Saji Otii Titrii lɛ Anɔmimaa

NIKANELƆ ni he esa lɛ kwɛɔ nii kɛtekeɔ sane komekomei lɛ, ni ekwɛɔ nii po kɛtekeɔ kuku mli ní ejeɔ kpo yɛ lɛ. Kɛ́ eekane nii lɛ, ehaa saji otii titrii ni yɔɔ nikasemɔ muu lɛ fɛɛ ní ekɛhaa lɛ mli lɛ hiɔ ejwɛŋmɔ mli. Enɛ náa bɔ ni emaa nii anɔ mi ehaa lɛ nɔ hewalɛ.

Kɛ́ anyiɛɛɛ nifeemɔ nɛɛ sɛɛ lɛ, no lɛ otii ni sa kadimɔ ehiŋ wiemɔ ní ahaa lɛ mli. Nɔ ko nɔ ko ejeŋ kpo faŋŋ. Kɛ́ agbe wiemɔ ní ahaa lɛ naa lɛ, ebaawa akɛ aaakai nɔ ko ni sa kadimɔ.

Bei pii lɛ, jwɛŋmɔ kpakpa ní agbalaa kɛbaa saji otii titrii ni amaa nɔ mi lɛ anɔ lɛ baanyɛ aha Biblia mli sane ko ni akaneɔ lɛ aya hiɛ. Nakai nibii anɔmimaa lɛ baanyɛ ekɛ nɔ kroko ni sa kadimɔ aha yɛ kukuji ni akaneɔ yɛ shia Biblia mli nikasemɔ loo asafoŋ kpeei ashishi lɛ mli. Ni ehe miihia waa hu yɛ be mli ni ohaa wiemɔ kɛjɛɔ wiemɔ ni aŋmala emli saji fɛɛ, taakɛ bei komɛi lɛ afeɔ yɛ wɔkpeei wuji ashishi lɛ.

Bɔ ni Afeɔ Lɛ. Abaanyɛ aha bo nifeemɔ koni okane Biblia lɛ fã ko yɛ skul lɛ mli. Mɛni esa akɛ oma nɔ mi? Kɛ́ sane oti ko loo nifeemɔ ko ni he hiaa, ni sane ni obaakane lɛ kɔɔ he lɛ, no lɛ ebaahi akɛ oooha eje kpo faŋŋ.

Kɛ́ nɔ ni obaakane lɛ ji lalafoo loo wiemɔ folo ni jeee lalafoo jio, abɛbuai loo sane ni afo atã jio lɛ, otoibolɔi lɛ baaná he sɛɛ kɛji okane lɛ jogbaŋŋ. (2 Tim. 3:16, 17) Bɔni afee ni ofee enɛ lɛ, esa akɛ osusu saji ni obaakane lɛ kɛ otoibolɔi lɛ ahe.

Kɛ́ obaakane nii waa kɛjɛ wolo ko mli yɛ Biblia mli nikasemɔ loo asafoŋ kpee ko shishi lɛ, mɛni ji saji otii titrii ni ehe hiaa ni oma nɔ mi lɛ? Susumɔ nikasemɔ lɛ mli sanebimɔi ni akala lɛ ahetooi lɛ ahe akɛ saji otii titrii. Agbɛnɛ hu maa susumɔi ní kɔɔ sane yitsei bibii ni aŋmala kɛ niŋmaa wuji ní sane lɛ jeɔ kpo yɛ eshishi lɛ ahe lɛ nɔ mi.

Ajieee yi akɛ oha efee osu akɛ obaaŋmala wiemɔ ni obaaha yɛ asafoŋ kpee mli lɛ mli wiemɔi fɛɛ oshwie shi. Shi kɛlɛ, yɛ bei komɛi amli lɛ, akɛ wiemɔ ni aŋmala emli saji fɛɛ lɛ haa yɛ kpeei wuji komɛi ashishi bɔni afee ni akɛ susumɔ kome too lɛ nɔŋŋ aha yɛ kpeei lɛ fɛɛ mli. Bɔni afee ni wielɔ lɛ ama saji otii titrii ni yɔɔ nakai wiemɔ ni aŋmala emli saji fɛɛ lɛ nɔ mi lɛ, esa akɛ klɛŋklɛŋ lɛ epɛi sane lɛ mli jogbaŋŋ. Mɛni ji saji otii titrii lɛ? Esa akɛ enyɛ eyɔse enɛɛmɛi. Saji otii titrii lɛ jeee susumɔi ni enuɔ he akɛ amɛyɔɔ miishɛɛ lɛ kɛkɛ. Amɛji susumɔi titrii ni adamɔ nɔ ato sane lɛ he gbɛjianɔ lɛ. Bei komɛi lɛ, wiemɔi kukuji ni yɔɔ saji otii titrii lɛ amli yɛ wiemɔ ni aŋmala emli saji fɛɛ lɛ mli lɛ kɛ wiemɔ ni afo ata loo susumɔ ko haa. Bei babaoo lɛ, akɛ wiemɔ ni mli wa lɛ haa, yɛ odaseyeli ni akɛfiɔ sɛɛ lɛ sɛɛ. Beni ayɔse saji otii titrii lɛ sɛɛ lɛ, esa akɛ wielɔ lɛ akadi amɛ yɛ ewiemɔ ni aŋmala emli saji fɛɛ lɛ nɔ. Bei pii lɛ, fioo ko yɔɔ, ekolɛ nɔ ni faaa fe ejwɛ loo enumɔ. No sɛɛ lɛ, ehe miihia ni ekase ekanemɔ yɛ gbɛ ni toibolɔi lɛ baanyɛ ayɔse amɛ nɔ. Enɛɛmɛi ji otii titrii ni yɔɔ wiemɔ lɛ mli lɛ. Kɛ́ akɛ wiemɔ lɛ ha kɛ nɔmimaa ni sa lɛ, no lɛ nɛkɛ saji otii titrii nɛɛ baafee nɔ ni abaanyɛ akai. Esa akɛ enɛ afee oti ni ma wielɔ lɛ hiɛ.

Gbɛ̀i srɔtoi yɛ ni wielɔ lɛ baanyɛ ekɛ nɔmimaa ni he hiaa lɛ aha koni eye ebua toibolɔi lɛ ni amɛyɔse saji otii titrii lɛ. Ebaanyɛ ekɛ ekãa ni mli wa atsu nii, gbee nɔ womɔ loo eshibaa, bɔ ni anuɔ he ahaa, loo ninefɔɔ ni akɛmaa sane nɔ mi ni sa, kɛji wɔɔtsĩ fioo ko tã.