Mɛni Ji Nyɔŋmɔ Maŋtsɛyeli Lɛ?

NƆ NI BIBLIA LƐ KƐƆ

“Nyɔŋmɔ ni yɔɔ ŋwɛi lɛ baato maŋtsɛyeli ko ni anyɛŋ hiɛ akpãtã lɛ shishi.”​—Daniel 2:44, Jeŋ Hee Shishitsɔɔmɔ.

“Ahã wɔ binuu; ni nɔyeli baakã ekɔɔŋ nɔ.”​—Yesaia 9:6.

BƆ NI OBAANYƐ ONÁ HE SƐƐ

• Nɔyeli ni yeɔ jalɛsane ni obaanyɛ oná he sɛɛ.​—Yesaia 48:17, 18.

• Yɛ jeŋ hee ni baaba lɛ mli lɛ, obaaná gbɔmɔtsoŋ hewalɛ kpakpa kɛ miishɛɛ.​—Kpojiemɔ 21:3, 4.

ANI WƆBAANYƐ WƆHE NƆ NI BIBLIA LƐ KƐƆ LƐ WƆYE LƐƐLƐŊ?

Hɛɛ, kɛ́ hooo lɛ yɛ yiŋtoi enyɔ ahewɔ:

• Yesu tsɔɔ nɔ ni Nyɔŋmɔ Maŋtsɛyeli lɛ baatsu. Yesu tsɔɔ esɛɛnyiɛlɔi lɛ ni amɛsɔle koni Nyɔŋmɔ Maŋtsɛyeli lɛ aba ni afee Nyɔŋmɔ suɔmɔnaa nii yɛ shikpɔŋ lɛ nɔ. (Mateo 6:9, 10) Yesu fee bɔ ni abaafee ahã sɔlemɔ nɛɛ hetoo lɛ he nɔkwɛmɔnɔ.

  Be ni Yesu yɔɔ shikpɔŋ lɛ nɔ lɛ, elɛ mɛi ni hɔmɔ yeɔ amɛ lɛ, etsa helatsɛmɛi, ni etee gbohii ashi! (Mateo 15:29-38; Yohane 11:38-44) Yesu, ni ji mɔ ni baaye Nyɔŋmɔ Maŋtsɛyeli lɛ nɔ wɔsɛɛ lɛ, fee nɔ ni nakai Maŋtsɛyeli lɛ baafee ehã eshishi bii lɛ he nɔkwɛmɔnɔ fioo ko.—Kpojiemɔ 11:15.

• Nibii ni yaa nɔ yɛ je lɛ mli lɛ tsɔɔ akɛ etsɛŋ ni Nyɔŋmɔ Maŋtsɛyeli lɛ baaba. Yesu gba akɛ kɛ́ eshwɛ fioo ni Maŋtsɛyeli lɛ kɛ toiŋjɔlɛ baaba shikpɔŋ lɛ nɔ lɛ, tai, hɔmɔ, kɛ shikpɔŋhosomɔi baaba je lɛŋ.​—Mateo 24:3, 7.

  Ŋmɛnɛ lɛ, wɔmiina nibii nɛɛ fɛɛ. No hewɔ lɛ, wɔbaanyɛ wɔná nɔmimaa akɛ etsɛŋ ni Nyɔŋmɔ Maŋtsɛyeli lɛ kɛ naagbai nɛɛ fɛɛ baaba naagbee.