Yitso 42

Yesu Ka Farisifoi lɛ Ahiɛ

YESU tsɔɔ mli akɛ, kɛji Satan hewalɛ ji nɔ ni ekɛfaa daimonioi lɛ, no lɛ Satan egba ewo lɛ diɛŋtsɛ ehe. Etee nɔ akɛ: “Nyɛtɛoa tso kpakpa, ni ewo yibii kpakpai; aloo nyɛtɛoa tso fɔŋ, ni ewo yibii fɔji; ejaakɛ tso yibii aŋɔleɔ tso.”

Eji kwashiai asane akɛ aaakɛɛ akɛ yibii kpakpai ni ji daimonioi ni Yesu famɔɔ lɛ jɛ Satan ni esɔmɔɔ lɛ hewɔ. Kɛji tso lɛ yibii lɛ ji ekpakpa lɛ, belɛ tso lɛ nyɛŋ afee tso fɔŋ. Yɛ gbɛ kroko nɔ lɛ, Farisifoi lɛ ayibii fɔŋ ni ji naafolɔmɔ folo ni amɛkɛfɔ Yesu nɔ kɛ shitee-kɛ-woo ni bɛ nɔdaamɔ nɔ lɛ ji odaseyeli ni tsɔɔ akɛ gbɔmɛi fɔji diɛŋtsɛ ji amɛ. Yesu kɛɛ akɛ: “Nyɛ shinɔi ashwiei! Te aaafee tɛŋŋ ni nyɛ mɛi ni nyɛji mɛi fɔji lɛ, ni nyɛaanyɛ ekpakpa nyɛwieŋ? Ejaakɛ nɔ ni eyi tsui kɛteke nɔ lɛ, no nɔŋŋ naabu wieɔ.”

Akɛni wɔwiemɔi tsɔɔ nɔ ni yɔɔ wɔtsui mli hewɔ lɛ, nɔ ni wɔwieɔ lɛ haa nɔdaamɔ nɔ kɛha kojomɔ. Yesu kɛɛ: “Shi miikɛɛ nyɛ akɛ, yaka wiemɔ fɛɛ yaka wiemɔ ni gbɔmɛi wieɔ lɛ, amɛbaabu he akɔntaa yɛ Kojomɔ Gbi lɛ nɔ. Shi owiemɔi lɛ amli aaajɛ abuo bem, ni owiemɔi lɛ amli aaajɛ abuo fɔ.”

Yɛ hewalɛ nitsumɔi ni Yesu tsu lɛ fɛɛ sɛɛ lɛ, woloŋmalɔi lɛ kɛ Farisifoi lɛ bi lɛ akɛ: “Tsɔɔlɔ, wɔmiitao onine naa okadi ko wɔkwɛ.” Eyɛ mli akɛ ekolɛ nɛkɛ hii nɛɛ pɔtɛɛ ni jɛ Yerusalem lɛ enako enaakpɛɛ nibii lɛ moŋ, shi odasefoi ni ena enifeemɔi lɛ kɛ amɛhiŋmɛii yɛ. No hewɔ lɛ Yesu kɛɛ Yudafoi ahiɛnyiɛlɔi lɛ akɛ: “Yinɔbii fɔji kɛ gbalafitelɔi miitao okadi; shi ahaŋ ama okadi ko, akɛ ja gbalɔ Yona okadi lɛ.”

Yesu tee nɔ ni etsɔɔ nɔ ni ewie nɛɛ shishi akɛ: “Ejaakɛ bɔ ni Yona ye shwaneshwane kɛ nyɔɔŋnyɔɔŋ gbii etɛ yɛ ŋshɔŋloo kpeteŋkpele lɛ musuŋ lɛ, nakai gbɔmɔ Bi lɛ aaaye shwaneshwane kɛ nyɔɔŋnyɔɔŋ gbii etɛ yɛ shikpɔŋ lɛ tsui mli.” Yɛ be mli ni ŋshɔŋloo lɛ emi lɛ sɛɛ lɛ, Yona je kpo tamɔ nɔ ni atee lɛ shi, no hewɔ lɛ Yesu miigba akɛ ebaagbo ni gbi ni ji etɛ lɛ nɔ lɛ abaatee lɛ shi hiɛkalɔ. Shi kɛlɛ, Yudafoi ahiɛnyiɛlɔi lɛ kwa “Yona okadi lɛ,” yɛ be mli ni atee Yesu shi lɛ sɛɛ po.

