu tsa lɛ ni eha eye ehe kɛjɛ daimonio lɛ kudɔmɔ shishi ni no hewɔ lɛ agbɛnɛ enyɛɔ ewieɔ ni enaa nii hu lɛ, asafo babaoo ni na lɛ he enɔ amɛye kwraa. Amɛbɔi kɛɛmɔ akɛ: “Ani jeee David Bi lɛ nɛ?”

Kɛkɛ ni mɛi babaoo babua amɛhe naa kɛbɔle shia ni Yesu yɔɔ mli lɛ he fɛɛ kɛkpe akɛ lɛ kɛ ekaselɔi lɛ nyɛɛɛ amɛye nii po. Kɛfata mɛi ni susuɔ akɛ lɛ ji “David Bi” ni awo shi yɛ ehe lɛ ahe hu lɛ, woloŋmalɔi lɛ kɛ Farisifoi lɛ hu jɛ Yerusalem tɔɔ amɛba ni amɛbagbe ehe guɔ. Beni Yesu wekumɛi lɛ nu basabasafeemɔ ni yaa nɔ yɛ Yesu masɛi lɛ he lɛ, amɛba koni amɛbamɔ lɛ kɛya. Mɛni hewɔ?

Ojogbaŋŋ, Yesu diɛŋtsɛ nyɛmimɛi lɛ tete po heko enɔ amɛyeko akɛ eji Nyɔŋmɔ Bi. Agbɛnɛ hu, maŋ basabasafeemɔ kɛ nɔmɔ ni eba yɛ ehewɔ lɛ jeee nɔ ko ni anaa yɛ Yesu diɛŋtsɛ he, taakɛ amɛle lɛ beni edaa yɛ Nazaret lɛ. No hewɔ lɛ, amɛheɔ amɛyeɔ akɛ nɔ ko miigba Yesu naa waa yɛ jwɛŋmɔ gbɛfaŋ. No hewɔ lɛ amɛmu sane naa akɛ “eyiŋ miikã lɛ,” ni no hewɔ lɛ amɛmiitao ni amɛmɔ lɛ kɛya.

Shi kɛlɛ odaseyeli lɛ yɛ faŋŋ akɛ Yesu etsa nuu ni daimonio yɔɔ emli lɛ. Woloŋmalɔi lɛ kɛ Farisifoi lɛ le akɛ amɛnyɛŋ amɛje anɔkwale ni enɛ ji lɛ he ŋwane. No hewɔ lɛ bɔni afee ni amɛgbe Yesu he guɔ lɛ, amɛkɛɛ gbɔmɛi lɛ akɛ: “Jeee yaka mɔ nɛ faa daimonio lɛ, shi daimonio alumɔ Beelzebul hewalɛ naa ni.”

Akɛni ele amɛyiŋtoo hewɔ lɛ, Yesu tsɛ woloŋmalɔi lɛ kɛ Farisifoi lɛ kɛba eŋɔɔ ni ekɛɛ: “Maŋtsɛyeli fɛɛ maŋtsɛyeli ni gbaa woɔ lɛ diɛŋtsɛ ehe lɛ, ejwaa; ni maŋ fɛɛ maŋ aloo shia fɛɛ shia ni gbaa woɔ lɛ diɛŋtsɛ ehe lɛ, edamɔɔɔ shi. Ni kɛji Satan fã Satan lɛ, egba ewo lɛ diɛŋtsɛ ehe; belɛ te emaŋtsɛyeli lɛ aaafee tɛŋŋ edamɔ shiŋ?”

Mɛɛ niianaatsɔɔmɔ ni kuɔ mɔ naa nɛ! Akɛni Farisifoi lɛ kɛɔ akɛ mɛi komɛi ni jɛ amɛteŋ efamɔ daimonioi hewɔ lɛ, Yesu hu bi amɛ akɛ: “Ni kɛji mi lɛ, Beelzebul naa mifaa daimonio yɛ lɛ, nyɛbihii lɛ, namɔ naa amɛfamɔɔ amɛ yɛ?” Yɛ wiemɔ kroko mli lɛ, belɛ esa akɛ akɛ naafolɔmɔ ni amɛkɛshiɔ Yesu lɛ ashi amɛ hu tamɔ bɔ ni amɛkɛshiɔ lɛ lɛ nɔŋŋ. Kɛkɛ ni Yesu bɔ amɛ kɔkɔ akɛ: “Shi kɛji mi lɛ, Nyɔŋmɔ mumɔ lɛ naa mifaa daimonio lɛ yɛ lɛ, no lɛ ninamɔ Nyɔŋmɔ maŋtsɛyeli lɛ enina nyɛ lɛ.”

Bɔni afee ni etsɔɔ akɛ daimonioi ni efamɔɔ lɛ ji Satan nɔ hewalɛ ni eyɔɔ lɛ he odaseyeli lɛ, Yesu kɛɛ amɛ akɛ: “Shi kulɛ te aaafee tɛŋŋ ni mɔ ko aaanyɛ hewalɔ we ebote ni eyaha enibiiŋ, akɛ ja efimɔ lɛ hewalɔ lɛ da, ni eeewo ewe lɛ haa? Mɔ ni bɛ migbɛfaŋ lɛ, ete shi ewo mi; ni mɔ ni kɛ mi buaaa naa lɛ, gbɛ egbɛɔ eshwaa.” Eka shi faŋŋ akɛ Farisifoi lɛ teɔ shi woɔ Yesu, ni amɛjieɔ amɛhe kpo amɛtsɔɔ akɛ amɛji Satan webii. Amɛmiigbɛ Israelbii lɛ kɛmiijɛ emasɛi kɛmiiya sɛɛ.

Yɛ enɛ hewɔ lɛ, Yesu bɔ nɛkɛ shitee-kɛ-wolɔi ni tamɔ Satan nɛɛ kɔkɔ akɛ “mumɔ lɛ he musubɔɔ lɛ aŋɔfaŋ gbɔmɛi.” Etsɔɔ mli akɛ: “Ni mɔ fɛɛ mɔ ni aaawie wiemɔ ko ashi gbɔmɔ Bi lɛ, aaaŋɔfa lɛ; shi mɔ fɛɛ mɔ ni aaawie ashi mumɔ krɔŋkrɔŋ lɛ, aŋɔfaŋ lɛ yɛ je nɛŋ loo jeŋ ni baaba lɛ mli.” Nakai woloŋmalɔi lɛ kɛ Farisifoi lɛ etɔ tɔmɔ ni aŋɔfaaa lɛ yɛ Nyɔŋmɔ mumɔ krɔŋkrɔŋ lɛ naakpɛɛ nifeemɔi lɛ ni amɛkɛɛ ejɛ Satan lɛ hewɔ. Mateo 12:22-32; Marko 3:19-30; Yohane 7:5.

▪ Yesu gbɛfaa ni ji enyɔ kɛyaa Galilea lɛ yɛ sɔrɔto yɛ eklɛŋklɛŋ nɔ lɛ he yɛ mɛɛ gbɛ nɔ?

▪ Mɛni hewɔ Yesu wekumɛi lɛ bɔ mɔdɛŋ ni amɛmɔ lɛ lɛ?

▪ Mɛɛ gbɛ nɔ Farisifoi lɛ bɔ mɔdɛŋ ni amɛgbe naakpɛɛ nibii ni Yesu fee lɛ he guɔ yɛ, ni mɛɛ gbɛ nɔ Yesu tsɔ eku amɛwiemɔi lɛ anaa?

▪ Mɛni Farisifoi lɛ ye he fɔ, ni mɛni hewɔ?