Sane ni Akɛha lɛ kɛ Nitsumɔ

BIBLIA lɛ kɛ Kristofoi asafo lɛ toɔ adesa gbɔmɔtso lɛ he. Henii lɛ eko fɛɛ eko he miihia, shi “fɛɛ tsuuu nitsumɔ kome.” Yɛ enɛ kɛ gbeekpãmɔ naa lɛ, esa akɛ wɔtsu hegbɛ fɛɛ hegbɛ ni atuu awo wɔdɛŋ lɛ he nii. Enɛ tsɔɔ akɛ esa akɛ wɔnu nifeemɔ fɛɛ nifeemɔ ni akɛha wɔ lɛ shishi ni wɔwie he jogbaŋŋ moŋ fe ni wɔɔba hiamɔ ni yɔɔ saji lɛ ekomɛi ahe lɛ shi akɛni wɔsusuɔ akɛ saji krokomɛi baafee miishɛɛ babaoo fe ekrokomɛi lɛ hewɔ. (Rom. 12:4-8) Gbɛnaa nii kã tsulɔ anɔkwafo kɛ nilelɔ kuu lɛ nɔ akɛ ekɛ mumɔŋ niyenii aha “yɛ be ni sa nɔ.” (Mat. 24:45) Kɛ́ wɔkɛ wɔ diɛŋtsɛ wɔnyɛmɔi tsu nii ni wɔkɛto wiemɔi ahe gbɛjianɔ taakɛ gbɛtsɔɔmɔi ni wɔnine eshɛ lɛ tsɔɔ lɛ, no lɛ wɔtsɔɔ hiɛsɔɔ kɛha nakai gbɛjianɔtoo lɛ. Enɛ yeɔ ebuaa ni ehaa asafo muu lɛ fɛɛ nitsumɔ yaa nɔ jogbaŋŋ.

Nɔ ni Esa akɛ Okɛfata He. Kɛ́ akɛ sane ko ha bo yɛ skul lɛ mli lɛ, kwɛmɔ ni owie nakai sane lɛ he, shi jeee nɔ kroko. Yɛ shihilɛi babaoo mli lɛ, abaatsɔɔ hei pɔtɛɛ komɛi ni oyakwɛ. Kɛ́ ahaaa bo sane ko ni aŋma ni okɛtsu nii akɛ nɔdaamɔ nɔ kɛha owiemɔ lɛ, no lɛ obaanyɛ obua saji anaa kɛjɛ nɔ ni bo diɛŋtsɛ ohala lɛ mli. Shi kɛlɛ, kɛ́ oosaa ohe yɛ owiemɔ lɛ mli lɛ, kwɛmɔ ni wiemɔ muu lɛ fɛɛ ni okɛhaa lɛ akɔ sane ni akɛha lɛ he. Beni osusuɔ nɔ ni okɛbaafata he lɛ he lɛ, ehe baahia hu ni osusu otoibolɔi lɛ ahe.

Kasemɔ sane ni atsɛ yisɛɛ lɛ jogbaŋŋ, ni osusu ŋmalɛi ni yɔɔ mli lɛ ahe. Agbɛnɛ susumɔ bɔ ni ooofee ni okɛtsu nii jogbaŋŋ koni ehe aba sɛɛnamɔ kɛha toibolɔi lɛ he. Halamɔ saji otii enyɔ loo kɛ́ eeehi lɛ etɛ kɛjɛ saji ni akala lɛ mli koni okɛtsu nii akɛ saji otii titrii yɛ owiemɔ lɛ mli. Halamɔ ŋmalɛi ni oto akɛ obaakane ni owie he lɛ kɛjɛ sane ni akɛha lɛ mli nakai nɔŋŋ.