No hewɔ lɛ Yesu miikɛɛ akɛ Ninive hii ni tsake amɛtsui yɛ Yona shiɛmɔ lɛ hewɔ lɛ baate shi yɛ kojomɔ lɛ mli ni amɛbaabu Yudafoi ni kpoo Yesu lɛ fɔ. Yɛ nakai gbɛ nɔ nɔŋŋ lɛ, ekɛto Sheba maŋnyɛ, ni jɛ shikpɔŋ lɛ naagbee hei koni ebabo Salomo nilee lɛ toi ni enaa kpɛ ehe yɛ nɔ ni ena ni enu lɛ he lɛ he. Yesu kɛɛ akɛ: “Ni naa, mɔ ni fe Salomo yɛ biɛ.”

Kɛkɛ ni Yesu kɛ nuu ko ni ajie mumɔ ni he tseee kɛjɛ emli lɛ he abɛbua lɛ ha. Shi kɛlɛ, nuu lɛ haaa nɔ kpakpa abote he ni ashi afɔ shi efolo lɛ mli, no hewɔ lɛ mumɔi kpawo ni ji mɛi fɔji fe klɛŋklɛŋ nɔ lɛ babote emli. Yesu kɛɛ: “Nakai nɔŋŋ aaafee yinɔ fɔŋ nɛɛ hu.” Atsuu Israel maŋ lɛ he ni amɛjie okadii ni tsɔɔ tsakemɔ kpo—tamɔ mumɔ ni he tseee ni shi yɛ be ko mli lɛ. Shi Nyɔŋmɔ gbalɔi lɛ ni maŋ lɛ kwa amɛ, ni eyagbe naa yɛ Yesu diɛŋtsɛ ni amɛte shi amɛwo lɛ lɛ mli lɛ jieɔ lɛ kpo faŋŋ akɛ eyiwalɛ shihilɛ lɛ etee hiɛ fe shishijee lɛ.

Beni Yesu wieɔ lɛ, enyɛ kɛ enyɛmimɛi hii lɛ bashɛ jɛmɛ ni amɛyadamɔ mɛi babaoo lɛ asɛɛ gbɛ. No hewɔ lɛ mɔ ko bakɛɛ lɛ akɛ: “Naa, onyɛ kɛ onyɛmimɛi lɛ damɔ agbo lɛ naa miitao amɛkɛ bo awie.”

Yesu bi akɛ: “Namɔ ji minyɛ, ni namɛi ji minyɛmimɛi?” Ni ekpa enine mli etsɔɔ ekaselɔi lɛ ni ekɛɛ: “Naa, minyɛ kɛ minyɛmimɛi nɛ. Ejaakɛ mɔ fɛɛ mɔ ni aaafee mi-Tsɛ ni yɔɔ ŋwɛi lɛ suɔmɔnaa nii lɛ, lɛ nɔŋŋ ji minyɛminuu kɛ minyɛmiyoo kɛ minyɛ.” Yɛ nɛkɛ gbɛ nɔ lɛ, Yesu miitsɔɔ akɛ bɔ fɛɛ bɔ ni wekukpaa ni ka ekɛ ewekumɛi ateŋ lɛ mli wa ha lɛ, wekukpaa ni ka ekɛ ekaselɔi lɛ ateŋ lɛ mli wa aahu po fe nakai. Mateo 12:33-50; Marko 3:31-35; Luka 8:19-21.

▪ Mɛɛ gbɛ nɔ Farisifoi lɛ nyɛɛɛ afee “tso” lɛ kɛ “yibii” lɛ fɛɛ ekpakpa yɛ?

▪ Mɛni ji “Yona okadi lɛ,” ni mɛɛ gbɛ nɔ akwa no hu yɛ yɛ sɛɛ mli?

▪ Mɛɛ gbɛ nɔ klɛŋklɛŋ afii oha lɛ mli Israel maŋ lɛ tamɔ nuu ni afa mumɔ ni he tseee lɛ kɛjɛ emli lɛ yɛ?

▪ Mɛɛ gbɛ nɔ Yesu ma wekukpaa ni bɛŋkɛ kpaakpa ni ka ekɛ ekaselɔi lɛ ateŋ lɛ nɔ mi yɛ?