Nuŋtsɔ Lɛ Nanemaahei Asɛɛnyiɛmɔ
MƐNI okɛ owala feɔ? Mɛni krɛdɛɛ osumɔɔ ni okɛ owala afee? Kristofoi ni ejɔɔ amɛhe nɔ lɛ ateŋ mɛi babaoo yɛ nitsumɔi ni biɔ ni amɛkɛ ŋmɛlɛtswaai pii atsu nii ni amɛkɛkwɛ amɛdiɛŋtsɛ kɛ amɛwekui anɔ lɛ mli. Ekolɛ amɛyɛ sɔ̃i krokomɛi hu ni biɔ be pii kɛ amɛhe nitsumɔ. Yɛ enɛ hewɔ lɛ, amɛbaanu he akɛ be kɛ be lɛ, esani amɛkɛ be pii adi nibii krokomɛi asɛɛ ejaakɛ nomɛi baaha amɛmii ashɛ amɛhe yɛ wala mli ni amɛtsuii anyɔ amɛmli. Te amɛbaafee tɛɛŋ amɛŋmɛ nibii lɛ pɛpɛɛpɛ bɔni afee ni amɛshihilɛ lɛ asa Nyɔŋmɔ hiɛ?
Wɔteŋ mɛi babaoo le akɛ nii ni atsuɔ bɔni afee ni ana heloonaa hiamɔnii lɛ haa nitsulɔ lɛ naa miishɛɛ ni ewoɔ Nyɔŋmɔ hu hiɛnyam. Dani Nyɔŋmɔ Bi lɛ aaaba shikpɔŋ nɔ akɛ adesa lɛ, ekɛ e-Tsɛ tsu nii kɛfee bɔɔnii fɛɛ ni yɔɔ jeŋ muu lɛ fɛɛ mli lɛ. Awie ehe akɛ Ŋaalɔ.—Kol. 1:15, 16; Abɛi 8:30, 31.
Sɛɛ mli lɛ, ajie ewala kɛba shikpɔŋ lɛ nɔ. Beni eda efee oblanyo lɛ, etsu nii akɛ tsoŋaalɔ. Shi be bashɛ akɛ etsu nitsumɔ kroko yɛ e-Tsɛ sɔɔmɔ nitsumɔ lɛ mli. Nitsumɔ nɛɛ ji shiɛmɔ kɛ kaselɔ feemɔ.—Mar. 1:14, 15; Yoh. 18:37.
Beni Yesu bɔ̃i enitsumɔ hee lɛ tsumɔ lɛ, nitsumɔ nɛɛ bafee nɔ̃ klɛŋklɛŋ he ni ejwɛŋɔɔ yɛ ewala mli. Ená enitsumɔ hee lɛ he miishɛɛ. Etsɛlɛ akɛ “miŋmaa.” (Heb. 10:7; Yoh. 4:34)
Bɔni ehi shi eha lɛ tsɔɔ akɛ ekɛ nitsumɔ lɛ shwɛɛɛ kwraa. Yɛ anɔkwale mli lɛ, gbɛ ni Yesu nyiɛ nɔ lɛ tsɔɔ akɛ eheɔ eyeɔ akɛ e-Tsɛ lɛ baaya nɔ ahalɛ eheloonaa hiamɔnibii gbiiabɔ ni ekɛ nitsumɔ hee nɛɛ ewo klɛŋklɛŋ gbɛhe lɛ.
Nɔni Mɛikomɛi Feɔ
Yesu Kristo sɛɛnyiɛlɔi lɛ eyɔse sɔ̃ ni kã amɛnɔ akɛ amɛkwɛ amɛdiɛŋtsɛ, amɛŋamɛi kɛ amɛbii anɔ ni nakai be mli nɔŋŋ lɛ amɛná nɔko amɛja amɛha mɛi ni ehia amɛ lɛ. (1 Tim. 5:8; Efe. 4:28) Shi efeɔ mɛikomɛi akɛ eji be fioo kɛ mɔdɛŋbɔɔ fioo kɛkɛ amɛkɛtsuɔ nii kulɛ amɛmiisumɔ. Yɛ mɛi babaoo hu gbɛfaŋ lɛ, amɛná ni amɛyɛ be pii ni amɛkɛwo shiɛmɔ, nitsɔɔmɔ kɛ kaselɔ feemɔ nitsumɔ lɛ mli. Ani bo hu oshweɔ nakai? Mɛikomɛi enyɛ eto amɛnibii agbɛjianɔ bɔni afee ni amɛna be pii kɛha nɛkɛ nitsumɔ nɛɛ—bɔni afee ni nitsumɔ nɛɛ ana klɛŋklɛŋ gbɛhe yɛ amɛshihilɛ mli.
