Yitso 85

Nɔ ni Elaaje lɛ Taomɔ

YESU miibɔ mɔdɛŋ ni etao mɛi ni kɛ heshibaa baasɔmɔ Nyɔŋmɔ. No hewɔ lɛ etao gbɔmɛi ni ekɛ mɔ fɛɛ mɔ wie Maŋtsɛyeli lɛ he, kɛ eshafeelɔi ni ale amɛ lɛ po. Agbɛnɛ gbɔmɛi nɛɛ tsi amɛbɛŋkɛ lɛ ni amɛbo lɛ toi.

Ni Farisifoi lɛ kɛ woloŋmalɔi lɛ na enɛ lɛ, amɛwie amɛshi Yesu akɛ ekɛ mɛi ni amɛbuɔ akɛ amɛsaaa lɛ miibɔ. Amɛwie huhuuhu akɛ: “Mɔ nɛ ŋɔɔ eshafeelɔi ni ekɛ amɛ yeɔ nii.” Kwɛ bɔ ni amɛbuɔ amɛhe waa fe nine! Farisifoi kɛ woloŋmalɔi lɛ buɔ gbɔmɛi foji lɛ tamɔ amɛnaji ahe mulu. Yɛ anɔkwale mli lɛ, amɛkɛ Hebri wiemɔ ‛am ha·’aʹrets, “shikpɔŋ [shikpɔŋ lɛ] nɔ bii” tsuɔ nii, ni amɛkɛtsɔɔ bulɛ ni amɛbɛ kɛha gbɔmɛi ni tamɔ nɛkɛ.

Shi yɛ gbɛ kroko nɔ lɛ, Yesu kɛ mɛi fɛɛ yeɔ kɛ bulɛ, mlihilɛ kɛ mlijɔlɛ. Enɛ hewɔ lɛ, nɛkɛ mɛi ni abuuu amɛ nɛɛ ateŋ mɛi babaoo, kɛ mɛi ni ale amɛ po akɛ mɛi ni feɔ nibii fɔji lɛ miitao ni amɛbo lɛ toi. Shi Farisifoi lɛ awiemɔi ni amɛkɛshi Yesu akɛ ebɔɔ mɔdɛŋ ni eye ebua mɛi ni amɛbuɔ amɛ akɛ mɛi ni esaaa lɛ hu?

Yesu tsɔ abɛbua ko ni ekɛtsu nii lɛ nɔ eha amɛ shitee-kɛ-woo lɛ hetoo. Ewie yɛ bɔ ni Farisifoi lɛ diɛŋtsɛ susuɔ nii ahe, tamɔ nɔ ni jalɔi ji amɛ ni amɛyɛ shweshweeshwe yɛ Nyɔŋmɔ gbɛfaŋ, yɛ be mli ni ‛am ha·’aʹrets ni abuuu amɛ lɛ egba afa ni amɛyɔɔ laajemɔ shihilɛ mli lɛ naa. Bo toi yɛ be mli ni ebiɔ amɛ sane lɛ:

“Nyɛteŋ namɔ ni kɛji eyɛ tooi oha ni amɛteŋ ekome laaje lɛ, eshiŋ nyɔŋmai nɛɛhu kɛ nɛɛhu lɛ yɛ ŋa lɛ nɔ, ni eyatao nɔ ni elaaje lɛ kɛyashi beyinɔ ni eeena lɛ? Ni kɛ ena lɛ lɛ, ewoɔ lɛ etswaa ekɔŋ, ni enaa miishɛɛ; ni kɛ eba shia lɛ, etsɛɔ eshieŋtsɛmɛi kɛ ekuuŋbii kɛkpeɔ, ni ekɛɔ amɛ akɛ: ‘Nyɛkɛ mi anaa miishɛɛ, ejaakɛ mina mitoo ni laaje lɛ.’ ”

Agbɛnɛ Yesu wie bɔ ni sane nɛɛ kɔɔ amɛhe, ni etsɔɔ mli akɛ: “Miikɛɛ nyɛ akɛ nakai nɔŋŋ miishɛɛ aaaba ŋwɛi yɛ eshafeelɔ kome ni tsakeɔ etsui lɛ hewɔ fe jalɔi nyɔŋmai nɛɛhu kɛ nɛɛhu ni tsuitsakemɔ ehiaaa amɛ lɛ.”

