Ani Okɛ Nakai Akrabatsa ni Afo Iɛ Tsuɔ Nii?

AKƐNI okane Buu-Mɔɔ lɛ yɛ afi ni eho lɛ mli hewɔ lɛ ani okadi nɔ ko hee ko ni jeɔ kpo yɛ nɔ ni akaseɔ yɛ asafoi lɛ amli lɛ he? Enɛ ji akrabatsa fioo ko ni afo ni obaana eko yɛ enɛ mli lɛ baafai 10 kɛ 16. Mɛni ji nɛkɛ akrabatsa ni afo nɛɛ?

Wɔbaanyɛ wɔtsɛ nɔ hee nɛɛ ‘nitsɔɔmɔ akrabatsa,’ ejaakɛ enɛ ji yiŋtoo hewɔ ni afee. Gbɔmɛi akpekpei abɔ yaa asafoŋ Biblia kasemɔ, ni akɛ Buu-Mɔɔ lɛ feɔ enɛ. Shi sɔɔlɔi ni akɛ nitsɔɔmɔ nɛɛ ewo amɛdɛŋ lɛ bɔɔ amaniɛ akɛ etɔɔ mɛi komɛi akɛ amɛaanu nikasemɔi lɛ ekomɛi amli saji otii lɛ ashishi. Enɛ bɛ naakpɛɛ, ejaakɛ bɔfo Petro kpɛlɛ nɔ akɛ Kristofoi ni afɔ amɛ mu ni hi shi yɛ klɛŋklɛŋ afii oha lɛ mli lɛ ateŋ mɛi pii na akɛ Paulo niŋmaai lɛ ekomɛi “amli nibii komɛi ashishinamɔ miijara.” (2 Petro 3:16) Agbɛnɛ mɛi ni kaneɔ Buu-Mɔɔ lɛ ateŋ mɛi komɛi ewie akɛ amɛbaakai pii kɛji akɛ amɛna emli saji otii komɛi ni akɛtiɔ mli. Bɔni afee ni wɔtsu hiamɔ nii nɛɛ ahe nii hewɔ lɛ ato nɛkɛ akrabatsa nɛɛ ahe gbɛjianɔ.

Agbɛnɛ, yɛ nyɔji komɛi asɛɛ nɛɛ, ani hiɛ sɔɔ nɛkɛ akrabatsai nɛɛ ni akɛmiitsu nii? Nyɛmiyoo Kristofonyo ko ni yɔɔ Ohio ŋma akɛ: “Miida nyɛ shi jogbaŋŋ yɛ saji otii ni akɛtiɔ mli ni baa yɛ Buu-Mɔɔ nikasemɔ lɛ naagbee lɛ hewɔ. Amɛyeɔ amɛbuaa mi diɛŋtsɛ ni minuɔ nikasemɔ lɛ mli saji otii lɛ ashishi ni mikaiɔ.”

Nyɛ ko ni hiɛ bihii enyɔ kɛɛ akɛ: “Masumɔ ni nyɛle akɛ wɔhiɛ sɔɔ sanebimɔi kɛ wiemɔi ni jeɔ kpo yɛ akrabatsa lɛ mli lɛ ni jeɔ kpo yɛ nikasemɔ lɛ eko fɛɛ eko naagbee lɛ. Eyeɔ ebua diɛŋtsɛ ni amɛkɛtiɔ otsi lɛ nikasemɔ lɛ kɛ nɔ ni baanyiɛ sɛɛ aba lɛ mli.” Yɛ be mli ni ewieɔ kɛtekeɔ nɔ ni akɛba lɛ he lɛ, Kristofonyo ko ni yɔɔ New York kɛɛ akɛ: “Miyɛ hiɛnɔkamɔ akɛ eji Yehowa suɔmɔnaa nii akɛ nakai sanebimɔi lɛ baahi fɛɛ eko mli agbɛnɛ yɛ wɔsɛɛ. Amɛyeɔ amɛbuaa bo ni onuɔ nɔ ni nikasemɔ lɛ fɛɛ kɔɔ he lɛ shishi.”