Yehowa Odasefonyo ko ni yɔɔ New York maŋwulu lɛ mli lɛ kɛ afii babaoo etsu nii yɛ maŋsɛɛ nihemɔ kɛ nihɔɔmɔ nitsumɔhe ko ni enyɔmɔwoo lɛ fá saŋŋ. Eŋa lɛ hu tsuɔ nii. Shi amɛmiisumɔ ni amɛkɛ be pii awo kaselɔ feemɔ nitsumɔ lɛ mli.
Eŋa lɛ nitsumɔtsɛ ye ŋkɔmɔ akɛ, enaaa mɔ kroko ni ebaanyɛ ekɛ ehe afɔ enɔ ni ewalɛ yɛ enitsumɔhe lɛ falefalefeemɔ mli. Nohewɔ lɛ Odasefonyo lɛ tee nuu lɛ ŋɔɔ ni ekɛlɛ to gbɛjianɔ akɛ ebaasaa nitsumɔhe lɛ ehalɛ yɛ jara ko ni afo lɛ naa. Ekpɛlɛ egbɛjianɔtoo lɛ nɔ. Awo nuu nɛɛ kɛ eŋa lɛ hewalɛ. Yɛ anɔkwale mli lɛ, amɛŋmɔ amɛyiŋkpɔ akɛ eji amɛbaana nakai gbɔmɔ lɛ henɔ kome aloo enyɔ kulɛ, ehe ehiaaa ni amɛhi amɛbe fɛɛ nitsumɔi lɛ mli.
Bianɛ lɛ, amɛfɛɛ amɛmiitsu nii yɛ niiahefɔmɔ nitsumɔhe bibioo ko. Amɛshika ni amɛnaa lɛ shɛɛɛ klɛŋklɛŋnɔ lɛ, shi efa kɛha amɛ bɔni amɛbanyɛ amɛkɛhi shi yɛ hejɔlɛ mli. Amɛyi enyɔ lɛ ena miishɛɛ waa akɛ agbɛnɛ lɛ amɛnyɛɔ amɛkɛ be pii taoɔ mɛi ni yɔɔ Biblia lɛ he miishɛɛ lɛ. Amɛnaa be ni amɛtaoɔ lɛ hu amɛkɛ mɛnɛɛmɛi susuɔ Biblia lɛ he ni amɛkaseɔ
Nyɛ ko ni yɔɔ bii enumɔ lɛ shwe ni ena gbɛfaŋnɔ pii yɛ shiɛmɔ nitsumɔ lɛ mli. Efee tsakemɔi ni he hia lɛ bɔni afee ni enyɛ efee nakai. Eha gbekɛbii lɛ nitsumɔ akɛ amɛdiɛŋtsɛ amɛŋmɛ amɛsaai lɛ ni amɛsaa amɛtsui amli dani amɛbaye nii leebi. Ejara nitsumɔi eha gbekɛbii lɛ ateŋ mɔfɛɛmɔ akɛ amɛtsumɔ tsu kroko ni yɔɔ shia lɛ mli koni amɛha jɛmɛ afee falefale. Daagbi lɛ, amɛnyɛ lɛ teɔ shi mra etsuɔ nitsumɔi krokomɛi ni yɔɔ shia lɛ, efɔɔ ataadei ahe ni ejeɔ gbi lɛ nihoomɔ shishi. Nohewɔ lɛ beni gbekɛbii lɛ aaafee klalo akɛ amɛya skul lɛ, no mli lɛ amɛnyɛ lɛ hu egbe shia nitsumɔi anaa ni lɛ hu ebaaya eyafee kaselɔi yɛ ekpokpaa lɛ nɔ kɛyashi beni gbekɛbii lɛ aaajɛ skul aba.
Be Fɛɛ Shiɛmɔ Kɛ Kaselɔi Afeemɔ
Yɛ je lɛ mli maji fɛɛ mli lɛ, mɛi yɛ ni eto gbɛjianɔ ni amɛsɔmɔɔ akɛ “gbɛgbalɔi” (ni kɛ be fɛɛ jajeɔ “sanekpakpa” lɛ) . Be komɛi lɛ, enɛ biɔ ni amɛfee tsakemɔi pii yɛ amɛdaagbi nifeemɔi amli. Nuŋtsɔ lɛ nɔkwɛmɔnɔ lɛ ji nɔni ye ebua amɛ ni amɛye omanye ni amɛnaa miishɛɛ hu. Emusuŋ tsɔlɛ yɛ mɛi ni esɔmɔ lɛ he. Ebu amɛ akɛ “tooi ni bɛ kwɛlɔ” ni efee yuuyaa ni ashwie amɛ. Esumɔ akɛ ekɛ esusuma aŋmɛ shi yɛ amɛ hewɔ. Nɛkɛ nɔkwɛmɔnɔ nɛɛ baanyɛ awo wɔ fɛɛ hewalɛ.—Mat. 9:36; 20:28.