Farisifoi lɛ buɔ amɛhe jalɔi ni no hewɔ lɛ ehe ehiaaa ni amɛna tsuitsakemɔ. Beni amɛteŋ mɛi komɛi wie amɛshi Yesu yɛ afii enyɔ ni etsɔ hiɛ lɛ mli akɛ ekɛ toohelɔi kɛ eshafeelɔi yeɔ nii lɛ, ekɛɛ amɛ akɛ: “Ejaakɛ mibaaa jalɔi atsɛmɔ, shi eshafeelɔi moŋ ni amɛtsake amɛtsuii.” Farisifoi ni buɔ amɛ diɛŋtsɛ amɛhe jalɔi, ni no hewɔ lɛ amɛnaaa akɛ tsuitsakemɔ he miihia amɛ lɛ, kɛ miishɛɛ ko baaa ŋwɛi. Shi eshafeelɔi ni tsakeɔ amɛtsuii yɛ anɔkwayeli mli lɛ feɔ nakai.

Bɔni afee ni ekɛma oti lɛ nɔ mi eha amɛ ekoŋŋ akɛ eshafeelɔ ni elaaje lɛ sɛɛkuu ekoŋŋ kɛ miishɛɛ baa lɛ, Yesu gba amɛ abɛbua kroko. Ekɛɛ: “Mɛɛ yoo yɔɔ jwiɛtɛi kukuji nyɔŋma, ni kɛji kuku kome laaje lɛ, ni esuŋ la ni ebɛɛ shia lɛ ni etao fitsofitso kɛyashi beyinɔ ni eeena? Ni kɛ ena lɛ, etsɛɔ eshieŋtsɛmɛi kɛ ekuuŋbii kɛkpeɔ ni ekɛɔ akɛ: Nyɛkɛ mi anaa miishɛɛ, ejaakɛ mina mijwiɛtɛi kuku ni laaje lɛ.”

Kɛkɛ ni agbɛnɛ Yesu tsɔɔ amɛ nɔ ko ni tamɔ nakai nɔŋŋ. Etee nɔ ekɛɛ amɛ akɛ: “Nakai nɔŋŋ, miikɛɛ nyɛ akɛ, miishɛɛ baa yɛ Nyɔŋmɔ bɔfoi lɛ ahiɛ yɛ eshafeelɔ kome ni tsakeɔ etsui lɛ hewɔ.”

Kwɛ bɔ ni suɔmɔ mli ni Nyɔŋmɔ bɔfoi lɛ jɛɔ amɛsusuɔ eshafeelɔi ni elaaje ni kpaleɔ kɛbaa ekoŋŋ lɛ ahe amɛhaa lɛ sa kadimɔ ha! Ni nakai enɛ ji, titri lɛ akɛni nɛkɛ mɛi ni tsutsu ko lɛ amɛbaa shi, ni amɛji ‛am ha·’aʹrets ni abuuu amɛ nɛɛ banaa hegbɛ akɛ amɛtsɔmɔ Nyɔŋmɔ ŋwɛi Maŋtsɛyeli lɛ mlibii lɛ. Yɛ enɛ hewɔ lɛ, amɛnaa gbɛhe ko ni nɔ kwɔ fe ŋwɛibɔfoi lɛ diɛŋtsɛ anɔ yɛ ŋwɛi! Shi yɛ nɔ najiaŋ ni amɛaaye enɛ he awuŋa loo ni amɛmli aaafu yɛ he lɛ, ŋwɛibɔfoi nɛɛ kɛ heshibaa kpɛlɛɔ nɔ akɛ nɛkɛ gbɔmɛi eshafeelɔi nɛɛ kɛ shihilɛi ni baasaa amɛ koni amɛsɔmɔ akɛ ŋwɛi maŋtsɛmɛi kɛ osɔfoi ni nuɔ nii ahe ni amɛyɔɔ mɔbɔnalɛ hu kɛha mɛi krokomɛi lɛ ekpe yɛ amɛshihilɛi amli ni amɛye nɔ kunim. Luka 15:1-10; Mateo 9:13; 1 Korintobii 6:2, 3; Kpojiemɔ 20:6.

▪ Mɛni hewɔ ni Yesu kɛ mɛi ni ale amɛ akɛ eshafeelɔi lɛ bɔɔ lɛ, ni mɛɛ wiemɔi enɛ ha Farisifoi lɛ wie amɛshi lɛ?

▪ Te Farisifoi lɛ buɔ gbɔmɛi foji lɛ amɛhaa tɛŋŋ?

▪ Mɛɛ abɛbuai Yesu kɛtsu nii, ni mɛni wɔbaanyɛ wɔkase kɛjɛ mli?

▪ Mɛni hewɔ ni miishɛɛ ni ŋwɛibɔfoi lɛ naa lɛ sa kadimɔ waa lɛ?