Ani Gbohii Lɛ Baanyɛ Ahi Shi Ekoŋŋ Lɛɛlɛŋ?

NƆ NI BIBLIA LƐ KƐƆ

“Abaatee jalɔi kɛ mɛi ni ejaaa fɛɛ shi.”​—Bɔfoi 24:15, Jeŋ Hee Shishitsɔɔmɔ.

BƆ NI OBAANYƐ ONÁ HE SƐƐ

Miishɛjemɔ kɛ́ osuɔlɔ ko gbo.​—2 Korintobii 1:3, 4.

Heyeli kɛmiijɛ gbeyei ni asheɔ akɛ abaagbo lɛ he.​—Hebribii 2:15.

Hiɛnɔkamɔ ni yɔɔ diɛŋtsɛ akɛ okɛ osuɔlɔi ni egboi lɛ baahi shi ekoŋŋ.​—Yohane 5:28, 29.

ANI WƆBAANYƐ WƆHE NƆ NI BIBLIA LƐ KƐƆ LƐ WƆYE LƐƐLƐŊ?

Hɛɛ, kɛ́ hooo lɛ yɛ yiŋtoi etɛ ahewɔ:

• Nyɔŋmɔ ji mɔ ni bɔ wala. Biblia lɛ kɛɔ akɛ Yehowa Nyɔŋmɔ ŋɔɔ “wala jɛɔ.” (Lala 36:9; Bɔfoi 17:24, 25) Eyɛ faŋŋ akɛ mɔ ni hã bɔɔ nii fɛɛ wala lɛ yɛ nyɛmɔ ni ekɛbaahã mɔ ko ni egbo lɛ aba wala mli ekoŋŋ.

• Nyɔŋmɔ etee adesai shi yɛ bei ni eho lɛ amli. Biblia lɛ wieɔ mɛi kpaanyɔ​—gbekɛbii, onukpai, hii, kɛ yei​—ni atee amɛ shi kɛba wala mli yɛ shikpɔŋ nɔ lɛ ahe. Amɛteŋ mɛi komɛi gboi etsɛɛɛ ni atee amɛ shi, shi mɔ kome ye gbii ejwɛ yɛ gbonyobu mli dani atee lɛ shi!​—Yohane 11:39-44.

• Nyɔŋmɔ miishwe ni efee ekoŋŋ. Yehowa nyɛɔ gbele; ebuɔ lɛ akɛ eji henyɛlɔ. (1 Korintobii 15:26) ‘Eeshwe’ ni eye nakai henyɛlɔ lɛ nɔ, ni ebaatsɔ gbohiiashitee lɛ nɔ ejie gbele yɛ shihilɛ mli. Eeshwe ni ekɛ mɛi ni yɔɔ ekaimɔ mli lɛ aba wala mli, ní ena amɛ akɛ amɛmiihi shi yɛ shikpɔŋ lɛ nɔ ekoŋŋ.—Hiob 14:14, 15.