Gbɛgbalɔ ko ni yɔɔ Illinois (U.S.A.) ni ehi be fɛɛ sɔɔmɔ nitsumɔ lɛ mli atii ekpaa lɛ kɛɛ akɛ: “Afii ni eho nɛɛ eyi obɔ̃ kɛ miishɛɛ, hejɔlɛ kɛ mlifilimɔ sɔŋŋ akɛ esani makɛɛ nyɛ. Misɔlemɔ kɛkɛ ji akɛ manyɛ matsa be fɛɛ sɔɔmɔ nitsumɔ lɛ nɔ yɛ Yehowa jɔɔmɔ mli gbiiabɔ ni nitsumɔ yɔɔ nɛɛ.”
Ani onaagbai lɛ baanyɛ aŋmɛ bo gbɛ ni okɛ ohe awo nitsumɔ nɛɛ mli vii, aloo ani obaanyɛ ofee tsakemɔi bɔni afee ni onyɛ ofee enɛ? Kɛji okɛ mɛi ni yɔɔ be fɛɛ sɔɔmɔ nitsumɔ lɛ mli lɛ susu he lɛ, amɛbaawa bo. Ekolɛ obaanyɛ otao nɛkɛ gbɔmɛi nɛɛ ekomɛi yɛ Yehowa Odasefoi akpee wuji aloo kpokpaanɔ kpeei ashishi Amɛniiashikpamɔi kɛ mumɔ ni amɛjieɔlɛ kpo lɛ baanyɛ akanya bo ni okɛɛ ohe akɛ, ‘Kɛji amɛnyɛ amɛfee lɛ, belɛ mi hu manyɛ mafee!’
Obaayɔse akɛ tsakemɔi ahe baahia yɛ nibii pii amli moŋ, shi nɔ̃ titiri ni he baahia lɛ ji HEMƆKƐYELI. Ekolɛ bodiɛŋtsɛ oyɔse enɛ momo yɛ mɛikrokomɛi ni onaa lɛ he, aloo bodiɛŋtsɛ ona niiashikpamɔi komɛi ni ji odaseyelii ni tsɔɔ faŋŋ akɛ nɔni Yesu kɛɛ lɛ ji anɔkwale lɛɛlɛŋ akɛ: “Shi nyɛtaoa Nyɔŋmɔ maŋtsɛyeli lɛ kɛ [Nyɔŋmɔ] jalɛ lɛ tsuutsu, ni akɛ nii nɛɛ fɛɛ aaafata he aha nyɛ.”—Mat. 6:24, 33.
Mɛi ni bɔɔ amɛhe mɔdɛŋ ni amɛna gbɛfaŋnɔ kpele bɔni amɛbaanyɛ yɛ nitsumɔ krɛdɛɛ ni Yehowa Nyɔŋmɔ kɛ Yesu Kristo eha Kristofoi yɛ nɛkɛ be mli lɛ naa hejɔlɛ kɛ miishɛɛ yɛ wala mli. Enɛ ji nɔni Nyɔŋmɔ ewo he shi kɛha esɔɔlɔi lɛ. Ani enɛ ji egbɛfaŋnɔ yɛ wala mli? Kɛ onine shɛko nɔ lɛ, belɛ ekolɛ kɛji ojwɛŋ he jogbaŋŋ ni oto gbɛjianɔ jogbaŋŋ lɛ onine baanyɛ ashɛ nɔ.
Miishɛɛ yɛ nɔ̃ hamɔ mli. Kɛji ole akɛ okɛ obe kɛ ohewalɛ etsu nii yɛ nitsumɔ krɛdɛɛ ni aha Kristofoi akɛ amɛtsu yɛ nɛkɛ naagbee be nɛɛ mli lɛ, ehaa onaa miishɛɛ ni otsui nyɔɔ omli. Lɛɛlɛŋ Nuŋtsɔ lɛ nanemaahei asɛɛnyiɛmɔ ji nɔni baaha wɔna miishɛɛ kpele ni ekɛ anunyam kpele baaha Yehowa.—Mat. 22:37-39; Bɔf. 20:35.