KƐ́ OYAATSA NƆ
NIKASEMƆ 7
Kaahã Onijiaŋ Je Wui
Shishitoo mla: “Amɛtee nɔ amɛtsɔɔ nii ni amɛjaje . . . sane kpakpa lɛ . . . ni amɛkpaaa.”—Bɔf. 5:42.
Nɔ Ni Paulo Fee
1. Kwɛmɔ VIDIO lɛ, loo kanemɔ Bɔfoi 19:8-10. No sɛɛ lɛ, susumɔ sanebimɔi ni nyiɛ sɛɛ nɛɛ ahe:
Be ni ate shi awo Paulo lɛ, nɔ najiaŋ ni no baaje enijiaŋ wui lɛ, mɛni efee koni enyɛ eye ebua mɛi ni yɔɔ wiemɔ lɛ he miishɛɛ lɛ?
Shii enyiɛ Paulo tee mɛi ni yɔɔ wiemɔ lɛ he miishɛɛ lɛ aŋɔɔ eyatsɔɔ amɛ nii, ni afii enyiɛ efee nakai?
Mɛni Wɔkaseɔ Yɛ Nɔ Ni Paulo Fee Lɛ Mli?
2. Esa akɛ wɔbɔ mɔdɛŋ wɔto gbɛjianɔ ni wɔya mɛi ni ná wiemɔ lɛ he miishɛɛ lɛ aŋɔɔ ni wɔkɛ amɛ aje Biblia mli nikasemɔ shishi.
Kasemɔ Paulo
3. Too gbɛjianɔ ni oya mɔ lɛ ŋɔɔ be ni baahi ehã lɛ. Bi ohe akɛ: ‘Mɛɛ be ji be ni hi fe fɛɛ ni manyɛ mana lɛ, ni nɛgbɛ mana lɛ yɛ?’ Kɛ́ ona be lɛ, ni ehiii hãaa bo po lɛ, miamɔ ohiɛ ni oya.
4. Bi mɔ lɛ be ni ebaasumɔ ni oba ekoŋŋ. Be fɛɛ be ni okɛ mɔ lɛ baagba sane lɛ, bi lɛ be pɔtɛɛ ni ebaasumɔ ni oba ekoŋŋ. Kɛ́ etsɔɔ bo lɛ, bɔɔ mɔdɛŋ ni oye nakai be lɛ nɔ.
5. Kaamu sane naa oya. Kɛ́ ekolɛ bei pii lɛ, oyanaaa mɔ lɛ yɛ shĩa, loo be fɛɛ be ni obaaya lɛ eefee nii lɛ, kaamu sane naa oya akɛ ebɛ wiemɔ lɛ he miishɛɛ. (1 Kor. 13:4, 7) Yaa nɔ oya mɔ lɛ ŋɔɔ, shi kwɛmɔ bɔ ni obaafee lɛ ohã koni okafite obe hu.—1 Kor. 9:26.