Mɛɛ Be Esa akɛ Wɔku Wɔsɛɛ Kɛyasara Mɛi ni Ná Wiemɔ lɛ He Miishɛɛ Lɛ?
1. Mɛni kaselɔfeemɔ biɔ ni afee?
1 Nɔ ni kaselɔfeemɔ biɔ ni afee ji ni aku sɛɛ ayasara mɔ fɛɛ mɔ ni ná he miishɛɛ akɛ ebaakase Yehowa Maŋtsɛyeli lɛ he nii lɛ. (Mat. 28:19, 20) Bei pii lɛ, be ni hi fe fɛɛ kɛha sɛɛkuu-kɛsaramɔ lɛ damɔ bɔ ni wɔbe he gbɛjianɔtoo ji, kɛ bɔ ni mɔ ni ná wiemɔ lɛ he miishɛɛ lɛ hu nɔ̃ ji lɛ nɔ. Mɛni hewɔ kɛ́ wɔtee mɛi lɛ aŋɔɔ klɛŋklɛŋ kwraa lɛ, esa akɛ wɔku wɔsɛɛ wɔyasara amɛ yɛ be kukuoo mli lɛ?
2, 3. Mɛni hewɔ esa akɛ wɔbɔ mɔdɛŋ wɔku wɔsɛɛ yɛ be kukuoo mli lɛ?
2 Mɛni Hewɔ Esa akɛ Oku Osɛɛ yɛ Be Kukuoo Mli Lɛ? Eshwɛ fioo ni “maŋtsɛyeli lɛ he sanekpakpa” ni ashiɛɔ lɛ baaba naagbee, ni nibii agbɛjianɔtoo nɛɛ naagbee ebɛŋkɛ. (Mat. 24:14; 1 Pet. 4:7) No hewɔ lɛ, akɛni “walaheremɔ gbi” yɛ lolo kɛha mɛi ni yɔɔ wiemɔ lɛ he miishɛɛ hewɔ lɛ, esa akɛ wɔbo famɔ akɛ ‘kã he oshiɛ wiemɔ lɛ’ toi; ni nɔ ni fata enɛ he ji wɔsɛɛ ni wɔɔku yɛ be kukuoo mli kɛyasara mɛi ni ná wiemɔ lɛ he miishɛɛ lɛ.—2 Kor. 6:1, 2; 2 Tim. 4:2.
3 Satan miibɔ mɔdɛŋ ni efite Maŋtsɛyeli wui fɛɛ ni wɔbaadu yɛ mɔ ko ni yɔɔ wiemɔ lɛ he miishɛɛ lɛ tsui mli lɛ. (Mar. 4:14, 15) Bei pii lɛ, wekumɛi, nanemɛi nitsulɔi kɛ mɛi krokomɛi yeɔ mɛi ni yɔɔ wiemɔ lɛ he miishɛɛ lɛ ahe fɛo. Kɛ́ wɔku wɔsɛɛ yɛ be kukuoo mli lɛ, wɔnyɛɔ wɔyatsáa sane ni wɔgba kɛtsɔ hiɛ lɛ nɔ, ni mɛi krokomɛi nyɛɛɛ agbe miishɛɛ fioo ni amɛná lɛ.
4. Kɛ́ wɔkɛ mɔ ko gba sane klɛŋklɛŋ kwraa lɛ, mɛni wɔbaanyɛ wɔfee koni wɔnyɛ wɔku wɔsɛɛ wɔyasara lɛ ekoŋŋ?
4 Too Gbɛjianɔ Kɛha Sɛɛkuu: Ehi jogbaŋŋ akɛ yɛ gbi klɛŋklɛŋ kwraa ni okɛ mɔ lɛ baagba sane lɛ nɔ lɛ, okɛ lɛ baato gbɛjianɔ kɛha saramɔ ekoŋŋ dani oshi. Bi sane ko ni kɛ́ oku osɛɛ lɛ obaaha hetoo. Ehe miihia ni oŋmala nɔ ni nyɛgba he sane lɛ, kɛ be ni okɛbaaku osɛɛ lɛ ofɔ̃ shi. Kɛ́ obe baaŋmɛ bo gbɛ lɛ, obaanyɛ obi ni oku osɛɛ enɔ jetsɛremɔ nɔŋŋ loo yɛ be fioo ko sɛɛ. Kɛ́ otsi lɛ naagbee ji be ni okɛ mɔ lɛ gba sane klɛŋklɛŋ kwraa, ni etsuɔ nii yɛ otsi lɛ mli lɛ, ekolɛ ebaakpɛlɛ akɛ obasara lɛ otsi naagbee ni baanyiɛ sɛɛ lɛ. Kɛ́ oto gbɛjianɔ akɛ obaaku osɛɛ yɛ be ko mli lɛ, bɔɔ mɔdɛŋ ni oye nɔ.—Mat. 5:37.
5. Mɛɛ gbɛ nɔ wɔsɛɛ ni wɔɔku yɛ be kukuoo mli lɛ baaye abua wɔ koni wɔtsu Yesu fãmɔ akɛ wɔfee kaselɔi lɛ he nii?
5 Wɔyɛ yiŋtoi kpakpai ahewɔ ni esa akɛ wɔku wɔsɛɛ wɔyasara mɛi ni ná wiemɔ lɛ he miishɛɛ lɛ yɛ be kukuoo mli. No hewɔ lɛ, too gbɛjianɔ ni oku osɛɛ yɛ be kukuoo mli ejaakɛ “be lɛ faaa dɔŋŋ.” (1 Kor. 7:29) Kɛ́ wɔku wɔsɛɛ kɛyasara mɛi ni yɔɔ Maŋtsɛyeli shɛɛ sane lɛ he miishɛɛ lɛ yɛ be kukuoo mli lɛ, ekã shi faŋŋ akɛ wɔmɔdɛŋbɔi lɛ baawo yibii.