Nɔ ni mɔ ko ni kaneɔ daa kɛɛ England ni baaye abua bo ni ona gbɛi anɔ ni obaatsɔ ni okɛ emlitii nɛɛ atsu nii nɛ: “Mina akɛ Buu-Mɔɔ nikasemɔi kɛ akrabatsa ni afo kɛ emli sanebimɔi ni akɛtiɔ mli yɛ nikasemɔ lɛ naagbee lɛ yeɔ buaa bei babaoo ni minuɔ nikasemɔ Iɛ shishi. Bɔ ni nibii pii boteɔ mijwɛŋmɔ mli lɛ yɛ naakpɛɛ. Kɛ mikane nikasemɔ lɛ fɛɛ migbe naa lɛ minyɛɛɛ maha sanebimɔi lɛ ahetoo taakɛ bɔ ni misusuɔ akɛ manyɛ mafee lɛ. No hewɔ lɛ mikaneɔ nɔ shii enyɔ loo shii etɛ kɛyashiɔ be mli ni minyɛɔ mihaa sanebimɔi lɛ fɛɛ hetoo. Ni mina akɛ eye ebua mi ni minyɛɔ mikaiɔ babaoo.”

Yɛ be mli ni ogbeɔ onii ni okase lɛ naa lɛ, mɛni hewɔ otii nɛkɛ akrabatsa nɛɛ mli saji otii lɛ amli. Kɛji akɛ ogbeleee nikasemɔ lɛ mli shi moŋ obaanyɛ oha sanebimɔi lɛ eko fɛɛ eko hetoo aloo okai emli saji otii lɛ, belɛ ehi jogbaŋŋ! Shi kɛji akɛ onuuu hetoo ko shishi jogbaŋŋ, aloo onuɔ he akɛ omɔko sane lɛ jogbaŋŋ bɔ ni ooonyɛ otsɔɔ mli oha mɛi krokomɛi lɛ, gbelemɔ kɛya he ni nikasemɔ lɛ yɔɔ ekoŋŋ. Kɛ oti mli amrɔ nɔŋŋ yɛ jɛmɛ lɛ ebaaye ebua oshishinumɔ ni ebaaha emli saji otii lɛ aka ojwɛŋmɔ mli. Eheŋ be tsɔ ko shi ekɛ sɛɛnamɔi babaoo baaba.

Kɛ́ bo okwɛɔ Buu-Mɔɔ nikasemɔ Iɛ nɔ lɛ, onã nɔ ko ni obaanyɛ okɛtsu nii. Jaa nikasemɔ lɛ mli bɔni afee ni ona be ni okɛti mli ni ogbala jwɛŋmɔ kɛba nakai akrabatsa lɛ nɔ. Ní oookane otii lɛ kɛkɛ aloo ni ooowo asafo lɛ hewalɛ ni amɛkane yɛ shia lɛ, bɔɔ mɔdɛŋ ni otsu oti lɛ fɛɛ eko he nii. Kɛ afee lɛ tamɔ sanebimɔi lɛ obaanyɛ obi nyɛmimɛi lɛ tamɔ ‘wolo ni aŋa ni aakai nɔ ni akase lɛ.’ Enɛ baaha mɛi ni yɔɔ nikasemɔ lɛ shishi lɛ fɛɛ ana nikasemɔ lɛ mli saji otii lɛ. Bo kɛ amɛ fɛɛ baakai emli saji otii lɛ jogbaŋŋ!

Wɔhiɛnɔkamɔ ji akɛ enɛ baaya nɔ aye abua nyɛ yɛ be mli ni nyɛtaoɔ ni nyɛle anɔkwale lɛ ni baaha gbɔmɛi aye amɛhe ni ekɛ naanɔ wala aba lɛ.​—Yohane 8:​32; 17:⁠3.