Nibii enyiɛ esa akɛ otsu he nii? Nɔ ni obaanyɛ otsu he nii jogbaŋŋ kɛmɔ shi lɛ pɛ. Kaaku ohiɛ oshwie nitsɔɔmɔ kpakpa nɔ bɔni afee ni okɛ saji babaoo afata he. Kɛ́ saji lɛ ekomɛi kɔɔɔ oti ni yɔɔ owiemɔ lɛ mli lɛ he lɛ, susumɔ hei ni baaye abua bo koni oshɛ nakai oti lɛ he lɛ ahe. Halamɔ saji ni adafitswaa babaoo yɔɔ mli lɛ kɛjɛ sane ni akɛha lɛ mli ni okɛtsu nii ni ehe aba sɛɛnamɔ kɛha otoibolɔi lɛ. Oti ni yɔɔ wiemɔ he ŋaawoo nɛɛ mli lɛ jeee ni ona efalɛ ni obaanyɛ okɛtsu nii, shi moŋ ní okɛ sane ni akɛha lɛ atsu nii akɛ nɔ ni owiemɔ lɛ baadamɔ nɔ.

Esaaa akɛ owiemɔ lɛ feɔ sane ni akɛha lɛ he wiemɔ kuku ko kɛkɛ. Esa akɛ oto gbɛjianɔ akɛ obaagbala saji otii komɛi amli, obaalɛɛ mli, okɛ nɔkwɛmɔnɔ baaha, ni kɛ́ eeehi lɛ okɛ ekɛ nitsumɔ he nɔkwɛmɔnɔ baaha. Esa akɛ akɛ susumɔi krokomɛi atsu nii ni akɛwie saji otii ni yɔɔ sane ni akɛha lɛ mli lɛ he moŋ fe ni akɛaatsake sane ni akɛha lɛ.

Yɛ be ni sa mli lɛ, abaafɔ nine atsɛ nyɛmimɛi ni yɔɔ hesaai ni he hiaa akɛ tsɔɔlɔi lɛ koni amɛkɛ tsɔsemɔ abaha yɛ Sɔɔmɔ Kpee lɛ mli. Yɛ nɔ najiaŋ ni amɛkɛ nɔ kroko aaato najiaŋ lɛ, amɛna bɔ ni ehe ehia akɛ amɛkɛ sane ni akɛha lɛ atsu nii jogbaŋŋ kɛmɔ shi. Nakai nɔŋŋ, akɛ wiemɔ he wolo haa nyɛmimɛi ni haa maŋshiɛmɔi lɛ koni amɛnyiɛ sɛɛ. Enɛɛmɛi ŋmɛɔ tswaa-feemɔi komɛi agbɛ, shi amɛhaa saji otii ni abaawie he, naataamɔi ni akɛfiɔ sɛɛ kɛ nitsumɔ, kɛ ŋmalɛi ni adamɔɔ nɔ akɛ wiemɔ lɛ haa lɛ feɔ faŋŋ. Kasemɔ ni oookase bɔ ni akɛ sane ni akɛha lɛ tsuɔ nii akɛ nɔ ni abaadamɔ nɔ lɛ ji hesaamɔ kɛha wiemɔ mli hegbɛi krokomɛi ni he hiaa waa.

Nɛkɛ tsɔsemɔ nɛɛ baanyɛ aye abua bo hu koni ofee shia Biblia mli nikasemɔi ni yaa hiɛ. Obaale bɔ ni agbalaa jwɛŋmɔ kɛbaa sane ni akaseɔ lɛ nɔ moŋ fe ni oootsake kɛjɛ sane lɛ he kɛtsɔ nibii krokomɛi ni ekolɛ eyɔɔ miishɛɛ shi ehe ehiaaa kɛha sane lɛ shishinumɔ ní oooma nɔ mi lɛ nɔ. Ni kɛlɛ, kɛ́ onu nikasemɔ nɛɛ mli oti lɛ shishi jogbaŋŋ lɛ, ofeŋ kpɛŋŋ aahu tsɔ akɛ onyɛɛɛ okɛ mligbalamɔ kroko ni nikaselɔ lɛ baabi lɛ aha.